Ads by Google Ads by Google

Fa’afetaia tagata matutua le malo i le amanaiaina o i latou


Faatumulia le maota o Tupulaga Talavou i Pago Pago i Tama ma Tina matutua na lolofi atu e molimauina le latou polokalame fa’apitoa mo lenei tausaga, lea na tapenaina e le faigamalo a Lolo ma Lemanu. [ata AF]
ausage@samoanews.com

E na o lagona o le fiafia ma le fa’afetai na mafai ona fa’aleo e le to’atele o Tama ma Tina matutua i le taeao o le aso Tofi, i le mae’a ai lea ona tauaao o a latou meaalofa na saunia e le faigamalo a Lolo ma Lemanu, ina ua tatalaina le polokalame a Tagata Matutua mo le Kerisimasi i le taeao ananafi.

 

Na taua e se sui sinia o le Ofisa o Tagata Matutua (TAOA) i le Samoa News le silia i le to’a 200 tagata na matutua na mafai ona auai i le polokalame o lenei tausaga, lea e aofia ai i latou ua mae’a ona lesitala i lalo o fa’amaumauga a le TAOA, fa’apea ai ma le to’atele e le o lesitalaina o latou suafa.

 

O ni isi o vaaiga sa molimauina e le to’atele i le taeao ananafi, ina ua amata gasolo atu tama ma tina matutua mo le amataina o le latou polokalame i le maota o Tupulaga Talavou i Pago Pago, o le taimi lava e ta mai ai pese Samoa e le Faili, o le taimi fo’i lea e vaaia ai ni isi o Tama ma Tina matutua ua sisiva ma fa’afiafia solo i totonu o le maota.

 

“O le agaga lava o lenei tausaga, o le fa’afetaia lea o le malo i le fa’aauau pea lea o le amanaiaina o i matou o tama ma tina matutua o le atunu’u. Ua le tasi ae ua atulasi polokalame eseese ua saunia e le malo e fa’ailoa ai lo latou amanaiaina o tagata matutua i le atunu’u”, o le saunoaga lea a le Tama matua ia Lafaele Faiva, 76 tausaga le matua o Lauli’i.

 

Na taua atili e le susuga a Lafaele i le Samoa News e fa’apea, soo se taimi na te maua ai ni meaalofa mai le malo, e lagonaina ai e lona loto le fiafia ma le fa’afetai, ina ua amanaia e le malo lona tagata fa’atauva’a.

 

“E le o mea o lo o i totonu o le meaalofa e taua, e le o le lapo’a fo’i po o le laititi o le meaalofa e aoga, ae o le itu taua, soo se taimi ou te maua ai se meaalofa mai le malo, ou te lagonaina ai le taua o lo’u tagata, ina ua amanaia e le malo i matou o tagata matutua”, o le saunoaga lea a Lafaele, o se tasi o tama sa tautua i le galuega fa’a faiaoga mo le 35 tausaga.

 

Ae na taua e le Tina matua ia Leilani Apelu, 81 tausaga le matua o Utulei e fa’apea, o se taimi muamua lenei ua ia molimauina ai se Kovana, o sona faletua ma le Kapeneta ua o mai fa’atasi e tufa taumafa ma meaalofa i tagata matutua.

 

“O taimi uma lava ou te vaaia ai le kovana ma le lutena kovana ma o la faletua, aemaise ai o afioga i Fa’atonusili ua aga’i mai e tufa taumafa ma meaalofa mo tagata matutua, e na o le maligi o loimata ma ou fa’apea ane, o ai i matou o tagata matutua ua fa’aeleelea ai le ta’ita’i o le atunu’u”, o le saunoaga lea a Leilani.

 

Sa ia taua atili fo’i e fa’apea, e ui i le tele o le mau manaoga o lo o fetaia’i ma le malo, atoa ai ma le anoanoa’i o lu’itau o lo o fa’aauau pea ona fetaia’i ma le faigamalo a Lolo  ma Lemanu i lenei 4 tausaga, ae o lo o molimauina pea lo la tutu fa’atasi e fa’aauau le la polokalame o le ave lea o le fa’afetai i tagata matutua i tausaga uma, atoa ai ma le saunia o meaalofa eseese mo i latou.

 

E silia i le 200 meaalofa na tapena e matagaluega eseese uma a le malo, ma le fa’amoemoe e tufatufa atu mo tagata matutua i le taeao ananafi. O le tele o nei meaalofa e aofia ai taumafa ma mealofa aoga mo le aiga e pei o seti ieafu ma solo, atoa ai ma isi meaalofa e pei o toaster, auli ma le anoanoa’i o meaaoga mo le aiga.

 

Na taua e se o sui fa’atonusili i le Samoa News e fa’apea, o le tele o mealofa a le latou matagaluega, sa fa’ataulagaofo mai lava e tagata faigaluega ma le fa’amoemoe e fai meaalofa ai i tagata matutua o le atunu’u i lenei tausaga.

 

“O le agaga atoa o lenei masina, o le ofoina atu lea o se mealofa mo se tasi e pele ia te oe, poo se isi fo’i o lo o mana’omia le fesoasoani, atonu o le agaga atoa lena ua mafua ai ona naunau tagata faigaluega e fa’atino mealofa eseese nei e fai meaalofa atu ai i Tama ma Tina matutua o le atunu’u i lenei tausaga”, o le saunoaga lea a le susuga i le ali’i Fa’atonusili ia Ali’itama Sotoa.