Ads by Google Ads by Google

Mana’omia tulafono puipuia ai soona fa’atau o taumafa eseese i faleoloa


Sui o le Matagaluega o le Soifua Maloloina ia Papalii M. Fitisemanu ma Onosa’i Aulava i le taimi na molimau ai i luma o le maota o sui i le taeao ananafi, e fa’atatau i le tulaga o loo i ai le tautua a le Ofisa mo le puipuia o le soifua maloloina o le atunu’u. [ata AF]
ausage@samoanews.com

Na taua e le sui o le Matagaluega o le Soifua Maloloina ia Papali’i Marion Fitisemanu i luma o le Komiti o le Soifua Maloloina a le maota o sui i le taeao ananafi, le mana’omia lea o le latou galulue fa’atasi ma le Fono Faitulafono, i le fausia o se teuteuga i le tulafono e mafai ai ona fa’atonutonu le fa’afitauli lea o loo maitauina le alia’e mai i le tele o faleoloa i le atunu’u, o le soona fa’atau ai o taumafa o loo gaosi mai e tagata ta’ito’atasi i tua i aiga, ina ia mautinoa o loo mulimuli ta’i nei gaioiga uma ma ala o le tulafono.

 

O le iloiloga sa valaauina e le Komiti o le Soifua Maloloina a le maota o sui, i lalo o le ta’ita’iga a le afioga i le ali’i faipule ia Vesi Talalelei Fautanu Jr, sa fesiligia ai le tulaga ua i ai tapenaga a le Soifua Maloloina mo le fa’amamaina o le atunu’u mai puipuia o fa’ama’i pipisi e pei o le zika virus ma le dengue fever lea ua toe pipisi mai, atoa ai ma le tulaga o loo i ai asiasiga i fale’aiga i totonu o aoga, faleoloa ma fale’aiga eseese i le atunu’u, aemaise ai o oloa o loo fa’atauina i totonu o faleoloa i totonu o le atunu’u, poo talafeagai ma le tulaga lo latou aoga.

 

O sui o le Soifua Maloloina sa molimau i le iloiloga e aofia ai Papali’i ma le susuga ia Onosa’i Aulava.

 

I le tulaga o le fa’amamaina o le atunu’u mo puipuiga o fa’ama’i pipisi e pei ona atugalu i ai afioga i Faipule, na fa’amanino e Papali’i le galulue fa’atasi o le Soifua Maloloina ma Pulenu’u i nu’u ma itumalo, mo le fa’amalosia lea o galuega o le fa’amamaina o le lapisi, ina ia mautinoa e le toe i ai se vaipanoa e mafai ai ona ta’atia solo se vaega e faigofie ona to’a ai le suavai ma tuu fua ai namu o loo feavea’iina siama o loo mafua ai nei fa’ama’i pipisi.

 

E ui fo’i i le to’alaiti o le aufaigaluega, ae o loo latou fa’atinoina lava le mea sili e ala i le fa’amulimuli o isi a latou galuega taua, ae ave le fa’amuamua i le fa’amamaina o le lapisi i le motu atoa, ae maise lava i afioaga o loo to’atele i latou o loo masalomia le a’afia i auga o lenei gasegase.

 

I tulaga i le asiasia o fale’aiga ma faleoloa eseese uma i le atunu’u, na taua e Papalii le fa’aauau pea o lea tautua a le Matagaluega, e ui ua tau le vaaia ni a latou faasalalauga mai le au fa’asalalau e fa’atatau i le aofa’i o faleoloa ma fale’aiga o loo asia ma tapunia pe afai e le ausia tulaga maualuga e tatau ona i ai le saogalemu.

 

“O le vaiaso na te’a nei e 3 isi faleoloa ma fale’aiga sa matou tapunia, ina ua maua i asiasiga e le o ausia tulaga lelei e tatau ona i ai, e le o muta la matou tautua i lea itu taua ae o loo fa’aauau pea”, o le saunoaga lea a Papali’i.

 

I le 4 tausaga talu ai e pei ona toe manatua e Papali’i i lana molimau, sa matua fa’amalosia ai e le Soifua Maloloina le asia lea o faleaiga ma faleoloa uma i le atunu’u, ona o le manatu e fa’amalosia tulaga i le saogalemu o le atunu’u, e ala i le fa’atonuina lea o pisinisi ina ia toe fa’aleleia nofoaga eseese o loo kuka ai taumafa ma gaosi ai oloa mo le fofoga taumafa o le atunu’u.

 

Talu mai le 4 tausaga talu ai e oo mai i le taimi nei, ua maualuga le tulaga ua i ai le soifua maloloina o le atunu’u, ina ua fa’aleleia fale’aiga ma faleoloa o loo mafai ona fa’atau atu i ai taumafa, ae le o taofia ai lava le fa’aauau pea o le tautua a le matagaluega i aso ta’itasi.

 

O ni isi o fa’afitauli e pei ona taua e afioga i Faipule, o taumafa o lo o fa’atau solo i faleoloa e aunoa ma ni laisene pisinisi a tagata o loo gaosia ia ituaiga taumafa e pei o lumpia, sushi, sanuisi, ma isi lava taumafa o loo tele ina fa’atau e fanau aoga, aemaise ai fo’i oloa i totonu o faleoloa e pei o pusa moa atoatoa e tatala ae tu’u pepa e le faioloa ona fa’atau lusi lea i tagata fa’atau, pe o tausisia i nei faiga tulafono tau i le soifua maloloina.

 

I tulaga i taumafai e pei o loo la’u atu e tagata ta’ito’atasi ma fa’atau i faleoloa, na taua ai e Papali’i lo latou galulue ma le Ofisa o le Loia Sili i le tau fa’amautuina o suiga i le tulafono, lea fo’i e mana’omia ai le fesoasoani a le Fono e ala i le pasiaina o lea tulafono, ina ia tuu atu ai le malosi i le ofisa e mata’ituina ai tulaga e pei ona atugalu i ai faipule.

 

O ni isi o fa’afitauli ua molimauina i le taimi nei e pei ona saunoa Papali’i, o le to’atele o tagata ua naunau e fa’atau a latou oloa ae mumusu e fai ni laisene fai pisinisi, e le gata fo’i i lea, ua aga’i fo’i la latou vaai i le soifua maloloina o tagata o loo fa’atinoina galuega i totonu o faleoloa ma fale’aiga, ian ia mautinoa o loo malu puipuia le saogalemu o le atunu’u mai taumafa o loo latou fetagofi i ai.