O le fa’ateia o le afioga i le ali’i fa’amasino ia Fiti Sunia i le taeao ananafi i le talosaga a le tama’ita’i loia fautua ia Kate Hannaher, lea o lo o tula’i mo ali’i pagota e to’alua o lo o tu’uaia i le fa’alavelave lea na la fasi fa’amo’amo’a ai se isi ali’i pagota i le fa’aiuga o le tausaga na te’a nei, mo se avanoa e toe tolopo ai le mataupu ai laua o loo molia, ona o lea ua latou sauni ma le malo e toe sui moliaga e tu’uaia ai ali’i o loo molia, na poloaina ai loa e Sunia le malo ina ia fa’amanino atu le tulaga tonu o le a oo i ai lenei mataupu i le isi iloiloga i le taeao nei.

O le taeao ananafi na fa’atulaga e faia ai le ulua’i iloiloga o le mataupu a Mosegi Solia Jr ma Reggie Va’avale, mo le iloiloina lea e le fa’amasinoga o mau a le malo o le a tu’uina atu, pe lava ia mau e fa’amaonia ai sa i ai se vaega o le tulafono sa soli, ae o i laua fo’i ua molia o lo o tu’uaia i le soliina o le tulafono.

Na talosaga ia Hannaher i luma o le fa’amasinoga mo se avanoa e toe tolopo ai le mataupu a Solia Jr ma Va’avale, e fa’atali ai le maliliega lea ua sauni itu e lua e fa’atinoina ma le fa’amoemoe e suia ai moliaga fa’asaga i lenei mataupu.

Na umi se taimi na fa’aalu e le afioga a Sunia e toe fa’amalamalama ai ia Hannaher ma le loia a le malo ia John Bengelly auala e fa’atautaia ai galuega a le fa’amasinoga, aemaise lava pe afai ua mae’a ona fa’atulaga le taimi ma le aso e faia ai ulua’i iloiloga o mataupu fa’asaga ia i latou o lo o molia i moliaga mamafa.

Na fa’ailoa e Sunia i loia a itu e lua e fa’apea, e pule le Fa’amasinoga i le fa’atonutonuina o lana kalena, ina ia mautinoa e ofi uma ai i totonu mataupu ua mae’a ona fa’atulaga mo iloiloga i aso ta’itasi.

“O le ulua’i iloiloga (preliminary examination hearing) lea ua fuafuaina e faia i le taeao nei (taeao ananafi), e le faia ai ni maliliega pe sui ai ni moliaga, ae iloilo ai e le fa’amasinoga mau a le malo, pe lava ma totoe mau e lagolago ai sa soli se vaega o le tulafono”, o le saunoaga lea a Sunia e tau toe fa’amalamalama ai i Loia la’asaga i le fa’atinoina o galuega a le fa’amasinoga.

“Pau le malosi o lo o i ai i le Fa’amasinoga lenei, o le iloilo lea pe lava mau e lagolago ai sa soli se tulafono, o se isi fuafuaga i tua atu o le mataupu lenei, e le i ai la le tulaga lena i o’u luma i lenei taeao (taeao ananafi)”, o le isi lea saunoaga a Sunia.

Na toe fa’amanino e Hannaher e fa’apea, o ni isi o fuafuaga o lo o talanoa i ai itu e lua, e aofia ai se taumafaiga a le malo ina ia toe faia ni suiga i le fa’amatalaga o le tagi ua mae’a ona latou fa’aulu fa’asaga ia Solia Jr ma Va’avale.

O le itula e 8:30 i le taeao nei lea ua fa’atulaga e toe valaau ai lenei mataupu ma le tuutuuga a le fa’amasinoga, afai e toe faia se suiga i le pepa o le tagi ua mae’a ona fa’aulu e le malo, ia fa’amanino atu e itu e lua i le fa’amasinoga poo fea o le a fai i ai moliaga mamafa ia na ulua’i fa’aulu fa’asaga i ali’i o loo molia, pe afai o suiga ua fuafua itu e lua e faia e le o aofia ai ni moliaga mamafa.

O Solia Jr ma Va’avale o loo tu’uaia i le moliaga mamafa o le fa’ao’olima i le tulaga lua, e mafua mai i le fa’alavelave lea ua tu’uaia ai i laua e le malo, i lo la fasi fa’amo’amo’a lea o le ali’i o Muaiga Siatiu poo Povi e pei ona iloa ai e le to’atele, ma manu’a tigaina ai ona foliga, i se vevesi na tula’i mai i totonu o le toese i Tafuna i le tausaga na te’a nei.

O manu’a na a’afia ai Povi e aofia ai le ta’e i le itu agavale o lona ulu, ma le isi ta’e i lona mata taumatau, lea na mana’omia ai filo e tapuni ai ia manu’a.

O le ali’i pagota o Povi o loo tu’uaia i lona faia o uiga mataga i se teineititi e 5 tausaga le matua, ma ua fa’amoemoe o le masina o Fepuari e toe valaau ai lana mataupu i luma o le fa’amasinoga maualuga.