Ads by Google Ads by Google

E LE O OE O SE SULI MONI

Vaega 38

 

Na umi se taimi o fasi tigaina ma fa’apologa e le fafine meauli saua lea na tau atu i ai le teineititi o Ianeta ia le teineititi, ma lafo i ai upu fa’amomoi loto ia te ia, i le mae’a ai lea ona ia fa’alogologo i le fa’amatalaga umi sa tu’uina atu e le teineititi e tusa ai o lona oo mai i totonu o le malo o le Tupu o Eteuati II, ma lona talitonuga o loo i ai, e le o ia o se teineititi e tatau ona avea ma pologa. Na ona mae’a lava o faiga saua a le fafine meauli lea i le teineititi, ona ia fa’atonuina loa lea o le teineitiiti e savali i tua i le vaega o loo i ai le umukuka e kuka ai meaai a tagata pologa, e amata ona tafu le afi ma tapena le kukaina o meaai mo tagata pologa ia o le a toe fo’i ane i le nofoaga pe a mae’a fa’afiafiaga o loo faia. E ui ua lagona e le teineititi o Ianeta le tiga ma le vaivai o lona tino i faiga saua a le fafine lenei, ae sa ia tula’i pea ma fa’amalosi e usita’i i le fa’atonuga lea ua tu’uina atu ia te ia. Manatua fo’i, o lea ua silia i le 5 tausaga talu ona aumai le teineititi o Ianeta i totonu o le malo o tagata pologa, ma ua aga’i ina tagata matua o ia, ua iloa fo’i auala eseese e fa’atino ai le mamafa o galuega ma feau e tu’uina atu ia te ia.

 

Ua malu ane le afiafi ae o loo punou lava le teineititi o Ianeta i le kukaina o meaai mo tagata pologa pe a toe fo’i ane, ma ua amata fo’i ona solo solo lelei a laua talanoaga ma le fafine meauli lea na muamua fa’asaua ma sasa ia te ia. Na mua lava ona pisi Ianeta i le tau fa’avelaina o meaai mo tagata pologa, na mafua ai ona galo i lona loto le fai lea ma vaai i tafatafa o le fale i tagata pologa pe a gasolo atu, peita’i na fa’ateia o ia i le isi taimi ina ua fetaui lava lona ea a’e i luga ae tau lana vaai i le to’atele o tagata o loo latou siomia le umukuka o loo kuka ai lana meaai ma matamata atu ia te ia. Ua lagona e le teineititi le fefe ma le popole o lona loto ona o lea ua foliga mai ua aga’i uma atu le to’atele o tagata pologa e vaavaai i ana galuega o loo fai. E lei umi ae ona vaaia loa le fafine meauli saua lea sa ia sasa ma futi lona ulu ua savali atu i le umukuka ma tu’u atu lona lima i luga o lona tauau, ona ia faliu lea i le vaega o loo laulaututu mai ai le to’atele o tagata ma fa’ailoa i ai e fa’apea, “O Ianeta lea, o se tasi o totino o lo tatou aiga o tagata pologa ua mafai ona fa’aopoopo mai i lenei nofoaga, o lea lea ua ou tofia e fesoasoani ia te a’u i le kukaina o meaai mo le nofoaga i soo se taimi tou te malaga ai e fa’atino galuega mamafa i totonu o le malo”. O le fa’amatalaga lea a le fafine meauli lenei na vaaia ai le tau fai pati o tagata ma feei i le fiafia, ina ua mafai ona fa’aopoopo atu se isi tagata fou i le nofoaga.

 

O se po ese lea i le olaga o Ianeta talu ona ola mai i lenei olaga, talu fo’i ona taunu’u i le nofoaga fou lenei o tagata pologa, ona o lea fa’atoa moe lava i se nofoaga e taua o le nofoaga o tagata pologa, e le gata e momoe i tama’i fale e ato i atigi pusa ae fola i vaovao, ae o se taimi muamua fo’i lea o lona olaga ua ia molimauina ai le maualalo ma le mativa toe eleelea o le olaga e ola ai tagata pologa. Sa le maua se moe lelei a Ianeta i lea po, ua toe fafagu mai i lona loto aso e tele ao nofo i le aiga o le fafine saua o Mekala ma lona to’alua, e ui i le mamafa o galuega sa ia fa’atinoina i na aso, ae sa mafai lava ona ia ola fiafia ma maua mea uma e mana’o i ai, e lei fa’aigoaina fo’i o ia o se tagata pologa, peita’i o lea ua i’u ina nofo i le aai o tagata pologa ma ola pei o se pologa, ua ia iloa ai le uiga moni o upu sa masani ona fai atu e le fafine saua o Mekala ia te ia, e le o ia o se suli moni o le aiga o lona Tina, ae o ia o le pologa.