O le alia’e ai o fa’asea mai ni isi o le atunu’u i le mafua’aga na ala ai ona tapunia le paka i le vaiaso na te’a nei i le taeao, ma le mafai ai e matua ona maua le avanoa e fa’atafafao ai fanau, na fa’amanino ai loa e le afioga a Maugaoali’i Leapai Tusipa Anoa’i tulaga uma e fa’atatau i le Paka a le malo i Fagatogo, lea ua tu’u atu le tausiaina ma le vaavaaia i le Pulega a ali’i ma faipule o le afioaga.

O le mataupu lenei na alia’e mai ina ua lomia i le Samoa News ni fa’asea a ni isi o le atunu’u e fa’atatau i le Paka i Fagatogo, ina ua aga’i atu i le vaiaso na te’a nei e fa’aaoga le Paka e fa’atafafao ai fanau ae o loo tapunia le paka i le taeao, fa’atoa tatala lava i le afiafi mo tafaoga.

E le i fiafia le afioga a Maugaoali’i i le ripoti a le Samoa News, i lalo o lona talitonuga o le Paka o loo tatala fa’asoloatoa mo le atunu’u lautele, amata mai i le itula e 6:00 i le taeao e oo atu i le itula e 6:00 i le afiafi.

“Ua lagona lo’u le fiafia ina ua ou maua le tala e fa’atatau i fa’asea a le atunu’u, ma ua atagia mai ai o a’u lea o loo aga’i mai i ai fa’asea, ae tatau fo’i ona fa’asa’o la outou ripoti, e le i tapunia se Paka i le vaiaso na te’a nei i taimi o le taeao, ae o loo tatala fa’asoloatoa lava i le aso atoa”, o le saunoaga lea a Maugaoali’i i le Samoa News, fa’atasi ai ma lana saunoaga e tatau ona fai se fa’asa’oga o le ripoti a le Samoa News, ona e le i tapunia le Paka i le vaiaso na te’a nei.

“O le agaga atoa na mafua ai ona fausia le Paka i Fagatogo, ia i ai se nofoaga fa’apitoa e fa’aaoga e fanau e atina’e ai le tomai i ta’aloga, aemaise ai ia maua le avanoa o matua ma fanau e tafafao ma fiafia ai i taimi eseese o le afiafi”, o le saunoaga lea a Maugaoali’i.

E fa’alua ona asia e le Samoa News le nofoaga o le Paka i Fagatogo i le vaiaso na te’a nei, ma maitauina ai le tapunia o le faitoto’a o le pa. Sa fesiligia fo’i e le Samoa News ni Tama matutua se to’alua sa i ai i le nofoaga o le Paka atoa ai ma le Faleva’a a le afioaga i Fagatogo, ma la fa’amaonia mai ai le tapunia o le Paka i taimi o le taeao, fa’atoa tatala i le itula e 3:00 i le afiafi.

E le i atoa se itula talu ona mae’a le talanoaga muamua a le Samoa News ma le afioga a Maugaoali’i i le telefoni, ae toe valaau mai le Maugaoali’i i le telefoni ma saunoa mai e fa’apea, “Fa’amalulu atu Samoa News, o lea ua manino le mataupu, e sa’o outou, o lea ua ou maua le fa’amatalaga, o le Pulenu’u lea na tu’u i ai le tatalaina o le Paka i taeao uma lava o loo malaga i fafo, ae tu’u le ki i le sui pulenu’u, o iina la lea na mafua ai ona tapunia le Paka i taeao i le vaiaso na te’a nei, ona sa i ai le manatu o le sui pulenu’u e fa’atoa tatala le Paka i le itula e 3:00 i le afiafi, e fa’amalulu atu ai i le atunu’u, ae o lea la ua toe tatala le Paka i le taeao i le itula e 6:00, fa’atoa tapuni lava i le afiafi i le itula e 6:00”.

Ina ua toe asia e le Samoa News le Paka i Fagatogo i le aso Gafua na te’a nei, na vaaia ai le tumu o tafaoga a matua ma fanau i le taeao, o se vaaiga e lei tupu i le vaiaso na te’a nei, lea na mafua ai ona fa’asea ni isi o le atunu’u.