Ads by Google Ads by Google

Amata aloaia le fa’amasinoga iloilo a Siaosi Laulu


[ata: archive]
ausage@samoanews.com

O le taeao ananafi na amata aloaia ai le fa’amasinoga iloilo a le susuga a Siaosi Laulu, i luma o le Vaega Iloilo Iuga e to’a 2 ali’i ma tama’ita’i e to’a 5, lea o le a latou iloiloina ma se fa’aiuga o le mataupu e pei ona tu’uaia ai Laulu e le malo.

 

O moliaga mamafa e fa o lo o tu’uaia ai e le malo ia Laulu e aofia ai le moliaga o lona faia o amioga fa’asotoma i se tama’ita’i, tagofia o itutinosa o se tama’ita’i e le fa’aipoipo i ai, fa’apea ai ma moliaga e lua o le talepe fale i le tulaga muamua ma le tulaga lua.

 

O le afioga i le ali’i fa’amasino ia Elvis P. Patea o loo fa’atautaia taualumaga o lenei mataupu, fa’atasi ai ma le lagolago a afioga i ali’i Fa’amasino Lagolago ia Mamea Sala Jr ma Tunupopo Faleafaga.

 

O le ali’i loia ia Bob Pickett o lo o tula’i mo le itu a le malo ae o le ali’i Loia Fautua mo tagata lautele ia Douglas Fiaui o lo o tula’i mo Laulu, lea o lo o taofia pea i le toese i le taimi nei e fa’atalitali ai se fa’aiuga o lana mataupu.

 

E tele itu na folasia e le loia a le malo i le vaega iloilo iuga, e tau fa’ataoto ai le alafua o le mataupu o lo o tu’uaia ai Laulu, e mafua mai i le fa’alavelave lea na tula’i mai i le taeao o le aso 7 Tesema 2015 i Nu’uuli, lea o lo o tu’uaia ai o ia i lona ulufale fa’amalosi i totonu o le potu o le fale mautotogi sa mautotogi ai le tama’ita’i na a’afia ma lana uo tama i le taimi lea, ma ia faia ai uiga mataga i le tama’ita’i na a’afia ina ia fa’amalie ai lagona tu’inanau o loo ia te ia.

 

Na taua e le malo le talepe e Laulu o le faitoto’a o le potu ma fa’amalosi ai loa ona ulufale i totonu, ma ia maua atu ai le tama’ita’i na a’afia o loo i luga o lona moega, o lea na ia tago atu ai loa ma una’i o ia i lalo ae taumafai loa e faia i ai uiga mataga e aofia ai lona tagofia o lona itutinosa, peita’i sa tafiti le tama’ita’i na a’afia i lona taumafai e tete’e ese atu le ua molia ma amata ai loa ona faia a laua tauiviga i luga o le moega.

 

Na taua e le malo i lana ulua’i folasaga e fa’apea, ao faia tauiviga a le ua molia ma le tama’ita’i na a’afia, sa fai le tala a le ua molia e fa’apea, “O le a ou aia nei lou itutinosa ona fa’atoa ou alu ese ai lea”. Na avea le tauiviga ma itu na pau atu ai le ua molia i autafa o le moega, ma maua ai loa lona avanoa e sola ese ai.

 

Na logo e le tama’ita’i na a’afia ana uo ma fa’ailoa i ai le fa’alavelave sa tupu, ma latou fa’atali atu loa se’i manava atu lana uo tama o loo faigaluega, ma faila ai loa le ripoti i le Ofisa o Leoleo.

 

Ao lei tula’i mai le fa’alavelave lea i le aso 7 Tesema 2015, na taua e le malo le tele o isi gaioiga mataga o loo tu’uaia le ua molia sa ia faia i le tama’ita’i na a’afia, talu mai lava le ulua’i taimi na fa’atoa taunu’u ai le tama’ita’i na a’afia ma lana uo tama i le fale lea na tula’i mai ai le fa’alavelave.

 

O le fale na tula’i mai ai le fa’alavelave e pei ona taua e le itu a le malo, o se fale i Nu’uuli e mautotogi ai tagata ma o se potu i le fogafale i lalo e nonofo ai Laulu ma lona to’alua.

