Ads by Google Ads by Google

Tala I Vaifanua


O se va’aiga i le tama’ita’i faia’oga Dr Faofua Fa’atoafe ma lana vasega e to’alua o lo ua alo atu mo le malaga asiasi i pisinisi i Samoa e fa’aatoatoa ai latou galuega fa’atino o a’oa’oga i potu a’oga, i mataupu fa’apisinisi. Ua fa’atasia ma se tasi o matua o le fanau a’oga. [ata: Leua Aiono Frost]

O se va’aiga i le vasega 3 a Lupelele Elementary ma latou faia’oga ua fa’atasia ina ia pu’eina le latou ata i luma ane o le lau fa’ailo mo le ‘au’au o a’oa’oga uma a i latou i lenei masina, “Iloa lau Aia Tatau!” [ata: Leua Aiono Frost]

O se va’aiga i le vasega o le pulega atoa a le SOPAC i Guam ua auai mai mo le tatalaina aloaia o le latou lala i Tafuna lea fa’atautaia e le susuga Mike Tolmie ma Tangimalie Letuli. O i latou o lo’o ua auai mai o le Susuga Frank Shimizu ma ona alo lea ua i ai i lenei ata fa’atasi ma Patele Iulio sa sausauina le fale atoa i le visa. [ata: Leua Aiono Frost]

Tatala Le Tautua a le SOPAC i Amerika Samoa:

 

O le aso Tofi i le afiafi na fa’atasia uma ai e na vala’aulia fa’apitoa i le lotoa fou a le SOPAC lea ua mae’a fa’atuina lelei e fesaga’i ma le Veterans Memorial Stadium i Tabuna, ina ia patipatia ma faafetaia fo’i le ola tausinio o nisi o alo o le atunu’u i pisinisi fa’atula’ia i totonu o le tatou malo. Ua faailoa mai o le tau lofai o lea Faleoloa o Oloa Siiatoa, e tusa ma le $500,000.

 

O lea Kamupani Oloa siiatoa tau Vaiinu Suamalie ma le Suavai Taumafa, le SOPAC lea ua tutula’i nei ma ua amatala ai lana tautua e afua i lea aso, ua fa’amauina fo’i i totonu o le tatou malo, o se tasi o galuega lelei ua tino mai, ma ua agava’a e tautuaina le atunu’u atoa e ala i ana olo fa’aulufale mai. O lea pisinisi South Pacific Distributors[SOPAC], o le a latou aumaia i le atunu’u nisi o latou Vaiinu Suamalie, Suavai Taumafa mama, fa’atasi ai ma le fela’ua’iga i tua i faleoloa uma i le atunuu. O le SOPAC e fa’atautaia mai e Frank Shimizu ma lana fanau lea fo’i sa malaga mai uma mo le tatalaga fa’apitoa o lenei lala i Tafuna. O i latou fo’i sa tu’uina i ai le avantoa matagofie i lea po e optima ai le lapine e tatala aloaia ai faitoto’a mo le maimoaga, fa’apea ma pisinisi o le a fa’atautaia i lea nofoaga.

 

O le susuga Frank Shimizu ma ona aloali’i e to’alua sa latou ootia le Lipine ina ua mae’a fo’i tatalo si’itia e le susuga Patele Iulio. O ia fo’i lea sa ia tuuina i ai le avanoa, na te sausauina ai le faleoloa atoa e tapena a mo galuega e faia ai i aso ta’itasi. O le va’aiga o lea kamupani  ma lona fa’agaoioia iinei, o le a fa’atinoina lea e Mike Tolmie ma Tangimalie Letuli, o alo fo’i o le atunuu.

 

Matagofie fo’i le taumafataga sa tapena leleia mo le fa’amoemoe, ma sa fa’ai’uina lea fo’i afiafi a tamali’i i fiafiaga masani a i latou uma na vala’aulia. Mai le lisi o latou oloa i le taimi nei, ua i ai ma le ituaiga apasusu lea e fa’aaogaina e fanau iti.

