SGT. GIBBONS, JACKIE TAUA – FORT BLISS, EL PASO TEXAS

O le alo tamaitai o Amerika Samoa sa mua’i a’oa’oina mai le a’oga Maualuga a Samoana ma faai’u ai ana a’oa’oga i le tausaga e 1983, o Jackie Taua Collins na mae’a lana auauna o se fitafita tiute i le USArmy ae ua mae’a ausia e ia le tulaga Satini poo le E5. O lana auaunaga lea o se Toa o Samoa i le Vaega Au e toeititi lava atoa le 10 tausaga o lana tautua peitai o lo ua faigaluega fo’i i le USArmy e oo mai lava i le taimi nei i tofiga fa’atagata Savili ma o se Fitafita Tuai o ia.

O lenei alo o le atunuu o lo ua galue nei i Fort Bliss, El Paso Texas.

Ua ia fa’ailoa mai, na mae’a ana a’oa’oga maualuluga i Samoana ona ulufale lea i le ASCC ma atoa ai lona afa tausaga o le Summer ma le Fall ae faia loa lana filifiliga ina ia ulufale i le USArmy e fa’amae’a ai ana a’oa’oga ae totogia e le vaega au.

O lona tama o Mata’ituliseali’i Safune Taua mai le afio’aga o Amanave ma Masefau, le nuu o le tina o lona tama. Peita’i o lona tina fo’i, ua mliu fo’i o ia o Uluiva Fa’aotaota Samuelu Tuito’elau Leasau mai Ta’u Manua. 

Molimau lenei tamaitai talavou, ae o lo’o fa’aauau pea lava lana tautua i le USArmy DAC,  o se tagata faigaluega savili  “Speacialist” i le matagaluega a le Human Resources lea ua atoa ai nei le 23 tausaga o lana tautua i lena tofiga.

I le 2023 ua siitia ai i lana galuega fou e le o toe i lalo o le vaega au, ae ua avea o le US Boundary & Water Commission o se is lava lala a le Feterale i lona Ofisa Autu i El Paso, Texas lava.

“I lo’u tuputupu a’e ma a’oa’oina i le tatou teritori, o lo tatou nuu peleina, sa ou fiafia e alu i le a’oga, tausaili le lumana’i manuia o nai aiga, ae maise lava o matua. O na vaitau, e filifili lava e oe au mataupu i le a’oga, e leai se fautuaga tele a nai matua ua na’o le to’aga i le a’oga, saili le poto, ia outou mautu e tausia a’iga!”

“Peita’i ua oo mai i a’oga maualuluga ua ou va’ai atu e sili lava le moomia o le tomai i le Numera, faafetai lava i a’oga a faife’au, aua o iina lava le fa’avae na muamua tapui ai e aoga a Faife’au le tomai ma le iloa, uma loa mataupu silisili, Numera loa.”

“Lea ua oo mai ina matua ma avea ma fitafita o le vaega au, e moni lava, o le Numera lava mea uma! E ao ina lelei lau numera i suesuega fa’asaeanisi, e ao ina lelei lau numera i tomai fa’ainisinia, e ao ina lelei lau numera i mataupu fa’afoma’i, fa’apena ma a’oa’oga mo le tapenaga o mea tausami ma isi uma lava tomai aoga mo so’o se tagata aoaoina lelei.”

“Peita’i, o le tala moni lava, o le mafuaga na ulufale ai i le USArmy ma fa’amalosi e su’e le suega a le ASVAB ina ua mautinoa lava, e mafai ona fesoasoani e totogia la’u a’oga mo nisi fa’ailoga e mafai ai ona tuatua ma aoga i aiga. Se galuega e maualuga le totogi.”

“Ua mautinoa e le lava le Financal Aid mo le fanau i le Kolisi e totogia ai aoaoga maualuluga mo ni fa’ailoga, e sili lava la le amata ona saili le amo o le fana, e totogi ai pili o a’oa’oga.”

