Ads by Google Ads by Google

Aloaia e le Fono Faitulafono le tautua a Faleomavaega Eni Hunkin


Le taimi na tutula’i fa’aaloalo ai afioga i Faipule e aloaia ai le soifua galue o le tofa a Faleomavaega Eni Hunkin, i le mae’a ai lea ona latou pasia o le iugafono a le Senate e aloaia ai le tautua a Faleomavaega i le atunu’u. [ata AF]
ausage@samoanews.com

O le vaiaso nei lea na pasia ai e le Fono Faitulafono se i’ugafono a le Senate, e aloaia ai le tautua a le tofa a Faleomavaega Eni Hunkin i lona aiga, itumalo, atunu’u ma le malo, ma momoli atu ai lagona fa’amaise i lona aiga ona o le tuua o le malo e lenei ta’ita’i ua tele tausaga o tautua i le malo.

 

O le faaiuga o le vaiaso ua te’a na lagomau ai le tofa a Faleomavaega i lona aiga i Provo i Utah, lea fo’i sa fa’atasi atu i ai ni isi o ta’ita’i o le atunu’u e aofia ai le afioga i le ali’i kovana ia Lolo Matalasi Moliga.

 

O le aso Lulu na te’a nei na pasia ai e le maota maualuga la latou i’ugafono, ae o le taeao ananafi na pasia ai e le maota o sui, ma faia ai se tula’i fa’aaloalo a le maota o sui e fa’ailoa ai lo latou aloaia o le tautua a lenei ta’ita’i iloga o le atunu’u.

 

O lo o taua i totonu o lenei iugafono le tele o galuega sa mafai ona fa’atinoina e Faleomavaega mo Amerika Samoa, ao avea ai o ia ma Faipule i le Konekeresi a le malo tele mo le umi e 26 tausaga sosoo, talu mai le tausaga e 1989 seia oo mai le 2015.

 

O lona soifua aoaoina na amata atu lava i lona afioaga na soifua mai ai i Vailoatai, ma fa’asolo atu ai lava i le setete o Hawaii ma oo atu ai i Amerika, seia oo ina fa’auuina o ia mai fa’ailoga maualuluga mai Iunivesite sa a’oa’oina ai o ia.

 

Sa avea fo’i o ia ma fitafita mo vaega ‘au a le malo tele o Amerika, e pei ona tau ai o ia i le taua i Vietnam, ma toe fa’aauau ai lona soifua a’oa’oina seia oo i le aso 30 Tesema 1971 lea na fa’aipoipo atu ai i lana manamea ia Hinanui Bambridge Cave.

 

Na amata lona olaga tautua ina ua galue i le Ofisa o le ulua’i faipule a Amerika Samoa i le Konekeresi ia A.U. Fuimaono mo tausaga e 6, ao le’i toe taliu mai i lona atunu’u mo le fa’aauauina o lana tautua.

 

O ni isi o itu o loo taua i lana tautua e aofia ai tausaga e 7 sa tautua ai i totonu o vaega ‘au a le malo tele o Amerika, ao le’i toe taliu mai ma filifilia ai loa o ia e avea ma Lutena Kovana o le atunu’u i le la nofoaiga ma Kovana Aifili Paulo Lutali ina ua 42 tausaga o lona soifua, mulimuli ane fa’ae’e atu e lona aiga i Leone le suafa o Faleomavaega ia te ia ma fa’aauau ai lava lana tautua i lona aiga, nu’u ma le atunu’u, ma i’u ina filifilia ai loa o ia e avea ma sui o Amerika Samoa i le konekeresi a Amerika mo nofoaiga sosoo e 13.

 

Ao tautua ai i le fono a le malo tele i Uosigitone, e tele galuega sa ia fa’atinoina mo Amerika Samoa, e aofia ai le tele o iloiloga eseese sa talanoaina ai mataupu aoga mo lona atunu’u sa ia taitaia, atoa ai ma lona finau lea i ni alagatupe fa’aopoopo mo Amerika Samoa, ma mafai ai e le malo ona maua mai le silia i le $3 piliona e fa’aopoopo i le atina’e o le malo, ma mafai ai ona fa’atupe le tele o atina’e eseese ua fa’amanuiaina ai le atunu’u atoa i le taimi nei, amata mai lava i pepe fa’atoa soifua mai e oo atu i Tama ma Tina matutua, ma fa’asolo atu ai ia i latou e a’afia i gasegase o le tino ma le mafaufau.

 

O ni isi o ana taleni e fiafia i ai le to’atele e aofia ai lona naunau e fa’afiafia i pese ma siva fa’asamoa, atoa ai ma lona naunau e fa’ataua tu ma agaifanua a Samoa i le lalolagi, o le mafua’aga lena e fiafia ai o ia i le fa’aupuga sa masani ona ia saunoa i ai, “O le ala i le pule o le tautua”.

 

O lo o soifua mai pea i le taimi nei lona faletua ma nai ona alo i lo latou aiga, ma o le a misia lenei ta’ita’i e le atunu’u atoa.