Vaega: 70

Alo maia, o le a toe fa’aauau atu la tatou tala mo lenei aso. Na muta mai la tatou tala ina ua o’o nei i le masina e fanau ai Loleta. Fai mai, e fai fo’i o le avega o lo’o amo e Loleta, i lona fefe ma lona popole, ae ua na le iloa le avega mamafa o lo’o tauave e Lilo. E le i gagana le tama i ona matua i se mea e tasi, ona o lona alofa i lona to’alua o Loleta.

Ua tonu fo’i i le mafaufau ma le loto o Lilo, afai lava o le mea lea ua ia mana’o i ai, ia ona talia mea tiga uma, e sau ai tua o lona mana’oga. O lea fo’i la e nonofo pogisa ona matua, e le i fai lava i ai le tama i se  mea e tasi, ona o lona alofa fo’i i matua o Loleta latou ma lona aiga.

E le o iloa mai lava e se tagata, avega mamafa o lo’o feagai nei ma Loleta ma Lilo, ae e pei lava e matele lava le popole o le teine i matua o Lilo, ae maise ai o lona va’ai atu i le naunau mai o le lo’omatua ma le toeaina ia te ia, ona ua ma’imataga. O le isi itu o lo’o va’ai pea i ai Loleta, e ui lava i le ‘ote o le lo’omatua o Malia, ae ua ia iloa lelei, le alofa o Malia, ona o le matua alofa, e fa’atonu ma a’oa’i fanau i le mea e tatau ona fai.

E  le na o ia o lo’o fai i ai le sauniga le totogia a le lo’omatua, ua o ‘o fo’i i lana tama teine o Filipina, oe, e auato e le lo’omauta i le ‘ali pe a va’ai atu Malia o fa’aletonu se mea, ma le tala lava a le lo’omatua e lafo so’o, “Filipina, ou te le manumanu lava ia te oe, po’o le a lou aulelei le na e i ai, ua e iloa fo’i lava, e le fo’i lava la’u sasa ia te oe, fai fa’alelei mai nai au faiga, e le fia pupula atu lava i ai o’u mata.”

Fai mai, ua na o le tomumu le leoa o Filipina, ma tilotilo atu i lona tina, ua tau oso a’e se loto leaga, ona o mea uma lava o lo’o fai e Filipina, e le mafai ona sasi se mea i le va’ai a lona tina. “Mama, e te va’ai i ai, e au mai loa la’u uo i le fale, ona e le toe ‘otegiaina lea o a’u, aua o le tama e mamafa lava, pe a i le toluselau ona pauna.”

O mafaufauga ia o Filipina e te’i ai lava ua ‘ata ma tilotilo ane i lona tina, ua iloa lelei lava e le teine le alofa fa’avalea o lona tina i lona tuagane le tama o Lilo, ae o le isi itu na manatua nei e Filipina, o le la talatalanoaga ma lona uso o Luisa, e uiga ia Loleta. O le tala a Luisa ia te ia, “Filipina, ia e onosa’i lava, ma e usita’i i o ta matua, o a fo’i tala e lafo mai e lo ta tina, ia o ta onosa’i, se o le tagata e onosa’i na te maua le mea lelei, a’o le tagata e fa’amalo le loto, ia ua pei lava o se paipa ua uma ona uela, onosa’i ma saga onosa’i.”

O uiga lelei ia o lo’o faia pea e Filipina, o le a lava e sau e sau ai lona tina, na o le nofo lava e le tautala, ae e ‘ata ma tilotilo atu i si ona tama. Ua iloa lelei e Filipina, le alofa o lona tama i a la’ua uma ma lona tuagane, ae maise fo’i o Luisa, a’o lona tina, ua aliali lava lona alofa fa’apito i a Lilo.

I le va’ai a le toeaina o Mose i le va o Lilo ma Loleta, e ‘ese fo’i lana va’ai, e foliga mai o lo’o i ai pea se mea o mamafa i le loto o lona atali’i. E o’o fo’i la i a Loleta ia, e ala mai lava Loleta i taeao uma, e fulafula uma mata, ai sa tagi i le po atoa. E le o iloa atu e le toeaina o Mose ia mafatiaga o lo’o feagai nei ma Lilo ma Loleta, ma e leai lava se tasi ona ia iloaina.

O teine fo’i ia o Luisa ma Filipina, o lo’o maitau uma fo’i e teine uiga ia. Ma e fai a ma la talatalanoa ai, pe a o la iloa e le o i ai le lo’omatua po’o le toeaina. O le tele o taimi e alu lava Filipina i le fale o Luisa ma Vesi ma fai ai le la fale talatala ma lona uso. Manatua fo’i, o pili a’oga uma a le fanau a Luisa, o lo’o totogi e Filipina, o lana lea ofo e mana’o e totogi uma e ia pili a’oga o nai ona tei. O lo’o i ai pea masalosaloga, ae e le i va’ai i ai, o lo’o fai fo’i tala, ae e le o mautinoa.

E faia pea...