Ads by Google Ads by Google

Onosa’i I Mea Tiga

Vaega: 52

 

Na muta mai la tatou tala ina ua toe fo’i ane le fa’amalamalamaga a le matai o le aiga o Mose ma lona atali’i o Lilo, ma le tamaloa o Vesi, lea na alu i matua o Loleta.

 

Se i o tatou liliu atu i le aiga o Falaniko ma Susitina o matua ia o Loleta ma lo latou aiga po’o le a le tulaga ua o’o i ai ina ua toe tu’umuli le fa’amalamalamaga a Lilo lea na alu ane. Fai mai, ina ua toe o ‘ese Lefefe ma le malaga, e le i feosofii i totonu o le latou ta’avale, ae fa’alogoina e le toeaina o Falaniko ma le matai o lo latou aiga le tagi au e, au e, a le lo’omatua o Susitina.

 

“Falaniko, fa’alogo lelei mai lava oe, ua e le talia sa’u talosaga atu, ou te mana’o ia fai loa le fa’aipoipoga a Loleta ma Lilo, ae ua e liliu fai mai au fa’amatalaga le talafeagai ma lo’u mafaufau.

 

“Falaniko, out e ta’utino atu, ia te oe le toeaina, out e le toe mana’o lava ia tu’u le mea lenei, ia fai loa, aua a toe tu’u loa e le iloa po’o le a le isi itu e o’o i ai Loleta, o lena lava e te iloa lou afafine, e fiu e su’e e le iloga se mea e alu i ai, o lea la ou te taumafai e fai loa, ina ia nofo mai ai i le fale, aua ou te fiu e ‘ote ma ‘ote, ae e leaga oe, e te fai tama leaga, o lea la ou te taumafai e fai loa ‘aua ne i toe tu’ua.”

 

Fai mai, e fai lava tala a le lotomatua o Susitina ma tagi, ua le iloga se mea e liliu ai i le matai o le aiga o Falaniko lea na talia maia le savali na alu atu nei. Ae ua na o le punou o le toeaina o Falaniko ua le tautala. Na i’u lava ina tali ane i ai le matai o le aiga o Falaniko i le lo’omatua.”

 

“Susitina, malie maia lou loto oe le tina, e fai fo’i o i’ina a’o i’inei, atonu e sau se taimi, ae o le mea e le fetaui ai lou mana’oga, ona o le o’o mai o le afioga a Lilomaiava, o le fa’amalamalamaga e fa’ailoa mai ai, o la’ua ma Loleta o lo’o fai le la faiga uo, e ‘ese la le tulaga na o’o mai ai a’o lea ua e mana’o e fai loa le talanoaga mo le fa’aipoipoga, i lo’u lava manatu e le talafeagai.”

 

E le i uma le tautalaga a le matai o le aiga o Falaniko, le toeaina o Avemaoe,  ae toe osofa’i mai le lo’omatua, “Avemaoe,fa’alogo lelei mai lava oe, o mea fa’apenei e fai e ma’ua ma Falaniko le tonu, o outou matai, e mo’i lava ua outou matai, ae e le aia outou i mea fa’apenei, o le tama a ma’ua, e pule ai ma’ua i le itu le na, ae ‘aua e te faia maia se tonu, ae ou loto nei lava e ave la’u tama ma ma o i lo’u aiga e fai ai lana fa’aipoipoga, o le mea le na e fai, ‘aua fo’i le faia maia le mea e oso ai lo’u feai, e Avemaoe, “E leai se feau a le tou aiga i la’u tama, pau le mea lea ou te iloa nei, ua na o lo’u pologa i le faiga o fa’alavelave o lo tou aiga, lea fo’i ua pologa atu ai ma la’u fanau, ae ana fa’apea o lo’o matou nonofo i lo’u aiga, e leai ni tulaga fa’apea e tutupu mai, o e fa’alogo mai, ia sipi la’ia o lalo o le isu, ma fa’alogo, pau le na.”

 

Ua na o le lulu o le ulu o le toeaina o Falaniko ma punou, ua iloa lelei e Falaniko le mea ua mana’o i ai le lo’omatua. Fai mai le tala, e ‘ese fo’i le galue o le lo’omatua o Susitina i totonu o le aiga o Falaniko, o mea uma o le aiga e le mafai ona fa’aletonu ai le lo’omatua, mai lava o talavou se ia o’o mai ina matua.

 

A’o le isi itu, a le tagolima le lo’omatua i aso la, e va’ai mai nai ona matua ma ona tuagane o lotulotu atu, e sa’ili se mea e fai ai fa’alavelave o le aiga o Falaniko. O lea la e sisi ai le fu’a a le lo’omatua o Susitina i totonu o le aiga o Falaniko, ae maise o le matai o le aiga le toeaina o Avemaoe.

 

Fai mai le tomumu le leoa a le matai o Avemaoe, “Leaga lava le lo’omatua, ua pei o se sauai a’itu, po’o le a le mea na le ave ai e le sunami lea na sau ma avatu ai, ua tiga taliga ma mafaufau o tagata i nei ituaiga lo’omatutua fa’apenei.”

 

E faia pea...