O se tasi o mataupu na tele i ai fesili a afioga i Senatoa ina ua latou fesiligia agava’a o le tama’ita’i ia Ruth Matagi-Fa’atili, lea ua toe pasia e le Senate i le taeao aanafi e avea ma Peresetene o le Faletupe o Atina’e a le malo, o le auala e malupuipuia ai fa’amaumauga a tagata o loo faia nonogatupe e le Faletupe, mai le aveese mai e tagata ae fa’alauiloa i le atunu’u lautele.

Na fesili le ali’i Senatoa ia Tuaolo M. Fruean i le molimau, pe ua faia se suesuega a lona Ofisa i le mataupu lea na tula’i mai i le taimi ao lumana’i le palota tele a le atunu’u i le tausaga na te’a nei, ina ua fa’asalalau solo e ni tagata fa’amaumauga o nonogatupe a ni isi o le atunu’u, ma ua atagia mai ai tulaga le malu puipuia o a latou fa’amaumauga, ae na tali Matagi-Fa’atili, “ua mae’a ona faia i ai le su’esu’ega ma ua i ai le tagata faigaluega sa fa’amalolo mai ai i lena mataupu”.

Talu ai o le mataupu e pei ona fesiligia e Tuaolo, ua mafua ai loa ona faia ni isi teuteuga i tulafono ma ta’iala a le Ofisa e pei ona saunoa Matagi-Fa’atili, e le mafai ai ona toe soona tago tagata faigaluega i fa’amaumauga a le Ofisa, se’i vagana ai lava i latou ua avea ma Ta’ita’i.

“O le agaga atoa o nei suiga fou, ina ia mafai ai ona malu puipuia fa’amaumauga i nonogatupe a tagata, ma taofia ai le toe tula’i mai o le mataupu e pei ona tulai muamua mai”, o le saunoaga lea a Matagi-Fa’atili.

Na toe fesili Tuaolo i le mataupu e fa’atatau i nonogatupe ua aveesea mai fa’amaumauga a le faletupe (write-off), pe fa’afefea ona tupu lea tulaga, ae na fa’amanino e le molimau e fa’apea, o nonogatupe ua taua ua aveesea mai fa’amaumauga, e fa’aauau pea ona totogi e le tagata le aofa’i o le nonogatupe, ae ua leai se tupe tului.

“E faigaluega i lou Ofisa se tagata e igoa ia Tulaga Stanley”, o le fesili lea a Tuaolo, ae na tali le molimau e leai.

“Ua mafua ona fesili ona o tulaga e pei ona tutupu mai i le taimi o le palota, o le fautuaga, o lea ua mae’a le palota, ae aua ne’i faia fa’aiuga e taui ma sui ai i se tagata, alofa i tagata faigaluega ma le atunu’u, e tatau fo’i ona matua malu puipuia fa’amaumauga a le faletupe, ona e oo lava i le ma aiga fai mai e i ai ma nonogatupe ta’i $1 miliona i le Faletupe, ae ou te ta’utino atu e leai ni ma nonogatupe ma Pa’i i soo se faletupe i le atunu’u”, o le saunoaga lea a Tuaolo.

Na tuli tatao e Paepae Faiai i le tama’ita’i peresetene e uiga i le fesili a Tuaolo, poo suiga ma tulafono ua faia e mafua mai i le mataupu lea na fa’alauiloa ai fa’amaumauga i nonogatupe a tagata i le tausaga na te’a nei, ae na tali le Matagi-Fa’atili “ioe”.

O le igoa o Tulaga Stanley e pei ona fesiligia e Tuaolo, o le igoa lea sa fa’aalu ai se tasi o itulau i luga o fesootaiga tau initaneti, le “Facebook”, lea na fa’aaoga e ni isi e fa’alauiloa mai ai fa’amatalaga eseese e fa’atatau i le faigamalo a Lolo ma Lemanu, e aofia ai ma fa’amaumauga i le nonogatupe a le susuga ia Lepei Fa’aola i le Faletupe o Atina’e.

O le taimi lava na mae’a ai le faiga palota tele a le atunu’u ma toe filifilia ai le faigamalo a Lolo ma Lemanu la te toe ta’ita’ia le atunu’u mo le isi 4 tausaga o loo lumana’i nei, na fa’amuta ai loa fo’i i le taimi lea ma le tautua a le itula a Tulaga Stanley.

O le mae’a ai o le ilolioga a le maota maualuga e pei ona fesiligia ai agava’a o Matagi-Fa’atili, i le iloiloga sa taitaia e le komiti a le afioga i le sui peresetene ia Nuanuaolefeagaiga S. Nua, o ia fo’i lea o le peresetene o le Faletupe o Atina’e, na pasia ai loa o ia i le palota e 16-0 i le taeao ananafi.