Pago Pago - AMERIKA SAMOA

Ua taoto nei i le Faigamalo a Lemanu ma La’apui se talosaga mai i le faigamalo fou a le Kovana Filifilia ia Pula, mo ni auala ma se fesoasoani, e mafai ai ona sologa lelei tulaga uma, i le fesuiaiga o faigamalo, o lo’o loma nei.

O lenei talosaga, na tauala mai i se tusi sa fa’ao’oina atu i le afioga i le Kovana Lemanu P.S. Mauga, ma tusia i le aso 25 o Novema, 2024, mai i le faatonusili o le ofisa a le Kovana Filifilia a Amerika Samoa, ia Ella Gurr.

I lea tusitusiga, ua fa’ataoto ai ni alagamanuia taua ma ni itu o fesoasoaniga, e mafai ona manuia ai lenei faamoemoe faatasi ai ma se faamoemeoga, o le a mafai ona maua vave se tali i lenei talosaga.

O se vaega pito i luga o le lisi, o se avanoa e mafai ona avea ma Ofisa, ona soso’o ai lea ma se vaegatupe mo fesuiaiga, faapea ai ma se talosaga mo se fonotaga a kapeneta, o le fa’amaoti atu o le tagata e gafa ma fesootaiga, atoa ai ma se kopi o le Paketi mo le tausaga 2025, lea ua mae’a ona pasia.

O lo’o finagalo ia le faigamalo fou ina ia faamautuina se ofisa i Fagatogo/Utulei, e mafai ona avea ma ofisa autu a le faigamalo fou, e amata atu i le aso Gafua na se’i mavae atu nei.

O le vaegatupe sa talosagaina, e fesoasoani i le faatinoga o le fesuiaiga o faigamalo, e aofia ai totogi o tagata faigaluega, o fesootaiga ma isi lava tulaga faapena.

O fonotaga ma taitai sinia o faigamalo fou ma le faigamalo tuai, o le a amataina i le aso Gafua o le vaiaso fou seia o’o atu i le aso 20 o Tesema.

E le gata i lenei tusitusiga, ae sa faapea foi ona talosagaina ai ni suiga i le faaaliga fa’alauaitele a le Lemanu, lea sa faasalalauina i le aso 22 o Novema, 2024, lea sa talosagaina ai e le kovana ia faatonusili po o faauluuluga o ofisa ma matagaluega uma a le malo, ina ia saunia se ripoti mo fesuiaiga, faapea ai ma se ripoti o aseti a le malo.

Ma sa faatonuina ai taitai po o faauluulu o ofisa ma matagaluega ina ia filifilia nisi o a latou aufaigaluega ina ia tu’ufaatasia ripoti e pei ona talosaga, ma fa’ao’oina atu ia Lydia Amisone.

I le tusi mai i le ofisa a le Kovana Filifilia po o le Faigamalo fou, ua ta’ua ai suafa o Ella Gurr po o le sui Faatonusili o le ofisa a le Kovana Filifilia, o Lewis Wolman, e mafai ona faafeso’ota’i i so’o se tulaga.