Ads by Google Ads by Google

Fesuia’i fualaau fa’asaina ma meaai mai totonu o le JDC


[ata: archive]
ausage@samoanews.com

O ni isi o tu’uaiga fa’asaga i Leoleo e to’afa ia sa galulue i le Falepuipui o Tamaiti i Tafuna, le Juvenile Detention Center (JDC) lea na fa’amalolo i le tausaga na te’a nei ina ua alia’e le ripoti na tu’uina atu e le Pule o le JDC i le Ofisa o le Komesina o Leoleo, o le gaoia mai lea o meaai mai totonu o le falepuipiu ae fa’afesuia’i ma fualaau fa’asaina e la’u atu i totonu o le nofoaga.

 

O loo taua i le ripoti le ulufale fa’amalosi o se tasi o Leoleo ma se pagota i totonu o le potu o le Pule o le JDC, atoa ai ma le ulufale fa’amalosi i totonu o le potu o loo teu ai sapalai o meaai, ae aveese mai le tele o meaai ma le fa’amoemoe e fesuia’i ma fualaau fa’asaina.

 

O loo taua fo’i le aveese mai e se tasi o Leoleo o mau fa’amaonia mai totonu o le potu o loo teu ai mau fa’amaonia i le JDC, atoa ai ma le talepe lea e le Leoleo o le loka o le pusa sa loka ai meatotino a pagota e pei o telefoni fa’apea ai ma tupe, ma e oo mai i le taimi nei, ua le toe i ai se loka o le pusa e mafua mai i le taimi na fa’aleagaina ai e se tasi o Leoleo.

 

O ni isi o vaega o le ripoti o loo taua ai le telefoni o se tasi o Leoleo i matua o se tasi o ali’i pagota i le leva o le po, e mai e piki atu le la tama i le falepuipui ae ave i le fale latou te tafafao ai, ae o le autu atoa o lea gaioiga sa faia e le Leoleo, ina ia maua mai ai se tupe e fa’atau ai fualaau fa’asaina, ae ina ua leai se tupe na maua atu i le ulugali’i, sa maitauina ai le ita o le Leoleo.

 

Talu ai e leai se ta’avale a le ulugali’i, la te fa’anoi i se tasi o a laua uo mo le la ta’avale e momoli mai ai i laua i le falepuipui, ona vili lea o le taxi latou te o ai ma le la tama i le fale, ina ia aua ai nei iloa e ni isi le la tama lea ua tatala atu i tua i le po.

 

O loo taua atili i totonu o le ripoti se fa’amatalaga a se tasi o ali’i pagota ina ua fesiligia e le Pule o le JDC, e fa’atatau i po ia e masani ona latou o ai ma se tasi o Leoleo ma ave se fasi faga’au ma se atigi kalone, ona latou malaga lea i nofoaga eseese o loo paka ai ta’avale e aofia ai ma le malae va’alele i Tafuna, ona fa’atonu lea e le Leoleo ali’i pagota e o e mimiti mai kesi mai tane kesi o ta’avale o loo paka solo ai, ae ave ua utu i totonu o le ta’avale a le ali’i Leoleo o loo paka i le nofoaga autu a le JDC.

 

O se tasi o vaega o le ripoti o loo taua ai le fa’ataga lea e Leoleo o ali’i pagota e to’alua e o i tua mai le toese i le leva o le po, ma le fa’amoemoe e osofa’i se tasi o faleoloa i Nu’uuli, ma, i se taimi o le vaveao na toe fo’i atu ai pagota e to’alua i totonu ma le fa’amatalaga ua mae’a ona fa’atino le osofaiga e pei ona fa’atonuina ai i laua e Leoleo e fa’atino.

 

O ni isi o gaioiga o loo taua i le ripoti sa fa’atinoina e Leoleo ma pagota ali’i ma tama’ita’i i totonu o le lotoa, e aofia ai le faia o inugapia i totonu o le falepuipui atoa ai ma fafo i le lotoa, tagofia o fualaau fa’asaina, tatala pagota e o i tua i o latou aiga, tu’u tia’i i pagota le vaaiga o le falepuipui ae alu le Leoleo o loo tiute e momoli isi pagota i o latou aiga, tagofia o fualaau fa’asaina i totonu o le lotoa, atoa ai ma le ave faagaoi o meaai mai le toese ae fesuia’i ma fualaau fa’asaina.

 

O nei gaioiga uma e pei ona taua e le Pulesili o le JDC sa ia saunia le ripoti ia Mara Brown, e le gata ua soli ai le tulafono ae ua atagia mai ai le leai o se malupuipuia i le saogalemu o fanau sa taofia i le falepuipui.