E 2 vaiaso o lo o fa’agasolo ai se poloketi fa’apitoa o lo o fa’atautaia e le afioga a Tapumanaia Galu Satele Jr ma lona aiga, mo le tu’u fa’atasia lea o meaalofa fa’apea ai tupe e fesoasoani ai i aiga o tagata faigaluega a le kamupani tu’uapa a le Samoa Tuna Processor (STP), lea o le a le toe maua ni a latou galuega pe afai ae tapunia le auaunaga a lenei kamupani tele i le atunu’u i le fa’aiuga o le tausaga nei.

I se fa’atalatalanoaga a le Samoa News ma le afioga a Tapumanaia i le vaiaso nei e uiga i lenei poloketi, sa ia fa’aalia ai le mafua’aga autu na ia manatu ai e tu’u fa’atasia lenei fa’amoemoe ina ia mafai ai ona fesoasoani i nai matua fa’apea ai a latou fanau o le a a’afia.

“Ao o’u tau mafaufau poo le a se ituaiga polokalame e afai ona ou faia e a’oa’oina ai se lesona aoga mo si a’u fanau i lenei vaitaimi fa’ai’u o le tausaga, sa ou manatua ai nai tagata faigaluega o le STP lea o le a fa’amuta a latou galuega i le aso 15 Tesema pe afai ae tapunia le tautua a le kamupani, ma ou mafaufau ai loa, o le a matou fa’atinoina se poloketi ma la’u fanau e fesoasoani atu ai i fanau a matua uma o le a a’afia pe a tapunia le kamupani”, o le saunoaga lea a Tapumanaia.

“O le agaga atoa la o le poloketi, o le sailia lea o ni meaalofa mo nai fanau, fa’apea ai fo’i isi ituaiga fesoasoani e mafai ona maua mai e le atunu’u o loo i ai le agaga e fia fesoasoani mo i latou o le a a’afia, ina ia foa’i mai i le poloketi lea ua fa’aigoaina o le ‘Pay it forward Toy Drive Project,” o le saunoaga lea a Tapumanaia.

E le i leva ona amata le poloketi ae ua molimauina le to’atele o faleoloa, pisinisi faapea ai le mamalu lautele o le atunu’u ua fa’ailoa lo latou lagolagoina o lenei fa’amoemoe, e ala i lo latou ofoina mai o meaalofa faapea ai ma foa’i tupe e fesoasoani ai i aiga o le a a’afia ona o galuega.

O ni isi o faleoloa ua mafai ona fa’aavanoa totonu o latou fale e fa’atutu ai kalone ia ua fa’amoemoe e lafo i ai meaalofa ma soo se foa’i, ina ia fa’a faigofie ai i le atunu’u o lo o i ai le agaga o le fia fesoasoani.

“Talu ai o le vaitau lenei o le agaga foa’i ma le ofoina atu o meaalofa, ua ou manatu ai, o se avanoa lelei lenei mo le atunu’u atoa e fa’aalia ai lou agaga fia fesoasoani mo fanau ma aiga o le a a’afia, ae afai fo’i e le mafai ona e fesoasoani pe foa’i mai i lenei poloketi, e mafai lava ona e sailia se tasi poo se aiga o lo o fia maua se fesoasoani e te foa’i ma e agalelei i ai, o le agaga atoa lenei o le polokalame”, o le saunoaga lea a Tapumanaia.

O le aso 5 e oo atu i le aso 17 Tesema lea o lo o fa’agasolo ai lenei polokalame, ma tufatufaina ai loa meaalofa i le aso 19 Tesema, e ala i le fa’ailoa e tagata faigaluega a le STP o a latou pine e fa’amaonia ai o i latou o tagata faigaluega, ma tu’uina atu pepa tui e fa’amaonia ai le aofa’i moni o latou fanau, ina ia mafai ai ona maua meaalofa mo fanau.

“E pei ona ou fa’ailoa atu, o le mafua’aga autu na ou manatu ai matou te amataina lenei poloketi ma si a’u fanau, ia mafai ona maua e nai fanau o le a le toe maua ni galuega a latou matua ni meaalofa mo le kerisimasi o lenei tausaga”, o le saunoaga fa’ai’u lea a Tapumanaia.