Ads by Google Ads by Google

Onosa’i I Mea Tiga

Vaega: 10

 

Fa’atalofa atu i le alafa’i mai i le manuia o le mamalu o le atunu’u i lenei aso fou, o se aso e fa’aopoopo i lou soifua fa’apea ma si o’u nei ola vaivai. E ao ai ona o tatou fa’apea ifo, “Le Ali’i, Iesu Keriso o Oe o le Fa’aola o le lalolagi, ia e alofa, toto i o matou loto le onosa’i ma le fa’apalepale i lenei aso, ina ia i’u manuia a matou fuafuaga uma, a’o le vi’iga matou te fa’afo’i atu i Lau Afio e fa’avavau, fa’avavau lava, amene.”

 

Fai mai ua fa’ate’ia le talatalanoaga fiafia a Mose ma Vesi, ia ua fa’alogologo mai o lea ua taunu’u ane Luisa ma tamaiti i le fale o Mose ma Malia. O lea na tu fa’atopetope ai loa i luga le toeaina ma savali atu i le fale. O le tele o taimi a’o faia pea le talatalanoaga a Mose ma Vesi, fai mai, o le taimi lea, ua lagona lava e le toeaina le fiafia o lona loto. O a fo’i manatu fa’aletiapolo na tupu a’e i lona loto i se taimi ua fano, lea na savali ai ma le sapelu i le fale o Vesi ma Luisa, o lea ua to’amalie mea uma e ala i le talatalanoa ma fetufa’ai ma si ona atali’i o Vesi.

 

E ui lava ina fa’apea o Vesi o le to’alua o le afafine o Mose le teine o Luisa, lea ua la fa’atamafaiina, ae ua pei lava Vesi o sona atali’i moni. O le isi itu, ona o lo’o ao’oga pea le fanau moni a Mose ma Malia, ma o le tausaga fa’aiu lenei o le tama o Lilo, ona soso’o ai lea ma le tausaga fa’ai’u o le teine Filipina.

 

O Vesi ma Luisa, o la’ua ia ua fa’atinoina mea uma i totonu o lo latou aiga. O le tele fo’i o tagata o le auaiga, e fai fai tala lava i a Vesi, o nisi fo’i, ua o’o lava i le toeaina o Mose ia fa’amatalaga e fa’aleaga ai Vesi. ia o faiga lava ia o le soifuaga o lo’o tatou i ai nei, ma o vaivaiga lava lea o le tagata soifua, po’o fea lava e alu i ai le tagata Samoa, o lona lava lea natura, o le faifai tala ma faifai upu i le isi tagata.

 

O le upu moni lava, “se i ‘eu muamua le utupoto o lo’o i lou mata, ona e fai ai fua lea o le utupoto o lo’o i le mata o le isi tagata. Afai fo’i o oe o se Agelu, ia fai ni ou apa’au e te lele ai, afai fo’i ua e ma ma, ia togi muamua sau ma’a. Ioe, o mea uma lava na o lo’o ta’ua i lenei fo’i manatu, aua o le upu moni lava, ua matua’i fa’alata lava o tagata i nei vaitaimi, e ‘ata’ata mai, ae loto leaga, e tautala mai ae tau fa’alata. ia lava pea le onosa’i ma le fa’apalepale aua o le soifuaga lava lenei tatou te ola ma soifua ai, e le mavae lava fa’afitauli ma mafatiaga e o’o mai, ae a tatou fa’avaivai ai loa, o lona uiga ua leai se aoga o mea uma.

 

Ua taunu’u le solo a Mose ma Vesi i le fale, ma ua tamomo’e mai le fanau a Vesi ma Luisa e fa’afeiloa’i le solo lea ua alu atu. O le atali’i matua o Vesi o lo’o fa’aigoa i le igoa o le toeaina, o Mose Jr. A’o le tama teine a Vesi ma Luisa o lo’o fa’aigoa i le igoa o le lo’omatua o Malia Matalena.

 

Na ona sau lava o le tuli a tamaiti, e leai se tasi na o’o i lo la tama, ae ua o sa’o lava i le toeaina o Mose, ua ‘ata Vesi ma tilotilo ane i si ana fanau, e ‘ese le leaga o le faiga o tamaiti e le toeaina o Mose. O le ala fo’i lea, e le mapu le tautua lelei a Vesi i totonu o le aiga, ona ua iloa lelei e Vesi le alolofa o Mose ma Malia i le la fanau.

 

Ua si’i le tasi, ae ua ta’ita’i le lima o le isi, ma ua alu loa le solo e aga’i atu i le fale. Fai mai, na ona iloa mai lava e Luisa le mea lea e tupu, vala’au mai loa, “Se tama, se tu’u i lalo, se o le mea le na ua leaga ai tamaiti, tu’u i lalo.” Ua ‘ata le toeaina o Mose ma sogi ane i le tamaititi o lo’o ia si’iina.

 

Ua tutu nei Mose ma Vesi ma tilotilo atu i le ‘ava’avau mai a Luisa i lea taimi, ae ua na o le ‘ata o Vesi ma tilotilo ane i si ana fanau. Ua le mafai ona tatali le ‘ata a le lo’omatua o Malia, “Ia e malie ia Luisa, o le faiga lava lea o le toeaina i lau fanau, afai lava o le a le mea e maua e le toeaina ma a’u, e le mafai ona ma a’ai ae le i a’ai tamaiti.”

 

Ua le tautala Luisa ae ua na o le punou ma lulu lona ulu. Ua saofafa’i ifo nei Mose ma Vesi ma ua fai loa le talatalanoaga fiafia i lea aso. O a fo’i manatu ma mafaufauga leaga sa osofia ai le loto o le toeaina o Mose, o lea ua i ai le filemu o le Atua, ma ua avea lea ma ala ua maua ai le fiafia ma le fetufa’ai i mea lelei, aua le aga’i i luma o aiga, ae maise fanau mo le lumana’i.

 

E faia pea….