Ads by Google Ads by Google

E LE O OE O SE SULI MONI - Vaega XXII

Na tali atu Ianeta ma le agaga fa’aaloalo i le Tama’ita’i Leoleo e ala i lona ata atu i ai ma fa’apea atu, “ua ou sauni ou te ulufale atu i le maota o le ali’i Pule”. Talu ai o le taimi o le po lea na taunu’u ane ai Ianeta ma ali’i tino lelei e to’alua na momoliina ane o ia i le lotoa lea ua aumau ai nei, na faigata ai i le teineititi ona ia maitauina foliga o le nofoaga, peita’i i le taimi na la savavali ane ai ma le Tama’ita’i Leoleo e aga’i atu i le maota o le ali’i Pule o le nofoaga, na fa’ateia ai Ianeta i foliga o le nofoaga, e atagia mai o se nofoaga e pulea e se tagata milionea o le atunu’u, e to’atele ana auauna, toe to’atele fo’i tagata pologa e nonofo ma galulue ai. “Ianeta, ulufale atu loa i le faitoto’a lena e fa’asaga mai i ou luma, ma fa’aauau ai pea lau savali seia e taunu’u i le vaega o le a faia ai le lua feiloaiga ma le ali’i Pule”, o le fa’atonuga lea a le Tama’ita’i Leoleo lea sa la savavali to’alua atu ma Ianeta, ona aapa atu loa lea o le teineititi pologa ma tatala le faitoto’a ae ulufale i totonu o le maota o le ali’i Pule, ma o se itu na matua maofa ai le teineititi pologa i le taimi na ulufale ai i totonu o le maota, sa ia maitauina ai le matagofie o le fale, o lona tino atoa i totonu e fausia i le auro.

 

O le faitoto’a muamua lava na tau atu ai le teineititi pologa i totonu o le maota, o loo tu mai ai se ali’i talavou lalelei ma lona toniga e atagia mai ai o ia o se tasi o auauna a le ali’i Pule. E lei taunu’u atu Ianeta ae ua fa’afeiloa’i mai e le ali’i lea le teineititi pologa. “Talofa Ianeta, ua vaaia lou laufofoga fiafia i lenei taeao, atonu ua tulimata’i lau vaai i le lua feiloaiga ma le ali’i Pule o lenei nofoaga”, o le fa’amatalaga lea a le auauna, lea fo’i sa tali atu i ai le teineititi pologa, “Ioe lau susuga, ua ou sauni ma te feiloa’i ma le ali’i Pule, ma se’i fa’ailoa mai le mafua’aga o lo’u oo mai i lenei nofoaga”. Na tatala e le ali’i auauna le faitoto’a ae fa’aulufale loa Ianeta i totonu o le potu lea ua fuafua e feiloa’i ai ma le ali’i Pule o le nofoaga. E lei umi ona saofa’i Ianeta i luga o lona nofoa ae tatala mai loa le faitoto’a i le isi itu o le potu, ma ia vaaia ai se Tamaloa maualuga tino lelei toe maluali’i ua aga’i ane ma fa’afeiloa’i ia te ia ma ona foliga fiafia ma fa’apea atu, “Talofa Ianeta, ua leva ona ou fia feiloa’i atu ia te oe, ae ua lagona lo’u fiafia ina ua mafai ona fa’ataunu’uina la ta feiloa’iga i lenei aso”.

 

Ua amata le talanoaga a le ali’i Pule o le nofoaga ma le teineititi o Ianeta, ma o lea fa’atoa malamalama ai fo’i Ianeta i le mafua’aga tonu na ala ai ona aveese fa’amalosi mai o ia mai le nofoaga sa nofo muamua ai, ina ua maua i ripoti le taumafai o le ulugali’i o Meki ma lona to’alua faiaoga o Lucy e aveese mai o ia mai le fale o le fafine saua o Mekala ma lona to’alua, ae avatu i se isi nofoaga e nofo filemu ai. “Ianeta, e leai se eseesega o oe ma isi tagata uli uma o loo fai ma pologa i totonu o le malo lenei, aemaise ai le nofoaga atoa lenei o tagata pologa, o oe fo’i o le isi teineititi pologa e pei fo’i o i latou nei, e le o oe o se suli moni o se aiga”. O le fa’amatalaga lea a le tamaloa o Etimani na matua fa’ateia ai le loto o le teineititi meauli ma atili ai lava ona fa’anoanoa lona loto. “E pei ona faia i soo se tagata pologa fou e ulufale mai i le aai lenei, e muamua lava ona fa’amasani i tulafono ma vaega eseese o le nofoaga, ona fa’atoa tu’u aloaia atu ai loa lea o ia e ulufale ai i le nofoaga fa’apitoa lea o loo nonofo fa’atasi uma ai tagata pologa”, o le fa’amatalaga lea a le tamaloa o Etimani na mafua ai ona toe fesili le teineititi, “Aisea ua aveese mai ai fua a’u mai le nofoaga sa ou nofo pologa ai, e sili atu lo’u fiafia ou te mafuta i le nofoaga lea, ua ou masani i lona ea ma a’u galuega e fai, ae o lenei nofoaga, ou te le fia nofo ai, e to’atele tagata pologa e nonofo ai, atonu o le a ese fo’i le auala latou te vaai mai ai ia te a’u, o le mea lea lau susuga Etimani, fa’amolemole, pe mafai ona toe fa’afo’i ai lo’u aiga”.