Ua fa’amaonia mai e le Komesina o le Matagaluega o Leoleo le talia aloaia lea e le Ofisa o Leoleo i Honolulu se talosaga sa tu’uina atu i ai, ina ia latou fesoasoani mai i le taumafai e foia le fa’afitauli tau i fualaau fa’asaina lea ua sasao fa’aafi i le atunu’u i le taimi nei, e ala i le faia o ni aoaoga mo ali’i ma tama’ita’i Leoleo o loo galulue i le Vaega e Taulimaina mataupu tau i Fualaau Fa’asaina i le Ofisa o Leoleo (Vice and Narcotics Unit).

“Ua talia e le Ofisa o Leoleo i Honolulu sa’u talosaga sa tu’uina atu i ai, ina ia mafai ona fesoasoani mai le latou Vaega o le Vice and Narcotics Team e faia aoaoga mo a tatou Leoleo o loo galulue i le tatou “Vice and Narcotics Unit”, ina ia mafai ai ona fa’alautele lo latou silafia i auala e foia ai le fa’afitauli o fualaau fa’asaina i totonu o le atunu’u i le taimi nei”, o le saunoaga lea a Le’i i se fa’atalatalanoaga ma le Samoa News i le taeao ananafi.

Na taua atili e le ali’i Komesina e fa’apea, e le o toe umi se taimi ae vaaia loa le aga’i mai o Leoleo mai Honolulu mo le fa’ataunu’uina o lenei a’oa’oga fa’apitoa, ma fa’a faigofie ai loa galuega a le Ofisa o Leoleo i le atunu’u.

E pei ona saunoa le ali’i Komesina, e le fou le fa’afitauli tau i fualaau fa’asaina i le atunu’u, peita’i o lo o galulue pea le Matagaluega atoa i se auala e mafai ai ona foia ma fa’amuta lea tulaga, ona o le manatu lava i le saogalemu o tagata o le atunu’u.

“O lo o ave la’u fa’amuamua i le a’oa’oina lea o Leoleo i auala e fa’atinoina ai a latou tiute i totonu o le Matagaluega, ina ia mautinoa e malu puipuia le atunu’u lautele mai soo se fa’alavelave e ono tula’i mai ma a’afia ai i latou”, o le saunoaga lea a Le’i.

O le fa’afitauli e fa’atatau i fualaau fa’asaina, e le gata e le fou i le atunu’u, ae o lo o fa’aauau pea ona tula’i mai i le atunu’u i le taimi nei, ma o loo molimauina fo’i le to’atele o tagatanu’u o loo molia ma tu’uaia ai e le malo.

I le taimi o le iloiloga e fa’amaonia ai tofiga a le Kovana mo Le’i i luma o le Fono Faitulafono i le amataga o le tausaga nei, sa fautuaina malosi ai o ia e afioga i Senatoa ma Faipule ina ia silasila toto’a i le fa’afitauli lea, ona e le gata o lo o to’atele tagata o le atunu’u o loo a’afia ai, ae o lo o masalomia fo’i le a’afia ai o ni isi o Leoleo o lo o galulue i le Matagaluega.

Ae i le tali a Le’i e tusa ai o ia saunoaga mai le Fono Faitulafono, sa ia taua ai lona galue malosi ina ia fa’amalosia le tulafono ma molia i latou o loo a’afia i nei faiga fa’asolitulafono.

I luma o le Fa’amasinoga Maualuga, o se tasi lenei o mataupu o lo o tele ina atugalu i ai le afioga i le Fa’amasino sili i le tele o taimi e lau ai fa’asalaga o i latou e ta’usala i le umia fa’asolitulafono o fualaau fa’asaina, ona e foliga mai o lo o molia mai e le malo na o i latou o lo o tulei ma fa’atauina atu fualaau fa’asaina, ae le o maua lava i latou o loo aumai ai le sapalai o fualaau fa’asaina.

O ni isi o fuafuaga a le Matagaluega mo le fa’atauaina o le tautua a ali’i ma tama’ita’i Leoleo, e aofia ai le Vaiaso fou lea ua fa’atulaga e fa’apitoa lea mo Leoleo i le atunu’u, e aofia ai le sauniga lotu lea o le a fa’ataunu’uina i le malumalu o le Ekalesia EFKAS i Faga’alu i le itula e 4:00 i le afiafi, e tatala aloaia ai lenei polokalame, sosoo ai loa ma isi polokalame e mulimuli mai e fa’apitoa lea mo Leoleo ma a latou aiga.

Ua valaauina fo’i le atunu’u ina ia auai fa’atasi i le lagolagoina o lenei fa’amoemoe, e fa’ailoa ai lo latou lagolagoina o le tautua a le Matagaluega o Leoleo a le malo.