Ads by Google Ads by Google

Tala i Vaifanua


O le va’a fagota lea, “Rosita C” e na’o le 3 itula na fa’asala ai ona o le le fa’alogo lelei i fa’atonuga o lo’o fa’atonutonu atu ai i latou i le taimi e ulufale mai ai i le uafu i Fagatogo. [ata: Leua Aiono Frost]

2 VA’A FAGOTA FA’ASALA LE FA’ALOGO FA’ATONUGA

 

E lua va’a fagota na tatalia le fa’atagaga e ulufale ai i le uafu i Fagatogo ma ua fa’ailoa mai le mafuaga e le Harbor Master Silila Patane, “E le mafai ona sao atu le fa’atonuga ma usita’ia i le taimi o galuega e tau fa’aofi mai i totonu va’a tetele fa’atasi ai ma i latou, o va’a laiti!”

 

Ina ua toto tetele le taumafaiga e fa’atulaga sa’o va’a i le ulufale i le uafu e tasi lava le mea e ao ina fa’atino loa e Patane, o le taofia loa i le fa’aoo i ai o le sala.

 

O le ulua’i va’a, e tolu aso o taofia i gatai o Gataivai o le “Talofa” ma sa iloga le faigata ona fa’alogo o i latou, ua o mai lava e taula, ae o lo’o taumafai mai i totonu le Meli tele fa’atasi ai ma va’a oloa, i le aso na to’ai taunu’u mai ai. Ina ia feso’ota’i atu, sa fa’ailoa mai e le o mailoa tonu le alaleo o lo’o fa’aaogaina atu mo Uaealesi, ma e tau le manino fo’i ia i latou i le gagana peretania.

 

“O le mea e tatau ona faia e a’u, o le fa’atonuga tu’usa’o o le fa’asala loa, ina ia utagia fa’atonuga uma mo le lumana’i o lenei galuega, aua e ona ogaoga lava se mea e tupu mai, pe afai e tu’u ai pea e le fa’atonutonua lelei kapeteni nei, ae maise o uso mai atunu’u Asia,”o se fa’amatalaga lea a Patane.

 

O le fa’asalaga sa tu’u i le va’a lea e tolu aso o taula mai fafo atu o le uafu. Ona soso’o lea ma le “Rosita C” o le isi fo’i va’a fagota, ma sa fa’asalaina lea i le aso Gafua o le vaiaso nei. Ina ua fiu lava fo’i Patane e fa’atonutonu atu ae leai se fa’alogo ma usita’i i fa’atonuga, pa’u loa fo’i i ai le fa’asalaga, taula mai fafo atu o le uafu mo le 4 itula.

 

O le Kamupani o lo’o avea ma latou sui o le Blue Angel ma le susuga Herman Thompson, o ia sa oo ane e talosaga le toe tatala ma fa’aitiitia o le taimi e taula ai i fafo o le uafu nei va’a e lua. Peita’i, ua manino fo’i le tulafono ua fa’ailoa ia i latou, e leai se isi e na te fia fa’asalaina va’a e ulufale i le uafu, ae tatau lava ona usita’ia tulafono o le Uafu ma le taimi e taula mai ai i vaipanoa o le a fa’asino atu e ala i uaealesi.

 

Ua fa’ailoa mai fo’i i le mamalu o Kamupani o lo’o avea ma Ofisa Autu o Va’a uma e ulufale mai, o le Alaleo e ala ona ki i ai Uaealesi a va’a uma o le “VHF 16” ina ia maua lelei ai fa’atonuga uma. Soo se mea e ono tupu i le fa’aofia mai o so’o se va’a, tetele pe laiti, i totonu o le uafu, o lo’o taumafai i ai lea vaega o le Pulega a le Uafu ina ia sao ma lelei mea uma, leai ni fa’alavelave e ono tutupu mai i va’a, fa’apea ma tagata faigaluega o aofia ai i totonu ma luga fo’i o ofisa i le uafutele.

 

TAU AA’O KONEKARATE MO SLP - FA’ATOAGA

 

Ua fa’ailoa mai e le Ofisa o Oloa a le malo ua mae’a faiva o sailiga ma ua fa’amauina fo’i nisi o faifa’ato’aga sa talosaga mo le avanoa latou te sapalaia ai fua o fa’ato’aga mo le Polokalama o Mea Taumafa a le Fanau A’oga. Ua mae’a ona i ai le vaega ua talia a latou tauofoga, ma ua mae’a fa’ailoa atu ia i latou fua o fa’aeleeleaga e ao ina latou sapalaia.

 

Peita’i, ua le mafai ona taua’ao maia se kopi o nei konekarate ua taua’aoina i sui nei, se’i vagana ua mae’a feutaga’i lelei le matagaluega o Oloa ma sui ua fa’ao’o i ai lea konekarate, ma e tatau fo’i ona ioe mai le Fa’atonu o le Ofisa o Oloa, e ala i le emeli, ona fa’ato’a fa’alauiloa lea o i latou ua fa’amanuiaina latou ofo.

 

Ua mae’a fa’atulaga fo’i le fonotaga a le aufai fa’ato’aga a le atunu’u ma ofisa o le malo e aofia i lenei tauofoga. O lea fonotaga e faia i le aso Tofi nei i le Matagaluega o Fa’ato’aga i le itula e 9 i le taeao.

 

TA’AVALE SAILIA & TIUTE PUSA OLOA TETELE

 

Ua i luga i le uafu i Fagatogo le Ta’avale ua matua lomia ai le Igoa - CUSTOMS ma ua auina mai ina ia mafai ona sailia auiliili i masini fa’aata oloa o loo i totonu o Pusa Oloa tetele - container - lea e la’u mai e va’a i le teritori.

 

Ma sa va’aia fo’i le oo mai fa’atasi ma ali’i o lea kamupani sa fa’atauina mai ai lenei masini ina ia fa’ailoa lelei ma a’oao i alo o le atunu’u o galulue i le tiuteina o oloa.

 

E iloga mai e taugata le tiuteina o oloa, peita’i, ua siitia fo’i le tulaga e fa’atautaia ai galuega a lea vaega o le malo.

 

O lenei ta’avale na faatauina e le malo i alagatupe sa maua mai i le pone. Ua le gata i le ta’avale mo pusa oloa tetele, ae o lo’o i ai foi isi masini laiti e siaki ai oloa i le malae va’alele i Tafuna ma le Falemeli i Fagatogo.