Ads by Google Ads by Google

Fa’amaonia moliaga o le gaoi & talepe fale fa’asaga i se ali’i 20 tausaga


[ata: archive]
ausage@samoanews.com

O le aso 13 o le masina fou o Iuni lea ua fa’atulaga e tu’uina atu ai le fa’asalaga a le fa’amasinoga maualuga fa’asaga i se ali’i e 20 tausaga le matua mai Amouli, i le mae’a ai lea ona ta’usala o ia i le aso Faraile ua te’a i moliaga mamafa e lua o le talepe fale i le tulaga lua atoa ai ma le gaoi.

 

E tusa ai ma fa’amaumauga a le fa’amasinoga, e 2 tagi sa faila e le malo fa’asaga ia Melvin Kuresa Eteuati. O le tagi muamua na tu’uaia ai o ia i moliaga mamafa e 2, lea e aofia ai le talepe fale i le tulaga lua fa’apea ai ma le gaoi. Ae i le tagi lona lua, e 3 moliaga sa tu’uaia ai o ia, lea e aofia ai moliaga mamafa e lua o le talepe fale i le tulaga lua ma le gaoi, ma le moliaga mama o le fa’aleaga meatotino i le tulaga tolu.

 

I lalo o le maliliega lea na sainia e le ua molia ma le malo ma ua talia fo’i e le fa’amasinoga maualuga, ua malie ai le malo e tali ioe Eteuati i le moliaga o le talepe fale i le tulaga lua mai le tagi muamua, ma le moliaga o le gaoi o loo taua i le tagi lona lua.

 

O tagi e lua a le malo fa’asaga i le ua molia, na afua mai i le fa’alavelave lea na ia osofaia ai ni fale se lua ma le fa’amoemoe e fa’atino ai ni solitulafono i totonu, lea e aofia ai se Fale Mautotogi fa’apea ai ma se Faleoloa, o fale uma a ni ali’i Asia se to’alua.

 

I le tali ioe ai o Eteuati i le moliaga mamafa o le talepe fale i le tulaga lua mai le tagi muamua a le malo, sa ia ta’utino ai e fa’apea, i se taimi o le aso 18 Setema 2016, na ia ulufale fa’amalosi ai i totonu o se Fale Mautotogi ma ia gaoiina ai le tele o meatotino e aofia ai se laptop, o se ato o lo o i ai pepa aoga i totonu, o se tusi folau Filipaina, o uaea o telefoni, fa’apea ai ma se ato tupe sa i ai se tinoitupe e $500 i totonu.

 

Na ta’utino le ua molia, sa ia fa’aaogaina le tinoitupe e $500 sa i totonu o le ato tupe, ae o isi meaaoga uma lava sa alu ma nana i se nofoaga e latalata ane i lona fale, mulimuli ane ina ua fesiligia o ia e Leoleo e uiga i lenei mataupu, sa ia toe fa’afo’iina ai loa meatotino uma nei i Leoleo.

 

Ina ua fesiligia e le fa’amasinoga maualuga o ia poo a ana mea sa fai i meatotino sa ia gaioiga, na tali le ua molia, “e leai se mea, sa na o le tupe na ou fa’aaogaina, ae o isi mea uma sa ou gaoiina na uma ona toe fa’afo’i i Leoleo ina ua su’esu’eina a’u”.

 

Ae mo le moliaga o le gaoi lea na afua mai i le tagi lona lua a le malo, na ta’utino ai le ua molia e fa’apea, i se taimi o le aso 16 Setema 2016 sa ia osofaia ai se Faleoloa ma sa ia gaoia ai se ato tupe, o ni siaki se 2 fa’apea ai ma ni pepa foodstamp. E tusa ai o fa’amaumauga a le fa’amasinoga, e tusa ma le $1,080 le aofa’i o le tupe atoa na gaoia e Eteuati i lana ofofaiga lea.

 

Ina ua fesiligia e le fa’amasinoga maualuga le ua molia poo fea ua ave i ai le tinoitupe, o siaki e 2 ma pepa foodstamp, na ia taua ai i le fa’amasinoga e fa’apea, sa latou fa’aaogaina ma ana uo.

 

I le mae’a ai ona talia e le fa’amasinoga maualuga o tuutuuga uma o le maliliega na sainia e le malo ma le ua molia, na talosaga ai loa le malo ina ia solofua uma isi moliaga o lo o totoe ai i le pepa o tagi sa latou fa’aulu fa’asaga ia Eteuati, lea fo’i na talia a le fa’amasinoga.

 

O se tasi o tuutuuga o le maliliega a itu e lua, o le a le faila e le malo moliaga o le sola ese mai le toese fa’asaga ia Eteuati a o taofia ai o ia i le toese, ae o le a talosaga le malo i le fa’amasinoga ina ia fa’asala o ia i se fa’asalaga mama fa’anofovaavaaia.

 

Na taua atili e le malo e fa’apea, a o fa’agasolo ai iloiloga a le ua molia i luma o le fa’amasinoga fa’aitumalo, na ia tuua ai le fale fa’amasino ma aga’i sa’o atu loa i le maketi e fa’atali ai le pasi e alu i lona aiga i Amouli, ae o le taimi lea o lo o pisi solo ai vaega o Leoleo e tau saili solo le ua molia.

 

Ae ina ua saili atu i lona aiga i Amoauli, sa maua atu ai o ia o lo o i ai, lea na ia fa’ailoa i Leoleo e fa’apea, na mafua ona ia alu i lona aiga ona ua lagona lona fia’ai. O lo o taofia pea Eteuati i le toese i Tafuna e fa’atali ai le aso lea ua fa’atulaga e lau ai lana fa’asalaga.

 

Ua malilie uma itu e lua e finau i le fa’amasinoga mo se fa’asalaga fa’anofovaavaaia mo Eteuati, e aofia ai le tu’uina atu o se fa’asalaga fa’a falepuipui e le mamafa tele, a ia aofia ai ma masina ia ua mae’a ona tuli e le ua molia i totonu o le toese a o fa’atalitali ai taualumaga o lana fa’amasinoga.

 

Ae na fa’ailoa e le fa’amasinoga ia Eteuati e faapea, tusa lava pe finau atu loia mo se fa’asalaga mama, e pule le fa’amasinoga pe talia ia fa’afinauga pe leai fo’i. Ua malamalama fo’i le ua molia, e le mafai ona toe suia lana tali ioe ua tu’uina atu i le fa’amasinoga, pe afai e tu’uina mai se faaiuga a le fa’amasinoga ae le tusa ai ma lona mana’o.

 

O le afioga i le ali’i fa’amasino sili ia Michael Kruse sa taulimaina le mataupu a le ua molia, fa’atasi ai ma le lagolagosua a afioga i ali’i fa’amasino lagolago ia Mamea Sala Jr ma Muasau T. Tofili.