Ads by Google Ads by Google

Fa’afetai aloaia Jeremiah Masoli i le lagolago a Amerika Samoa


Le susuga ia Jeremiah Masoli ma sui o lana au malaga, faapea ai le Fa’atonusili o le Matagaluega o Tupulaga Talavou, Tina ma Tama’ita’i ia Jonathan Fanene ma sui o lona Ofisa, fa’apea ai le faiaoga o le au Football a le aoga maualuga a Leone, susuga Oakland Salave’a, i le mae’a ai o le polokalame sa fa’agasolo mo le aoga a Leone i le taeao ananafi. [ata AF]

Le susuga ia Jeremiah Masoli ma sui o lana au malaga fa’atasi ai ma fanau aoga mai le aoga maualuga a Leone e aofia ai ma faiaoga, fa’apea le afioga i le Fa’atonusili o le Matagaluega o Tupulaga Talavou, Tina ma Tama’ita’i sa lagolagoina malosi lenei polokalame, afioga Jonathan Fanene, i se aso mulimuli o le polokalame sa fa’atinoina i Leone i le aso ananafi. [ata AF]

Le taimi na fa’afetai atu ai le faiaoga a le aoga Football a le aoga maualuga i Leone, susuga Oakland Salave’a ia Jeremiah Masoli ma sui o lana au malaga, e tusa ai o le polokalame sa fesoasoani atu ai i fanau aoga a le aoga i Leone i le taeao ananafi. [ata AF]
ausage@samoanews.com

Ao lei toe malaga ese atu le susuga ia Jeremiah Masoli ma lana aumalaga ma le atunu’u i le po anapo, sa ia fa’aalia i se fa’atalatalanoaga ma le Samoa News lona agaga fa’afetai i le lagolago sa mafai ona tu’uina atu e fanau aoga ma faiaoga, fa’apea ai le Matagaluega o Tupulaga Talavou, Tina ma Tama’ita’i, i le lagolagoina lea o le polokalame sa latou fa’atinoina mo aoga maualuluga uma i le atunu’u i le vaiaso atoa na te’a nei, lea na fa’ai’uina i le taeao ananafi i le aoga maualuga i Leone.

 

O le vaiaso atoa na te’a nei na fa’agasolo ai e le susuga ia Jeremiah Masoli ma lana au malaga fa’apitoa mai Amerika, se polokalame o aoaoga mo fanau aoga mai aoga maualuluga a le malo, e fesoasoani ai i le fa’atauaina o tu ma aganuu a Samoa, o le fa’amalosia o tulaga tau aoaoga mo fanau, aemaise ai o le fesoasoani lea ina ia fa’alautele lo latou silafia i le ta’aloga Football.

 

“O le agaga atoa o le polokalame e pei ona matou malaga mai ai la’u au malaga, o le ofoina mai lea o le fesoasoani i fanau a Amerika Samoa, ina ia fa’amalosia i latou i le aoga atoa ai ma le fesoasoani e fa’alautele lo latou silafia i le ta’aloga football, le ta’aloga ua to’atele alo ma fanau a Amerika Samoa ua manuia ai i totonu o Amerika”, o se vaega lea o le saunoaga a Masoli, o se tasi o alo o le atunu’u ua lauiloa i le ta’aloga football a Amerika.

 

“O le agaga fiafia ia te a’u ma la’u aumalaga ina ua matou molimauina le to’atele o fanau aoga fa’apea ai ma faiaoga sa mafai ona tali fiafia mai e lagolagoina la matou polokalame, ma ua oo mai ai le lagona o le naunau lea e toe fo’i mai i le lumana’i e fa’aauau atili pea lenei polokalame mo fanau aoga a le atunu’u”, o le saunoaga lea a Masoli.

 

Na fa’amanatu e Masoli i fanau aoga le taua o le fausia lelei o le fa’avae o latou olaga, aua o i latou o loo fa’amoemoe i ai le lumana’i o aiga, nu’u, ekalesia, malo ma le atunu’u atoa.

 

O le polokalame atoa sa fa’agasolo e le susuga a Masoli ma lana aumalaga, sa lagolagoina malosi e le Matagaluega o Tupulaga Talavou, Tina ma Tama’ita’i a le malo, i lalo o le ta’ita’iga a le Fa’atonusili, le susuga a Jonathan Fanene ma lana aufaigaluega.

 

I se fa’atalatalanoaga ma Fanene i le taeao ananafi, na taua ai e le afioga i le ali’i Fa’atonu lona lagona fiafia ina ua mafai ona ofo atu e lana aufaigaluega la latou fesoasoani e lagolago ai i le polokalame a le susuga ia Masoli ma lana aumalaga, mo le fa’ataunu’uina lea o le latou polokalame sa malaga mai ai.

 

I le avea ai o le susuga a Fanene o se tasi o tama fanau a le atunu’u ua tele tausaga o taalo i le NFL ma malolo litaea mai ai, sa ia fa’afetaia ai le susuga a Masoli ma lana aumalaga, i lo latou naunau lea e ofo mai lo latou tomai, taimi , atoa ai ma le tamaoaiga e fesoasoani ai i le atina’eina o le lumana’i o tupulaga talavou a le atunu’u.

 

Saunoa Fanene e fa’apea, o galuega lelei o loo fa’aauau pea ona fa’atinoina e le toatele o alo a Samoa o loo taaalo i Amerika e pei o Troy Polamalu ma Masoli, lea ua toe fo’i mai i le atunu’u ma ofo mai le fesoasoani mo fanau aoga, o se ata vaaia lea o le fiafia o i latou e toe fa’afo’i mai le agaga fa’afetai ia Amerika Samoa ma ona ta’ita’i, e tusa ai o le tapuaia o a latou faiva ao fai ai latou ma sui o le atunu’u i ta’aloga i fafo.

 

O le po anapo na toe malaga atu ai i Amerika le susuga ia Masoli ma lana aumalaga, ma le fa’amoemoe o le a toe taliu mai i le atunu’u i le tausaga fou mo le toe fa’aauauina o lenei polokalame taua.