Ads by Google Ads by Google

Onosa’i I Mea Tiga

Vaega: 57

 

Alo maia, o le a toe fa’aauau atu la tatou tala. Na muta mai la tatou tala ina ua fa’amatala uma nei e Lefefe ia Mose ma Malia le tulaga na o’o i ai le latou malaga lea na alu e fa’amalamalama i le aiga o Loleta, lea ua fa’ananau i ai le loto o le ali’i o Lilo.

 

Manatua fo’i, e fai lava fetufa’aiga a Malia ma Lefefe ma lana fanau, ae fai mai, ua o’o i tuapa o ierusalemu, tami ane i tua o Manono Tai, ta’amilo ane i talane o Apolima mafaufau o le toeaina o Mose i lea taimi. Ua manatu le toeaina po’o le a lava le mea ua naunau ai le tina o Loleta ina ia fai loa le fa’aipoipoga a Lilo ma lana tama.

 

O le fa’aiuga o le fa’asolosologa o mafaufauga o le toeaina o Mose, ua ma’i taga le teine, fua i le mana’o o lona tina ia vave loa ona fa’atino mea uma. Ua tele le fia tautala ane o le toeaina i lea tulaga, peita’i, o lona va’ai alofa i mata o si ona atali’i o Lilo. O lea na ia fa’atalitali ai se i sau se taimi ona o la fetufa’ai ai lea ma Lilo, pe moni ona manatu pe leai. ia manatua fo’i upu a le atunu’u e ‘asa le faiva, ae le ‘asa le masalo.

 

Fai mai, a fai fai tau oso le ita o le toeaina o Mose i tala a lona to’alua o Malia lea ufa fai nei ia Lefefe ma le la fanau. E foliga mai ua o’o lava ina maualuga le alu ua alu ai nei le lo’omatua ua le toe fa’atafa. Ua lagona le mimita o lona loto i tala lea ua fai ane nei e Lefefe ma Vesi, ua pei e ‘ai e ni pi le lo’omatua o Malia.

 

O le mea ua tupu, ua leai se to’ese, ae ua na o le fa’aopopo, alu atu Vesi, ae tatao ane e Lefefe, ae o le taimi lea, ua leai ma se tautala o le tama o Lilo. Na i’u lava ina tu a’e i luga le tama ma savali loa i tua i si ona faleo’o lea o lo’o nofo ai. Fai mai, e savali lava le tama ae ua le iloga se mea e alu i ai lona mafaufau.

 

Ua nofo ifo nei i lalo Lilo, ae o lo’o sau lava ona taliga i tala ia o lo’o fai nei e lona tina ma Lefefe, fa’apea ma ona tuafafine. O le mea ua tupu, ua pei lava mafaufauga o Lilo o manatu ua o’o i ai lona tama. Ua tau oso a’e ai le popole o le loto o le tama. O upu moni lava, ua oso a’e masalosaloga o Lilo i lea taimi, aua na ‘ese lava le mea na o atu e fai, ‘ese le mea lea ua talanoa ane ai le tina o Loleta ia te ia.

 

E alu lava ma fa’asolosolo mafaufauga o Lilo, fai fai ‘ata, e fa’alogo mai lava o alu atu le tali e, a lona tina ma ona tuafafine ma Lefefe. Fai mai, na alu alu lava tala, fa’alogo mai Lilo o fa’apea le tala a le toeaina o Lefefe, “Malia, se ou te fai atu, o le to’atele o teine ma lo’omatutua o le aiga. Ae a e va’ai la oe, o le taimi lava na oso ai i fafo Lilo, pei o le a le laga ane o fafine ma teine, pei ua va’ai i se auro i lea taimi. Ae na ou saua lava i la’u fa’alogo le fa’aupuga e fa’apea, “Ua ma’imau le tama i a Loleta.”

 

Fa’alogo mai Lilo, ua ‘ese le mea lea ua o’o i ai le talanoaga lea ua fai nei, ae ua le masino le mau mafaufauga ua tutupu a’e nei i le tama i lea taimi. Ua le mautonu lona mafaufau, ua na le iloa fo’i le mea o le a fai. O le va’aiga a Lilo i totonu o le aiga o Loleta, e ‘ese fo’i tafatafa o le lo’omatua, ae o le toeaina e le gaoia lava Falaniko, e pei lava o si ona tama o Mose. E alu lava i le atoa faiga a lona tina, tami ane i Aikupito afe ane i isalaelu o’o i Amerika, ae e le lalo ai le fu’a a si ona tama, e le o se tagata e tautala.

 

Fai mai, e fa’alogo mai Lilo mai tua i lona fale o lo’o nofonofo ai, o fa’apea le tala a Lefefe, “Malia, se a e va’ai i le lo’omatua, le tina o Loleta, se e leai lava se isi a’u tala e toe fai atu, ua pei e va’ai i le selau tala Amerika, ina ua va’ai ia Lilo, ae o le upu moni lava, ua ma’imau Lilo, e lo ta loto e, pei a ma’i.”

 

E faia pea...