Na matua fa’ateia le teineititi pologa o Ianeta i le fa’amatalaga a le Tupu lea fa’atoa mae’a atu, ma ua le iloa e le teineititi se isi fa’amatalaga na te toe faia, se’i vagana ai lona punou i lalo ma ona loimata, ua lagona fo’i lona fefe ona o lea ua tau vavala mai i lona mafaufau, e le o ia o se afafine moni a lona grandfather e pei ona fa’amatala mai e le Tupu ia te ia, ae o ia o le teineititi na aumai i le falema’i. Ao punou Ianeta ma le le mautonu o lona mafaufau, na fa’afuase’i ona toe talanoa atu le Tupu ia te ia ma fa’apea atu, “Vaai oe Ianeta, o lou olaga atoa i totonu o lou aiga na e ola a’e ai ou te malamalama uma i ai, aua o aso uma ou te asiasi atu ai i lou grandfather, sa ou vaaia lona alofa fa’amaoni ia te oe, ma ua avea ai oe o se tasi o le aiga e ui i upu ma tala fai mai e le o oe o se suli moni, ae i totonu o le loto o lou grandfather, o oe lava o le suli moni”. E lei uma lelei mai le fa’amatalaga a le Tupu ae toe oso atu le teineititi o Ianeta ma lana fesili fia malamalama, “Fa’amolemole lau afioga a le Tupu, sa e iloa pe aisea na oti ai lo’u Tina moni na ou fanau mai ai i lenei lalolagi i le taimi na ou fanau mai ai, ma mafua ai loa ona tausia a’u e lo’u Tina”, o le fesili fia iloa lea a le teineititi o Ianeta i le Tupu, ae na taua e le Tupu e faapea, “Na pau le tala na ou maua, o le mamafa o galuega sa fa’aee i luga o lou Tina ao avea ai ou matua ma tagata pologa i totonu o le malo, na mafua ai ona oo le vaivai i lona tino ma i’u ina maliu ai i le aso na e fanau mai ai”.

“Ae fa’alogo mai oe Ianeta, o lea ua mae’a ona ou fa’alogologo atu i lau talanoa mai e tusa ai o Meki ma ana auauna na malaga mai mo oe, atoa ai ma lou naunau e te fia nofo i lo’u malo e avea ai oe ma pologa, ae fa’asa’oloto ia Meki ma ana auauna, ae o le a faia se ta malologa se’i mae’a le vaiaso ona ta talanoa lea i totonu o le maota, ma avatu ai se fa’aiuga mautu e tusa ai o lou fanoga”, o le fa’amatalaga lea a le Tupu ona ia tula’i loa lea ma savali atu ua fa’atalofa i le teineititi pologa o Ianeta ma fai atu i ai, “Fo’i atu ia oe i lou potu e te malolo ai mo aso e 5 o loo totoe o le vaiaso, ona toe maua ai loa lea o se isi a ta feiloaiga, o le a fa’atonu fo’i auauna ina ia fesoasoani atu ia te oe i soo se taimi e te mana’omia ai se fesoasoani, ma tali atu i soo se mea e te mana’o i ai, afai fo’i e i ai se mea e te fia fesoota’i atu ai i le maota o le Tupu, ia logo soo se auauna, ae mo Meki ma ana auauna, o le a fa’aauau pea ona taofia i le fale o loo taofia ai i le taimi nei, o loo lelei fo’i ona tausi ma fafaga e auauna, e fa’atali ai la taua feiloaiga o loo loma nei, ona iloa ai loa lea o le taunuuga o i latou, poo se taunuuga i le manuia, poo se taunuuga e fano ai”, o le upu mulimuli lea a le Tupu i le teineititi o Ianeta, ona tulai atu fo’i lea o le teineititi ma fa’afeiloa’i i le Tupu ma aga’i atu loa i fafo ma alu i lona potu o loo fa’amautu ai.

E savali fua Ianeta ae ua ese lava ona lagona i lea taimi, e foliga mai ua tau vavala mai tulaga manuia o lona nofo ai i totonu o le malo o le Tupu agalelei lenei o Eteuati II, e atagia mai i lana talanoa le i ai o le loto alofa ia te ia, aemaise ai, o le igoa lea o loo fa’aigoa ai o ia, o le igoa o le afafine o le tupu. E lei lelei se moe a le teineititi pologa i le po atoa lea, e fai o le mamafa ia te ia o le la talanoaga mulimuli ma le Tupu lea ua loma nei, ae o lona alofa fo’i ia Meki ma ana auauna o loo taofia fa’apagota i totonu o le malo o Eteuati II, ona o le taumafai e fa’asa’oloto ia te ia. O le mafatia tele o le loto o le teineititi na afua ai ona fa’afuase’i ona moe i luga o le nofoa fa’amalu o loo i totonu o le potu ma i’u ina moe gase atu ai lava, ae na fa’afuase’i ona ala i luga ina ua ia fa’alogoina le tu’i tu’i atu o le auauna ia te ia, ma lona tatala atu o le faitoto’a, o le auauna lea ua alu atu ma lana taumafataga o le taeao, fa’atasi ai ma se teutusi o loo i ai se tusi mo ia, fai mai o le tusi na aumai i le maota o le Tupu.