“O le a’oa’oga sa fia maua ai se tikeri o aoaoga fa’aKomipiuta aua o le matou vaitau ua amata ai ona ulufale mai na ituaiga o tomai i tatou a’oga i le teritori ma aoaoga uma i le Iunaite Setete.”

“Sa naunau i se mitamitaga o nai matua a’o le’i goto le la i o la soifua, ia avea le taumafaiga ma se ala e ta’uleleia ai i la’ua, o se sao mai lo’u fo’i afafine fa’atauva’a.”

“Ua tatou iloa lelei, o nai o tatou matua e atoa loa le 18 tausaga poo le 21 tausaga fo’i, e le taitai lava ona tu’ua ma fa’amamulu esea mai i tatou, ona o tulaga o le mana’omia mo la tatou tausiga lelei o i latou, o se toe faafo’i sili lea e mafai ona mitamita fanau e faia mo matua sa tau fa’asoasoa mai le seleni ma fa’aa’oga.

“O le fuafuaga a lo’u sui, ia ou gafatia ona totogia lava e a’u la’u a’oga pe a oo mai i le Kolisi i se setete o Amerika ou te fa’amautu i ai, ma ia ou gafatia ona toe tausi lelei o’u matua ma se sao mo le aiga potopoto.

O le fuafuaga e fai vavale, aua sa le malamalama i ni mea e tausailia ai ni avanoa fa’asikolasipi, o a ni galuega e maua ane ai i lau kosi o tauavea, ae pe fia fo’i se tinoitupe atoa e mafai ona totogia mo lau a’oga mo se fa’ailoga maualuga i Iunivesite?”

“Ua ulufale i le vaega au ma alu ai lava le tautua, ua aoga fo’i le a’oa’oga fa’amiliteri i le olaga taumafai ma ua malamalama lelei ai i le olaga tuto’atasi ma galue mo se leleiga, aua ua mautinoa i le agaga, e le tatau ona fa’alagolago i matua i so’o se mea o le olaga, o lea ua matua, o le mea e fai o le tausi atu o matua a’o maua le avanoa.”

“Ina ua ulufale atu i le vaega au, e le’i mautinoa lelei e le mafaufau poo le a tonu lava lu’iga o le a feagai ai, peita’i ina ua fa’asolo le auaunaga, o le fa’afetai fai a’e i talosaga a matua i taimi uma, aua o se ala ua maua ai le fesoasoani tele sa moomia, e ui ina e le’i atoa le 10 tausaga o le auaunaga.”

“Ua maua uma ai tali o mea na mana’omia ona fa’atino mo matua ma le sao i le aiga, ae ua maua ai fo’i le a’oa’oga moomia ma tomai sa fa’ananau i ai, aua se galuega lelei e tautua ai ma sailia ai alamanuia eseese mo le amatalia lava o lo’u aiga tuto’atasi.”

“Ua a’otau le amio ia mautu lelei lou mafaufau i le faiga o au fa’ai’uga. Ia malosi lou mafaufau fa’apea ma lou tino, ia le tuu lou loto i le fa’avaivai ae o le ola fa’amalosi’au atu i nisi ae maise lava oe, o se mea e ao ina ausia i taimi uma.”

“Le la ua matua ausia uma lava sini sa taumafai ona ausia e lo’u sui fa’atauva’a, ua mae’a le tausiga o nai matua, o lo’o tumau lava le alofa i nai aiga uma o i ai le so’otaga, e le galo fo’i le aganuu e tatou laulauvivilu ai i so’o se mea e fa’atasitasia ai nisi e to’atele. Le talimalo lelei ma le fiafia e fa’atasitasi ma isi uma uso ma tuagane Samoa i soo se nofoaga a le vaega au e tautua ai. E  fiafia i le soifua fa’atasi ma faifai mea fa’atasi, o lo tatou malosi’aga lea pe a oo ina aumau ese mai o tatou aiga ma afio’aga ae maise le atunuu pele.”

“Na mafai fo’i ona auai i le vaega o fitafita na auina atu i le Deserty Storm Oketopa 1990 i Saudi Arabia  e tusa ma le 3 maila le mamao mai le tuaoi ma Kuwait le nofoaga na fa’amautu i ai. E ono masina le umi o lena tautua mai tafa o taua.”

