Ads by Google Ads by Google

Fa’amuamua malo Pisinisi lotoifale mo fa’atauga o oloa moomia


Faatonusili o le Ofisa Pulea Fa’atauga a le malo, Dr. Oreta M. Crichton [ata AF]
ausage@samoanews.com

Ua tu’uina atu nei e le afioga i le ali’i kovana ia Lolo Matalasi Moliga sana poloaiga i le Fa’atonusili o le Ofisa e Pulea Fa’atauga a le malo, susuga Dr. Oreta M. Crichton, ina ia ave le fa’amuamua a le malo i pisinisi lotoifale e fa’atau mai ai oloa uma e mana’omia mo ana galuega, ina ia fesoasoani ai i le atina’eina o le tamaoaiga fa’apea ai le maua o galuega fou mo tagatanu’u o Amerika Samoa.

 

Na taua e Lolo i lana tusi sa tu’uina atu ia Dr. Crichton i le aso 28 o Iuni e faapea, o se tasi o auala e mafai ona fesoasoani ai i le fa’atupulaia o pisinisi lotoifale, o le fa’aalu lea e le malo o tupe feterale atoa ai ma tupe lotoifale o lo o fa’atau mai ai oloa e mana’omia mo ana galuega i pisinisi o lo o fausia ma atina’e i totonu o le atunu’u.

 

“O vaega tupe uma nei o loo tatou fa’aalu e fa’atau mai ai i oloa mai pisinisi lotoifale, o le a fesoasoani malosi lea i le mauaina o isi avanoa faigaluega mo le aufaipisinisi a le atunu’u, ma o se tulaga e matua talafeagai lava lea tulaga”, o se vaega lea o le tusi a le ali’i kovana ia Dr. Crichton, lea fo’i sa tu’uina atu ai kopi i le lutena kovana ia Lemanu Peleti Mauga, o le Taitai o le Ofisa o le Kovana ia Fiu Saelua, atoa ai ma Fa’atonusili o Matagaluega uma ma Ofisa eseese a le malo.

 

“O le fa’aalu o a tatou tupe e fa’atau mai ai i pisinisi i fafo, o le la’ititi fo’i lea o le avanoa e mafai ai ona ta’amilo nei vaega tupe e fesoasoani ai i le atina’eina o pisinisi lotoifale”.

 

“Ina ia mafai ona aga’i i luma taumafaiga i le fa’aleleia o le atina’e ma le tamaoaiga o le malo, ua tu’uina atu ai le poloaiga ina ia fa’aaoga e le malo pisinisi lotoifale uma lava i soo se taimi e faia ai ana fa’atauga mo oloa o loo mana’omia, ina ia mafai ai ona fesoasoani i le atina’eina o le tamaoaiga ma pisinisi o aiga i le atunu’u, ae se’i vagana lava ua le maua i pisinisi lotoifale oloa o loo sailia e le malo, ona faatoa mafai loa lea ona fa’ataga le faia o fa’atauga mai pisinisi i fafo e ala i tulaga o tauofoga”.

 

“O la tatou galuega muamua lava e tatau ona faia, o le sailia lea o auala e maua ai avanoa faigaluega fou mo tagatanu’u o Amerika Samoa, ma fa’aauau ai pea ona tupu le tamaoaiga i pisinisi ma le atunu’u atoa”.

 

Na taua atili e le ali’i kovana le malamalama lelei o le malo i manaoga e ala ai ona moomia le fa’atau mai o oloa mai pisinisi i fafo, peita’i afai o lo o aofia ai ma pisinisi fa’alotoifale i tulaga e pei ona taua, ona mafai loa lea ona fa’aaoga pisinisi lotoifale e fa’atau mai ai oloa o loo moomia.

 

Sa ia taua fo’i tulaga lelei o le auai o pisinisi mai fafo i le fa’atauina o oloa o loo moomia, ona e mafai ai ona taugofie le tau o le oloa o loo moomia, peita’i i lona taofi, e lelei fo’i le fa’aalu o lea vaega tupe e fesoasoani ai i le tau atina’eina o pisinisi lotoifale, e fesoasoani ai i le faatupulaia o le tamaoaiga o le malo ma le atunu’u.

 

“Fa’amolemole ia tatou faia soo se auala e mafai ai ona si’itia le tulaga o la tatou tamaoaiga, ina ia fesoasoani ai i aiga ma pisinisi i le atunu’u”, o le vaega fa’ai’u lea o le saunoaga a le ali’i kovana.