 

Fa’ata’ita’i ona fa’atino galuega Fa’apisinisi - ASCC Business Class:

 

O le malaga fa’apisinisi a le vasega o pisinisi a le Kolisi Tu’ufa’atasi, lea o lo’o fa’aaogaina lea malaga e asiasi ai i pisinisi tumaoti i Samoa, ae maise lava i pisinisi e gaosia lava e i latou a latou oloa, tu’upusa pe tu’uapa ma fa’atau atu i le mamalu lautele.

 

I le tele o mea o le a latou fesiligia ma fa’amaumauga o le a latou mauaina e aoga tele lea i a latou suesuega ma tomai e mo’omia ona latou iloa patino a’o fa’atautaia pisinisi a i latou lava.

 

“O lenei malaga, pe afai e maea ona asia uma lava pisinisi ua matou fa’ato’ai i ai so matou avanoa e matamata ma fesiligia ina ia malamalama lelei i le fa’atautaiga o latou galuega ma fefa’ataua’iga, e aoga tele lea i le fanau o lo’o tau’avea nei kosi fa’apisinisi, e fa’amautu atili ai lo latou a’oa’oga ua mae’a aotauina ai i le potu a’oga.” O se tala lea a le tama’ita’i faia’oga, a’o le ta’ira’i fo’i o Kosi Fa’apisinisi i le Kolisi, Dr. Faofua Va’apu’u Fa’atoafe.

 

I nei kosi o a’oa’oina ai le fanau mo fa’ailoga fa’apisinisi e aoga tele ai fa’amaumauga mai asiasiga i pisinisi e tele, ae maise o le fa’avasegaina o le tupe e fa’aalu, ae maise o le tupe e maua mai i oloa na fa’atau atu, le totogia o mea uma na fa’aaoga e aofia ai ma tagata faigaluega.

 

“Pe afai e mafai e le fanau ona fa’asoa lelei le tupe o lo’o fa’aagaaga mo mea uma e fa’atautaia ai le pisinisi, ua mafai fo’i ona fa’atautaia e i latou se pisinisi. O le aoga tele lea o lenei malaga e faia pea, ina ia tapena ai le fanau e fa’atino tiute fa’apisinisi ua a’oa’o ai i le potu a’oga.” O se toe fa’aopoopo mai lea a le tama’ita’i faia’oga Fa’ato’afe.

 

O se isi vaega o lenei vasega sa matua a’oa’oina lelei ai i le failaina o lafoga, ma sa fa’atautaia lea vasega ae na fa’apa’aga fo’i le ASCC Business Class ma le Ofisa o Lafoga ina ia mautinoa ua mae’a fa’atino lena fo’i agava’a e le fanau a’oga. Ua mae’a taua’aoina foi latou tusipasi mai lea ofisa e fa’amaonia ai lo latou agava’a ua mae’a tamau ina ua mae’a failaina e i latou lafoga a le mamalu lautele o le tatou malo.

 

Lupelele Elementary: Iloa Lou Aia Tatau:

 

I le vasega 3 atoa i le Lupelele Elementary, ua a’oa’oina fa’apitoa ai le fanau a’pga ina ia latou “Iloa lelei a latou aia tatau.” O le manulauti lea ua mae’a fa’atulaga e le vasega o faia’oga uma ua a’oa’oina lenei vasega. Peita’i e talitutusa lava fo’i ma le manulauti ua fa’aautu i ai a’oa’oga i le vasega fa ma le lima i lea lava a’oga.

 

“O lenei taumafaiga ua fa’atulaga mai mo faia’oga ina ia latou fa’aaogaina lea lava auto i a latou lesson fa’atautaia mo le fanau i a latou vasega. Ia fa’ataua ai le iloa patino e le fanau o latou aia tatau, e soifua fiafia ai i latou ma ia latou tofu maua fo’i fa’amanuiaga mai so’o se alamanuia ua tapena e le Malo mo fanau i ona laufanua, ae maise ia maua e i latou le sa’olotoga e a’oaoina lelei ai i so’o se a’oga e latou te filifili. Aia tatau, o se mea e tofusia uma ai le fanau uma e soifua i totonu o Amerika Samoa.”

 

O loo ua fa’ailoa mai fo’i e i ai fo’i manulauti ae fa’aautu uma lava i le Aia Tatau, mo le vasega 4, 5 ma le 6, ma o lo’o fa’atautaia ai a’oa’oga ale fanau, ae o lea suia fo’i pe a mae’a lenei masina.