“Tele se aoaoga taua na maua mai lena tu’ua ai o tatou setete ae malaga atu  i le tafa o taua. Ua iloa le faigata o lo’o feagai ma na tagatanuu, e i ai le agaga alofa, ae o le taimi lava e tasi, e ao ina e iloa ona tausia lelei loa saogalemu fa’atasi ai ma i latou. O le tatalo mai o tatou aiga ma matua, ae maise lava fo’i o le Malo atoa sa nofo tapua’ia o matou faiva na mafai ai ona saofaga mai le to’atele o i matou.”

“E fo’i mai ua le toe tutusa le va’aiga ma le silafia sa i ai, i o tatou laueleele fa’apea fo’i ma i matou lava sa fa’atinoa galuega puipuia o le tatou saogalemu ma le saogalemu fo’i o na tagata nuu i o latou laufanua.”

“E ui ina o lea e le’i mae’a lava le tautua, o lo’o fa’aauau pea lava le auaunaga, ae ona ua fesiligia a’u i se mea ua ou maua mai la’u auaunaga i le Vaega Au, e mafai ona ou fa’ailoa atu, “E ao ina e lava tapena i lou malosi faaletino, malosi fa’alemafaufau ma lou malosi fa’aleagaga e mafai ai ona avea oe o se fitafita tau e lelei atoatoa mo le Vaega Au, ou tagatanuu ae maise o Lou Atua.”

“Afai ae le ausia e ita nei mea uma e tolu, e le tatau ona ou tauto ou te fa’atinoa le auaunaga fa’afitafita e malaga atu mo le fa’amoemoe e leoleoina lo tatou saogalemu lautele.”

Ina ua fesiligia le tamaitai Toa o Samoa e tusa ai o lona la’ei Samoa moni a tama’ita’i, ae ia fa’ailoa mai ai, “Ou te la’eia le Malofie a tama’ita’i Samoa ma le fa’aeteete lava ona o lo’u fa’atauva’a. Ina ne’i sasi sa’u la’a ma sa’u tu, ae le aoga aI mo a’u le malofie. Ou te taumafai i la’u amio, o la’u tu ma la’u aga ia tusa ma le malofia ua la’eia ma le mitamita tele o a’u o le tama’ita’i Samoa.”

“Ua le gata i lea, o a’u lea ua avea o se fa’aliga o lo’u aiga na ou tupuga a’e ai, i lo’u tama ma si o’u tina, o o’u aiga i Amanave, Masefau ma Ta’u, Manu’atele. Na la’ititi mai lava o a’oa’i e matua ina ia tautuana mea nei, le aga fa’aaloalo aua lava ne’i so’ona tautala a’o sasao pa’ia o aiga. ae maise i tagata uma e ao i ai le fa’aaloalo o tama ma tina matutua.”

“E tiga ona mamao le mea e tautua mai ai mai aiga, ae le galo le a’oa’iga a le Tama i taimi uma, e teu mau i le loto aua o upu ia ua le toe maua ina ua tu’ua e i la’ua, o’u matua le mafutaga. O le la’ei Samoa, o se fa’amanatu lea i lo’u sui, o fea ou te sau ai, o la’u amio ia tausa’afia, o a’u tu ma aga ia faia ma le fa’aaloalo lava. Ia ou ola ma tautua o’u aiga ma lo’u atunuu, ae maise o le Galuega a le Atua i soo se mea e aumau ma nofo ai. Tautuana, aua ne’i motusia le so’otaga ma le Atua o mea uma lava! ”

“O se mea sili ua ou maua ina ua mae’a la’u malofie, ua ou la’ei i le fa’ailo o le ola fa’aaloalo ma le ola tautua, ae faia ma le loto fa’amaulalo lava! O mea ia e iloa ai le tama ma le teine Samoa ua ia talileleia le a’oa’iga a ona matua ma agatonu i le la’ei.”

