Ads by Google Ads by Google

Onosa’i I Mea Tiga

Vaega: 73

 

Alo maia, o le a toe fa’aauau atu la tatou tala mo lenei aso.

 

Na muta mai la tatou tala, ina ua fa’atiga nei Loleta ma ua o’o fo’i i le taimi e tu’u ‘ese’ese ai e le Atua o ia ma se tama ua foaina na te tausi fa’apelepele i ai. Fai mai le tala, ua le iloga se mea e minoi solo i ai le lo’omatua o Malia. Ua o’o mafaufauga o le lo’omatua o Malia i le Faifeau ma lona Faletua, pe e tatau ona a’ami i le taimi lea pe leai.

 

Ua le mautonu fo’i le loto o le toeaina o Mose latou, ua na o le nofo ma fa’alogologo atu i le fa’ataitaio mai a Loleta, ua oso ai le alofa ma ua fai ai ma lana tatalo le leao i lea taimi. “Le Atua, alofagia Loleta, pa’i mai lau fa’amalologa mo ia i lenei taimi o faigata ma tiga, alofagia fo’i si o’u atali’i o Lilo, ia ‘aua ne i polepole vale lona loto, ae ia manatua pea Lau Afio i mea uma matou te faia.”

 

O le taimi lea, lea ua o lo’o saofa’i pea le lo’omatua o Lonisi i totonu o le pupuni lea ua uma ona tapena e Luisa ma Filipina, o lea la o lo’o i ai fa’atasi Lonisi ma Luisa e fesoasoani pe a i ai se mea e mo’omia e Lonisi. Fai mai, o le alu a le ta’avale a le toeaina o Lefefe i lea taimi, e fai fai, le o a va’a tau a Amerika e le maua le alu lea ua alu ai nei Lefefe. Ua toe fo’i ane Vesi i le fale, ona o lona manatu, ne i te’i ua i ai se mea e mo’omia, ma e tatau lava ona i ai i lea taimi.

 

Na ona taunu’u lava o le ta’avale a Lefefe i le falefaigaluega a Lilo, e le i toe fa’atali le toeaina, tamo’e loa i le faitoto’a, e una’i atu e Lefefe, ua loka mai le faitoto’a. Ua fiu le toeaina e tau vala’au, aua na i ai le manatu o Lefefe, e lagona mai ia ma lana vala’au lea e fai nei, ua fiu Lefefe e vala’au, e leai ma se isi e oso mai i fafo.

 

Fai mai, e le i tele lava i se pito, na ona a’apa atu lava o le toeaina i le ma’a, velo loa ma le faitoto’a, na fa’ate’ia le aufaigaluega ina ua fa’alogo mai, ua e’e atu le fa’ailo e iloa ai ua i ai le tagata ua faia le mea pi’o i le latou ofisa. Na alu ane nei le laga a tagata faigaluega, ae e le i alu ane ai Lilo i le tamo’ega lea. E tau ‘ava’avau ane le isi tama’ita’i, ae fa’apea ane le tala a le toeaina o Lilo, “Hey, hold your horse, hold your horse, o fea Lilo, fai i a Lilo e sau vave nei ma te o i le fale, tope, fa’avave, o lea ou te fa’atali.”

 

Na tamo’e nei le isi tama i le ofisa o Lilo, ma na fa’ate’ia le tama, i le fai atu i ai, o le toeaina o lo’o fa’atali mo ia, ma o le tala a le toeaina, ia vave ona alu atu la te o i le fale, o lo’o i ai le fa’alavelave ua tupu. Ua tu a’e i luga Lilo i lea taimi ma savali loa i fafo, e tilotilo atu Lilo, o le toeaina o Lefefe lea e tu ma u’u ona puimanava.

 

“Lilo, sau loa ta o, tu’u uma au mea na e fai, sau ta o, o lo’o i ai le mea o lo’o tupu ia Loleta, sau loa ta o, fa’avave.” Na tilotilo ane nei Lilo i le toeaina ma lulu lona ulu, ua toe tilotilo atu i le faitoto’a lea ua matua’i nuti lili’i. Na liliu ane nei le toeaina ma fa’apea ane i le aufaigaluega lea ua laulau tutu nei, “Va’ai le tou faitoto’a, se i ou sau taeao ona toe fai lea o se tou faitoto’a fou, e sili ai faitoto’a laupapa, e fiu e togi i le ma’a e le ta’e.”

 

Fai mai, ua tali e, isi, a’o isi, ua na o le tilotilo ane i a Lefefe ma Lilo lea ua alu le solo aga’i atu i le ta’avale a Lefefe. Na toe liliu mai lava i tua le toeaina o Lefefe ma fa’apea ane lana tala i le aufaigaluega a Lilo, “Sorry for my wrong.”

 

E faia pea...