 

E pei ona taua e le malo e fa’apea, o le aso muamua lava talu ona taunu’u le tama’ita’i na a’afia ma lana uo tama i le fale mautotogi lea, ae amata loa ona latou masani ma Laulu ma lona to’alua ma amata ai le latou masaniga, ae o le atoa ai o le 2 vaiaso talu ona latou mafuta ma masani ae tula’i mai loa le fa’alavelave muamua, ina ua fa’afetaui e Laulu le tama’ita’i na a’afia ma tauanau la te momoe, peita’i sa fai i ai le tama’ita’i e soia.

 

Talu mai lea taimi, sa fa’aauau pea ona faia e le ua molia uiga mataga nei i le tama’ita’i na a’afia e fa’ailoa atu ai ona lagona tu’inanau, ma o isi taimi na te tagofia ai lona itutinosa pe toso fo’i lona lima ma tauanau la te momoe, seia oo i le aso 13 Novema 2015 ina ua faia se fiafia o le aso fanau a le tama’ita’i na a’afia i le Paka Liona, lea fo’i sa valaaulia uma ai tagata o loo mautotogi i le fale e aofia ia Laulu ma lona to’alua, na tula’i mai ai fo’i se isi fa’alavelave iina ina ua tago le ua molia i le itutinosa o le tama’ita’i na a’afia ao tilotilo atu i ai lana uo tama ma ni isi o laua uo.

 

Ae na taua e le loia a Laulu ia Fiaui i le vaega iloilo iuga e fa’apea, o le tagi fa’asaga ia Laulu, o loo fa’avae i luga o tu’uaiga sese ma le anoanoa’i o le mau fa’amatalaga, e aunoa ma ni mau fa’amaonia e mafai e le malo ona latou tu’uina atu e lagolago ai le tagi fa’asaga i le ua molia.

 

Na taua atili e Fiaui e fa’apea, e leai ma ni ata na pu’eina e Leoleo e fa’ailoa mai ai unaoa poo ni maosia i le tino o le tama’ita’i na a’afia, e fa’amaonia ai sa faia se la tauiviga ma Laulu, e leai fo’i ni ata na pu’eina e fa’ailoa mai ai le faitoto’a o le potu na talepe ae ulufale fa’amalosi le ua molia i totonu, poo ata fo’i o ni mea sa fa’aleagaina i totonu o le potu i le taimi o le solitulafono, e o o fo’i i se ripoti mai le falema’i e fa’ailoa mai ai se suega sa faia i le tino o le tama’ita’i na a’afia pe fa’amaonia sa tagofia e le ua molia, e leai fo’i se mea sa faia e le malo.

 

“17 masina o fa’atali Laulu ia te outou tou te tu’uina mai se fa’aiuga amiotonu e uiga i lenei mataupu, pe a mae’a ona outou iloiloina ma le toto’a mau fa’amaonia uma o le a tu’uina atu, ma outou aumaia ai le fa’aiuga e le nofosala le ua molia i tu’uaiga uma ua faila e le malo fa’asaga ia te ia, aua o lenei mataupu atoa, o loo fa’avae lea i luga o le mau fa’aupuga ma fa’amatalaga, e aunoa ma ni mau fa’amaonia e lagolagoina ai le tagi a le malo”, o le saunoaga lea a Fiaui.

 

Na taua atili e Fiaui e fa’apea, i le taeao o le aso 7 Tesema 2015 e pei ona taua e le malo, na manava atu ai le ua molia mai lana galuega sa galue sifi po, ma alu atu ai ua taele ma moe loa i totonu o lona potu pe tusa o le itula e 8:00 i le taeao.

 

Ae tusa o le itula e 11:00 i le taeao lava lea, na te’i ai ina ua tu’itu’i atu le tama’ita’i o loo tu’uaia na a’afia i lona potu ma fesili atu pe mana’o i se saimini, sa tali atu i ai le ua molia ioe, o lea na alu atu ai loa le tama’ita’i i lona potu ma aumai saimini ma tu’u atu ia Laulu.

 

O le mae’a ai ona ‘ai o le saimini a Laulu, na aga’i atu ai loa i le potu a lana uo ma lona to’alua ma matamata ata ai, o iina fo’i lea na maua atu ai o ia e Leoleo ma aumai ai loa ma fesiligia e uiga i lenei mataupu.

 

O le taeao nei i le itula e 9:00 o le a toe fa’aauau ai lenei mataupu.