“Ua iloga le tele o mea lelei ua ou maua mai le olaga tautua o se tasi o Toa Samoa i le vaega au. Peita’i, o se mea sili o le fefa’asoa’i lea o i matou fitafita i mea e tiga ai, poo mea fo’i e mafai ona fesoasoani ma fa’amalosi’au atu ai i nisi fo’i fa’ato’a ulufale, ina ia manuia le taumafaiga.”

“A i ai fo’i nisi o fitafita e lavevea, e le mafai ona le matou asiasi i ai, ae maise lava i matou ua matutua i le galuega, e ao ina matou avatu ia i latou le fa’amalosi’au ina ia gafatia e i latou togafitiga tiga ma ia toe fo’i ane le mafaufau tonu ina ia fa’afaigofie ona toe mafuta ma nai aiga pe a mae’a latou togafitiga ma ua fa’amae’a ai le auaunaga a nisi e to’atele. O le malosi’aga o tatou fitafita o le latou tausoa fa’atasi o tiga ma mitamitaga o le avea ai ma fitafita o taua.”

“E uma lava le vaivai pe a oo ina fai fa’atasiga ma talasua fa’atasitasi ma talie, e foliga mai e le o lamatia le soifua o feagai ai ma tiute ma faiva! E to’a lava le loto ma fai fa’aiuga lelei, pe a le so’ona alo fo’i i le fefe ma fesasia’i ai fa’ai’uga lelei e ao ina fai!”

“O mafutaga fa’apena e fa’avavau lava o mau o matou loto ma e le suia, e manatua pea lava pea! Fa’afetai mo lenei avanoa e fa’asoa atu ai lagona!”

SGT. SAKARIA, RACHAEL & SPECIALIST SAKARIA, TUAIMANULEFOLAUGA – FORT CAVAZOS, TEXAS

O le au uso lea ua tiute fa’atasi i la’ua i For Cavazos, Texas ma o se mea fo’i e seasea ona tupu lea i totonu o le vaega au, Peita’i e i ai le tasi o i la’ua ua Satini, o lona uiga ua leva lana auaunaga, ae o le tasi o lea fa’ato’a amata.

O le afuaga o le la’ua tiute fa’atasi ona o lo’o tasi le ituaiga o tiute ua fa’atulaga e le USArmy ina ia tautua ai i la’ua o le Automated Logistics  Specialists. O i la’ua o alo e to’alua o Eli Leilua ma Sialatua Sakaria o Vaitogi, Amerika Samoa, ma Sagone Savaii Samoa. O i la’ua uma nei e masani ona vala’auina e le to’atele o fitafita tiute i lea nofoaga a le Vaega Au o “Saki Sisters.”

O le agava’a o nei tamaitai ona o le la’ua faigaluega malosi, le fa’atuai ma le fa’amaoni lava, e muamua atu lava o la’ua tiute fa’atino i taimi uma e tuufa’atasia ai sapalai i nofoaga e fa’amautu i ai ma lo la agava’a i le matauina ma le fa’asoaga o so’o se sapalai moomia mo so’o se vaega a le USArmy.

E fiafia tele i la’ua e fesoasoani i fitafita uma i lea nofoaga a le Militeri i so’o se mea e moomia, ma e le fa’atalale i la’ua i o la tiute e fa’ataunuu mea uma ia talafeagai ma le taimi o le mana’omia.

E fa’afiafia loto i la’ua i fitafita, e fesoasoani ia mafai ona le popole i latou a’o tapena mo tiute i aso ta’itasi, ma ua lau silafia lea tulaga e le vasega o fitafita uma o lo’o fa’amautu i Fort Cavazos.

Ona o le la’ua auauaga ma le tautua lelei i le vasega o fitafita ma vaega eseese i Fort Cavazos, e fa’afiafiaina ai fitafita ma pulega uma e fa’atino o latou tiute i taimi e taugalemu ai, ae maise fo’i i taimi e le taugalemu ai. O i latou e mau fa’atuatuaina tele i la’ua i o la’ua tiute fai i taimi uma.