Ads by Google Ads by Google

E LE O OE O SE SULI MONI

Vaega 52

 

Ao malaga pea le ta’avale, sa mafai ona iloa e Lucy le umi o loo totoe ona taunu’u lea i le falema’i lata ane o loo latou tulituli atu i ai, e mafua mai i laupapa o loo tusia ai fa’ailoilo i lugao le auala, lea o loo fa’ailoa mai ai le aofa’i o maila o loo totoe ona taunu’u lea i lea nofoaga ma lea nofoaga. “Toe tasi le maila o loo totoe ona tatou taunu’u loa lea i le falema’i”, o le alaga leotele atu lea a Lucy i le ali’i ave ta’avale ae fa’afuase’i loa ona fa’alogoina le alu o le ta’avale ma pei e tau feto’i le ola, e foliga mai ua i ai se fa’aletonu ua tupu. “O le a le mea ua tupu”, o le oso vave atu lea o le fesili a Lucy ma lona fatu ua amata ona tata vale i le popole, ae na tali mai le ave ta’avale, “Pei lava ua uma le kesi o le ta’avale”. Na pei o se mauga e solo mai ma tanumia ai le nu’u atoa lagona ua oo ifo i le loto o Lucy, ona o lea ua ia mautinoa afai e pe le ta’avale i luga o le auala, o le taunuuga fo’i lea o le ola o le teineititi pologa o Ianeta lea o loo taoto fa’agaulua i luga o le nofoa o le ta’avale, ua le toe gagana mai i se upu, ua le toe i ai lava fo’i se isi gaioiga e mafai ona toe faia i ai, se’i vagana lava o le tu’u atu i aao lavea’i o ali’i ma tama’ita’i foma’i. O le umi lava na gata ai le malosi o le alu a le ta’avale ina ua pe na tu ai loa fo’i iina ua le toe minoi. Na pei o le emo o le mata gaioiga a auauna e to’alua i le taimi lea, i lo la tulioso lea i fafo ma la taumafai e ave i fafo le teineititi pologa o Ianeta ona la amoina loa lea ma savavali aga’i i luma ma le fa’amoemoe ia taunu’u vave i le falema’i a’o le’i tula’i mai se fa’aletonu i lona ola. Talofa e i le naunau atu mo se fesoasoani, pe tusa o le itula talu ona savavali ma malolo auauna ae o la vaaia loa le falema’i lata ane o loo tu mai i luga o se mati’e, ae o loo si’omia e le tele o fale ma pisinisi i lea aai.

 

I le tala fa’asolopito o lea aai, o se taimi muamua lea ua latou molimauina ai se tulaga fa’apea, o se tagata e amo e isi tagata e to’alua, ae ina ua malamalama tagata o le aai i le uiga o le vaaiga lea ua latou molimauina, sa tulioso ane loa ma fesoasoani i le amoina atu o le tino o le teineititi o Ianeta i le falema’i mo se togafitiga. “Fa’amolemole lau susuga a le teine toma’i, ua mana’omia lava se fesoasoani mo Ianeta, o loo tulaga pagatia lava lona gasegase i le taimi nei”, pau ia o upu na mafai e le isi auauna ona gagana atu i ai, ona toe koma lea se’i tau to lelei lona sela, ae ua pisi nei foma’i i le fa’atinoina o le latou galuega masani. Se taimi mulimuli ane i lea lava afiafi na mafai ai loa ona fa’atasi atu Lucy i le falema’i ma latou tapuaia ai ma auauna le tulaga o le gasegase o Ianeta lea ua pisi ai nei ali’i ma tama’ita’i foma’i e tau togafitia. O le silia ai i le 5 itula talu ona taunu’u Ianeta i le falema’i, na mafai ai loa ona savali ane le ali’i foma’i o loo fa’auluulu i ai le sifi o lea afiafi ma fa’ailoa ane ia Lucy ma ana auauna le tulaga o le gasegase o Ianeta. “Talofa Lucy, ou te iloa o loo outou fia maua se fa’amatalaga e tusa ai o le gasegase o Ianeta, o lea ua mae’a ona faia su’esu’ega i le mafua’aga o lona gasegase, ma o loo moe o ia ma malolo i le taimi nei i le mae’a ai lea ona tu’u atu i ai vailaau e tau fesoasoani ai i lona tino, ae o le siama lea ua a’afia ai Ianeta, o se siama e mafua mai i le fesootaiga o tagata ma meaola, e le mafai fo’i ona tineia lea ituaiga ma’i se’i vagana ua maua mai le vailaau faapitoa lea o loo fa’aaogaina i le nofoaga o loo tausi ma nonofo ai tagata pologa i le malo o le Tupu o Eteuati II, ona fa’atoa mafai lea ona tineia lenei siama, ae afai e le maua mai, o le a aga’i atu lona soifua maloloina i se tulaga pagatia ma i’u ina ma’imau ai lona ola”. E lei talia gofie e le fafine o Lucy le tulaga lea ua fa’ailoa ane e le ali’i foma’i, o lea na ia toe fesili atu ai i le ali’i foma’i, “E i ai la se isi auala e mafai ona matou faia ina ia fa’asao ai le ola o si a’u tama o Ianeta fa’amolemole”, ae na tali le ali’i foma’i, “Ia outou saili mai le vailaau o loo i totonu o le nofoaga o tagata pologa e togafiti ai Ianeta”.