Pago Pago - AMERIKA SAMOA

MOOMIA TOE FA’AAOGAINA PUPUNI FOFOGA I LE LBJ MEDICAL CENTER

Ua toe fa’alauiloa mai nei e le pulega o le falemai tele i Faga’alu, mo i latou uma e asiasi ane, pe fia ulufale i totonu o le lotoa a le Falema’i i Faga’alu, ua tatau ona toe silafia nei, ua toe fa’amamaluina le fa’aaogaina mai o le Pupuni Fofoga e pei ona i ai i le vaitau o le Covid-19.

“Ona o lo ua matua tetele lava fo’i le pipisi mai o le Influenza i le taimi nei, ua toe fa’amamalu atu ai le fa’aaogaina o le Pupuni Fofoga pe afai o le a e fia ulufale i soo se vaega lava o le falema’i. O le taumafaiga lava ina ia fa’aititia le pipisi o le fa’ama’i flu lea fa’apea fo’i ma le toe aafia fa’aafi mai o le atunuu i le Covid-19 lea ua le toe faia ni suega poo ai o maua pe o ai fo’i o loo mama mai lea fa’ama’i na lutia ai le lalolagi,” o se toe fa’amalamalamaga lea mai le susuga le Pule Sili o le Falema’i LBJ Medical Center ina ua fesiligia i le toe fa’amalosiga o Pupuni Fofoga.

“E tolu fa’amai pipisi ia ua taumafai nei le pulega ma le aufaigaluega a le Falema’i tele ia taofiofia mai le atunuu lautele mai le maua ai: Flu, RSV ma le Covid-19. O le pupuni fofoga lea e ao ina pupunia fa’atasi le isu ma le gutu ia mautinoa e leai se ala e mafai ai ona pesia se tasi o lua tuaoi i totonu o le falema’i. E ese mai lea ae ua fa’anonofo fa’avava fo’i tagata i totonu o le falema’i,” o se isi lea toe fa’amalamalamaga a Moefa’auo e tusa o lea fa’asa ua toe fa’amalosia mai mo le Falema’i Tele lava ia.

FA’AMAU SAO O TALOFA FE’A O LE ASCC - GALEUGA FA’ATINO A LE STEM

O le tamaitai a’oga o Talofa Fe’a sa malaga e fa’aalia lana galuega fa’atino a le STEM i le Advancement of Chicanos/Hipanics & Native Americans i mataupu fa’asaeanisi 2022 National Dversity in STEM Conference, ua fa’amautu mai lona fa’ailoga taua ua faamanuiaina ai.

Sa faia lea faa’aliga taua i San Juan, Puerto Rico mai ia Oketopa 27-Oketopa 29, 2022.

O le fa’ailoga ua umia nei e Talofa Fe’a o le “Outstanding Research Presentation” o lona uiga ua matua atoatoa le suesuega a lenei tamaitai talavou i lana galuega na faatino ma fa’aalia lelei.

O lana galuega fa’atino o se “Fa’aaliga o A’afiaga loloto ile Fa’a-Samoa mai Suiga Matuia o le Tau!” Na fa’aaoga e ia ata ma tusitusiga e avea ma ala o lana fa’atinoga, ma sa lisia lana fa’aaliga i lalo o le STEM Education & Learning Category i lea tauvaga taua.

O Fe’a o se tasi o le to’a 110 o i latou o fanau a’oga sa tauva e ala i le faaaliga o latou galuega fa’atino STEM i lea faaaliga tele, ma o se tasi o fa’aaliga tele ua tuufaatasia ai nisi o le ituaiga o tagata eseese ua alalala ma a’oa’oina fo’i i le Iunaite Setete o Amerika ua saofaga mo lenei fa’amoemoe tele.

O le igoa lea ua fa’ailo ai lea fa’aaliga o le SACNAS, ma ua fuafua lenei fa’aaliga ina ia faaau’upegaina le fanau talavou eseese i totonu o le Iunaite Setete, i tomai e mafai ai ona malolosi ai i latou ma agava’a, e fa’atino auaunaga eseese e tautuaina e i latou tagatanuu i totonu o latou setete ma teritori o alala ai. 

E moomia lava ona lava lo latou aoaoina lelei i a latou matata o tauavea e fesoasoani ai e fa’amautu fausaga o so’o se mea e atina’e ai latou atunuu o alaala tumau ai.  O sui na malaga ma le tamaitai o Talofa Fe’a mo lenei fa’amoemoe o Eirenei Tesimale o se sui mai le ACNR Green House; ma ua fiafia fa’atasi i la’ua ina ua mafai ona toina mai le avanoa e malaga atu ai Talofa Fe’a mo lenei fa’aaliga tele i  Puerto Rico.

O le ulutala o lana galeuga fa’atino “Eroding Eleele” ua fa’aalia ai li ana sueuega ma fa’amaumauga o a’afiaga loloto o le Fa’asamoa i suiga o le Tau ma Feoa’iga o Tagata ona o ia suiga matuia o le tau. O suesuega nei ma faamaumauga sa fa’atautaia lea e le Iunivesite o Kansas sa faia i le taumafanafana o le tausaga ua te’a, lea e fa’aulutala o le Haskell Environmental Research Studies Institute.

“I la’u fa’atinoga sa ou maua ai le avanoa e fa’aleo ai le auega a ou tagata o lo’u atunuu ma ua mafai fo’i ona fa’aalia ai le a’afiaga o lo’u atunuu na o suiga matuia o le tau, ma ua fa’apena fo’i ona suia ma a’afia ai le soifuaga saogalemu sa ola ai tagata o lo’u atunuu, o mea sa soifua ai o matua tua’a ua mavae atu,” o se talatala lea a Taofa Fe’a e tusa o lana fa’atinoga ia fa’amau fa’ailogaina nei.

Ua fa’ailoa e Emily Pavilk, le ta’ita’i o le Polokalama o le SACNAS, “Ua fa’aalia e matou fa’amasino, e tuese mai lava le fa’atinoga a le tamaitai o Talofa Fe’a mai le tele o galuega fa’atino sa fa’aulu mai ma fa’aalia, o le ala lea ua fa’amau fa’ailogaina ai lana galuega fa’atino, ma ua avea ai o le 2022 SACNAS Student Presentation Award.

“O le mea sili ona taua ona ua mafai fo’i ona molimauina le galuega fa’atino a lenei tamaitai o Talofa, matua’i lelei lana fa’atinoga, ua tatau ia te ia lana fa’ailoga,” o se toe upu lea a Pavilik.