POLOKALAMA FA’ATAOTO A LE DYWA

Ua fa’ataoto polokalama a le Matagaluega o Tina ma Tuplaga Talavou a le malo. O nei polokalama e aofia ai le taumafaiga e toe aoao ni tomai eseese ina ia agava’a tina ma tama’ita’i i ni faiva e ono maua ai ni avanoa faigaluega, pe amatalia ai foi ni a latou lava pisinisi laiti tumaoti se’ia oo i le faatulagaga o ta’aloga eseese e tapena i ai tupulaga talavou.

O le tele o polokalama masani e agavaa ai tina ma talavou i tomai nei, e amatalia i le aso 23 Ianuari ae fa’amae’a ia Aperila 13. E ese mai lea ua sofia ai ma le Kosi Fa’amasani i Komipiuta, ua a’e tonu foi ia Januari 23, ae uma ia Aperila 13.

O le suisui lea ua fa’ailoa mai e ta’i ono masina le umi ma e fa’ato’a fa’amuta lea ia Aukuso 25 ae amata le isi kosi suisui fou ia Setema 5 ona fa’ato’a fa’ai’u lea ia Tesema 7, mo i latou uma e alaala i Ta’u, Fitiuta ma Faleasao i Manu’a.

O se isi kosi fou ua fa’amautu nei mo le vasega o tama ma tina ae maise talavou ua alia’i se lagona e ao ina lelei lona fofoga i le tofi “Failauga” o le atunuu i le gagana Samoa, e amatalia i le aso 23 Ianuari ae mea’a ia Aperila 13.

O lo’o lesitala suafa mo nei kosi i le ofisa i Pago Pago.

I le itu o ta’aloga, ua amata mai i le “Savali ma Talanoa”  seia oo i ta’aloga e aofia ai le Piiga, Tatafiti, Soifua Maloloina Lelei, Siisii Uamea Mamafa; Volleyball; Kosi Fa’amasani i Kolisi ma le Football ua lesitalaina nei ae amatalia uma i le aso 23 Ianuari seria oo ia Mati 31.

O kosi e fa’aleleia atili ai le tomai o ali’i ma tamaitai Faiaoga i Ta’aloga eseese nei, e fa’atautaia mai ia Fepuari 6 -10. O tina talavou uma foi fa’ato’a amatalia aiga, e ao ina lesitala i latou mo se Kosi Fa’amasani i le tausiga lelei o aiga e afua mai i le aso 7 Fepuari se’ia oo ia Aperila 6.

TAUOFOGA SAPALAI FAIFA’ATOAGA MEA’AI FANAU AOGA

Ua mae’a fa’asalalauina mai e ao ina fa’aulu atu sau ofo mo le sapalai o mea taumafa mata mai le atunu’u, pe afai e te fia fa’atinoa lea tautua. Ua i ai ona aiaiga tamau e ao ina usita’ia, pe afai o le a e fia fa’atinoa lea tautua.

O mea taumafa nei o fua o fa’aeleeleaga a le atunu’u, ae ua mafaia foi ona fa’atino e so’o se tasi ua mae’a umia lona laisene e nate gafatia ai ona fa’atino lea auaunaga i le vaitau atoa o loo fa’atautaia ai aoga a le fanau.

O le fa’asalalauga sa amatalia mai i le aso 11 Ianuari, ae tapunia i le aso 25 Ianuari i le itula e 2:00 i le aoauli, ma e fa’aulu lau ofo i le Matagaluega o Oloa a le malo i Tafuna.

E ese mai lea, o le a faia se fonotaga fa’apitoa mo i latou o fa’aulu poo fa’amoemoe e fa’aulu sana ofo i lea tauofoga i le aso 19 Ianuari, fa’atasi ai ma faifa’ato’aga uma i le Potufono o le Matagaluega a le Agriculture i Tafuna i le itula e 9:00 i le taeao.

TAPUNIA AMERIKA SAMOA HUMANITIES COUNCIL MO LIPEA

O le ofisa autu o le Amerika Samoa Humanities Council (ASHC) ua tapunia le tumau ona o loo nafa le matagaluega o le Faletupe o Atina’e ma galuega lipea i lea vaega o le  Faletele Fa’apisinisi o le Lumana’i i Fagatogo.

I le tulaga o le umi o lenei galuega, saunoa Komesina Afalava e faapea, “Ou te mautinoa lava toe o lenei vaiaso fou, ma e tatau ona tatala faitoto’a o le Ofisa lea mo a latou galuega masani i le mamalu lautele ia Fepuari 1, 2017.”

Ua faailoa mai e le ASHC, “E le faigofie ona fesiitai le Ofisa lenei i se isi nofoaga mo se taimi puupuu e pei ona fa’atautaia ai nei lipea mo le matou vaega o le Lumana’i, aua e matua tele na’ua lipea ma isi mau mea e ao ina fa’aleleia...e sili ai ona tapunia lelei, ae tatalia lipea se’ia mae’a lelei.”