Ads by Google Ads by Google

Molimau lutena kovana, ma nisi, soifua tautua o Faleomavaega


Ni isi o sui o le aiga o Faleomavaega Eni Hunkin i le taimi na sauni ai mo le momoliina atu o ata o Faleomavaega i totonu o le maota o le Lee Auditorium, ao lumana’i ai le sauniga lotu e aloaia ai lana tautua i le atunu’u i le vaiaso na te’a nei. [ata AF]

Ni isi o le atunu’u na lolofi atu e molimauina le sauniga lotu e aloaia ai le tautua a le tofa a Faleomavaega Eni Hunkin i le vaiaso na te’a nei i le maota o le Lee Auditorium i Utulei, e aofia ai ma le afioga i le Tama a le Malo ia Aumoeualogo Teo Fuavai. [ata AF]
ausage@samoanews.com

E felanulanua’i saunoaga a molimau e to’a 11 na fa’afofoga i ai le to’atele na fa’atumulia le maota o Lee Auditorium i le aso Tofi o le vaiaso na te’a nei, e fa’atatau i le soifua tautua atoa ai ma le soifua galue o le tofa a Faleomavaega Eni Hunkin, i le taimi o le sauniga lotu e aloaia ai lana tautua i le atunu’u, lea na molimauina e le to’atele o ta’ita’i o le atunu’u, uo ma aiga fa’apea ai le atunu’u lautele na lolofi atu e fia auai i lenei sauniga taua.

 

E pei ona taua e le afioga i le Kovana le tumau ia Lemanu Palepoi Peleti Mauga i lana molimau e fa’apea, “O Faleomavaega, o le lupe o le foaga ua toe fo’i mai e tautua le atunu’u i soo se matata”, ae na taua e le susuga a Adney Reid, o le Peresetene o le LDS Pago Pago West Stake i lana molimau e fa’apea, “O Faleomavaega sa soifua i se soifuaga e fiafia e tautua i le malo, atunu’u, aiga ma le Ekalesia, o ia fo’i o se Tama sa pito sili ona naunau e ave lona taimi e tautua ai lona aiga”.

 

Na molimauina e le mamalu o le au valaaulia le eseese uma o nota o molimau ta’itasi sa mafai ona fa’afofoga i ai, i uiga eseese ma amioga sa soifua ai Faleomavaega mai lava i lona tuputupu a’e i lona aiga seia oo ina avea o ia ma ta’ita’i sa fai ma fa’ata’ita’iga lelei mo Amerika Samoa uma i totonu o vaega ‘au a le malo tele, totonu o le konekeresi fa’apea ai le malo o Amerika Samoa.

 

E muliga le matagofie o molimau sa fa’afofoga i ai le au valaaulia i le matagofie o le teuteuina o le maota sa fa’atinoina ai le sauniga, ina ua fa’alauiloa le tele o ona ata i le pito i luma o le maota, ae si’omia e ula laumaile, lea na puaina lo latou manogi ma mafai ai ona momoli mai le feau taua e fa’atatau i le ituaiga tautua sa mafai ona ofoina atu e Faleomavaega mo lona aiga, atunu’u ma le malo tele o Amerika Samoa.

 

“O ia o se tasi e mimita i lana aganu’u, e fiafia e fa’alauiloa o ia o le Samoa, o ia fo’i o se totino o atumotu eseese o le Pasefika, e fiafia e pese ma fa’afiafia i lana gagana, o se tasi fo’i o Tama e agamalie i le tele o taimi tusa lava poo se tagata e le masani ai, ae naunau lava e talanoa ma fefa’asoaa’i”, o se vaega lea o le molimau a Lemanu.

 

O ni isi o ta’ita’i o le atunu’u sa auai i le sauniga lotu a Faleomavaega, e aofia ai le afioga i le Fa’amasino Sili ia Michael Kruse, o se tasi sa galulue fa’atasi ma Faleomavaega i le ofisa i le konekeresi ao avea ai le afioga ia A. U Fuimaono ma ulua’i sui o Amerika Samoa i le konekeresi a Amerika.

 

Sa auai fo’i le faletua o le ali’i fa’amasino sili, o le afioga i le Failautusi o le Ofisa o Mataupu Tau Samoa, afioga Mauga Tasi Asuega ma lona faletua, o le afioga i le ali’i senatoa ia Tilo Vasaga, fa’apea ai ni isi o tamali’i o le atunu’u e pei o le afioga ia Aumoeualogo.

 

Sa auai fo’i le afioga i le ali’i senatoa ia Faiivae Iuli Godinet, o le sa galulue ma Faleomavaega mo le tele o tausaga, lea fo’i sa avea ma ta’ita’i o le Ofisa o Faleomavaega i Amerika Samoa.

 

Sa fa’apea fo’i ona auai ni isi o sui o le Fono, sui o le kapeneta a le kovana, o uo ma aiga atoa ai ma i latou na naunau e fa’aaoga le avanoa e auai i le molimauina o le soifua galue o Faleomavaega.

 

O le tele o molimau sa mafai ona fa’afofoga i ai le aofia, o molimau e fa’atatau i galuega tetele ma le matagofie sa faia e Faleomavaega mo le atunu’u, aemaise ai matatia tetele sa ia fa’atula’i i lona soifuaga galue, e pei o le avea ai o ia lutena kovana ao talavou lona soifua, ona o le naunau lava e fia tautau le atunu’u na soifua mai ai.

 

O lona tomai ma le agava’a na foa’i atu e le Atua na mafai ai ona ia fa’atino lana tautua i soo se vaega o le malo tele, o lana tautua i Amerika Samoa, ae fa’ai’u ai i lana tautua i le konekeresi.

 

O isi sa molimau e fa’atatau i le soifua galue o Faleomavaega e aofia ai le afioga i le ali’i senatoa ia Faiivae, o le afioga i le ali’i senatoa ia Tilo, o Lydia Faleafine-Nomura, Pulu Ae Ae Jr, Vaitinasa Dr. Salu Hunkin Finau, Mitzie Jessop Ta’ase, Fa’auifono Vaitautolu, Mary Taufete’e ma Tasi Tuitele.