Ads by Google Ads by Google

Fa’atonu Ta’ita’i o le Fono ia Motusa fa’asa’o ana saunoaga i le Fono

Le Fa’atonusili o le Soifua Maloloina, tofa Motusa Tuileama Nua  [ata AF]
ausage@samoanews.com

Na lagolagoina e le afioga i le ali’i Peresetene o le Senate le saunoaga a le Fofoga Fetalai o le maota o sui ia Savali Talavou Ale, lea sa tu’uina atu i le Fa’atonusili o le Matagaluega o le Soifua Maloloina a le malo ananafi, ina ia fa’asa’o sana saunoaga i soo se taimi e toe molimau ai i luma o le Fono Faitulafono.

 

O le fautuaga mai Ta’ita’i o le Fono Faitulafono, na tu’uina atu lea i le tofa a Motusa Tuileama Nua i le taimi na iloilo ai le paketi a lona Ofisa i le taeao ananafi, ina ua fa’ailoa e Motusa i se vaega o lana molimau e fa’apea, o lo o faigata ona fa’amalosia e lona Ofisa le tulafono e ave ese ai oloa fa’aletonu o lo o fa’atau e ni isi o faleoloa Asia i le atunu’u, ona o le tele o faleoloa Asia nei, e ui o lo o pulea ma fa’atautaia e tagata mai Asia, ae o i latou o lo o lesitalaina pisinisi ma fa’atautaia tulaga uma o pepa o le pisinisi, o tagatanu’u o le atunu’u, po o i latou o lo o fa’alupe o “Tamali’i ma le au maualuluga” o le atunu’u.

 

O le afioga i le ali’i senatoa ia LeAtualevao Asifoa na ia lagaina le mataupu lenei, e fa’atatau i le tele o faleoloa o lo o pulea e tagata Asia i nu’u i tua, o lo o fa’atau ai le tele o oloa e na o gagana Asia lava o lo o tusia ai i tino o oloa, aemaise ai o ni isi o oloa ua tuana’i le aso e tatau ai ona fa’atau, ae o lo o fa’aauau pea ona fa’atau e le aufai oloa Asia nei i le atunu’u.

 

Na lagolagoina e Motusa le saunoaga a LeAtualevao, ma ia ta’utino ai e fa’apea, o le mea moni lena o lo o tula’i mai i le taimi nei, o lo o i ai pisinisi o lo o pulea e tagata mai Asia o lo o tula’i mai ai le fa’aletonu lea, ae o le fa’afitauli e pei ona maitauina e lona Ofisa, e le gata e le o manino lelei le tulafono po o ai tonu le Ofisa o le malo e tatau ona fa’amalosia le tulaga lea, ae a o atu fo’i sui a lona Ofisa e fa’amalosi le tulafono, ae tuli oso ane i latou o lo o fa’aigoaina o “Tamali’i ma tagata maualuluga” o lo o pulea pisinisi nei, ma fa’a faigata ai ona fa’amalosia le tulafono.

 

Na taua e Savali i lana fautuaga ia Motusa e fa’apea, “Aua ne’i toe faia sau fa’amatalaga fa’apea i luma o le maota, fai mai e le o manino le tulafono po o ai le ofisa e fa’amalosia tulaga i oloa, aemaise ai o tagata maualuluga o lo o pulea pisinisi nei, e le sa’o lau tala lena, o lo o manino le tulafono, o lou ofisa lea ua taoto atu i ai le fa’amalosia o le tulafono i oloa fa’aletonu o lo o fa’atau e pisinisi eseese, ina ia lafoa’i ma fa’aleaga pe afai ua mae’a le aoga”, o le saunoaga lea a Savali.

 

Sa ia fautuaina fo’i ia Motusa ina ia fa’amalosi sa’o le tulafono, o ai lava e taumafai e fa’alavelave, o lo o i ai le tulafono e tatau ona fa’atinoina ina ia foia ai fa’afitauli nei.

 

Na lagolagoina e le afioga i le Tama’ita’i o le Ao ia Gaoteote Palaie Tofau le fautuaga a Savali fa’asaga ia Motusa, ona o lo o fa’afofoga le maota ma le atunu’u e tusa ai o auala o lo o fa’atino ai galuega a le malo.

 

“O lo o manino le tulafono, o le taimi lava e mae’a ai le aoga o le oloa, o le tiute a lo outou ofisa o le aveese mai oloa ua mae’a le aoga ae ave e aai ai manu, ae le o le tuu ai lava i luga o fata o faleoloa e o atu le mamalu o le atunu’u o lo o alala i nu’u i tua e aai ai, e le aai meaai ‘expire’ tagata o lo o nonofo i nuu tua o le atunu’u”, o le saunoaga lea a Gaoteote.

 

Na fa’amalulu le tofa a Motusa i luma o le Komiti So’ofa’atasi a le maota e tusa ai o lana saunoaga sa faia.