Pago Pago, AMERIKA SAMOA

FBLA AMERIKA SAMOA – ULUAI AUOFISA MA LE FAAULUINA O SUI TOTINO FOU:

O Asosi o Fanau e fia avea ma Faipisinisi mai A’oga maululuga i le teritori, sa fa’atautaia le latou ulua’i fa’atasiga e fa’aulu ai latou sui tofia mo le latou  ulua’i laulauatofi ma fa’atauto ai latou ulua’i totino e silia ma le 300.

O le peresetene o le Future Business Leaders of America i Amerika Samoa ua tofia ai le ulua’i peresetene o Fuli Kolia mai I le Aoga Maualuga a Leone, Sui Peresetene ua tula’i ai nei Sofa’i McMoore mai le NVTHS, o le Teutupe o Sinive Auapa’au mai le aoga maualuga a Tafuna ma le Failautusi ua tula’i ai nei le tamaitai o Nathalia Trinidad mai  le aoga maualuga a Samoana.

O le aotelega o fanau mai nei fo’i a’oga maualuluga e 4  a le Malo ua mae’a ona fa’atauto fa’atasi ma o latou ta’ita’I tofia I Ie sauniga lava lea sa fa’atautaia I le  Gov. Rex Lee Auditorium I le aoauli o le Aso Faraile na te’a nei. O a latou vala’aulia fa’apitoa, sa aofia ai le Fa’atonu o le Matagaluega o A’oga Dr Ruth Matagi , le sui fa’atonu o A’oga ma o lo’o fa’auluulu i ai lea foi polokalama, o Heidi Uele, le susuga i le Faife’au ia Pr. David Katina, lea sa ia ta’ita’ia le sauniga mamalu i se upu fa’amalosi ma le tatalo.

Sa auai ai foi ma nisi o faipisinisi talavou na vala’aulia, na aofia ai Mike McDonald o le Watersports ma Ammon Fepulea’i lea sa fai ma sui ina ia lima’ia le fanau talavou. Na faatasi mai foi sui o le GIAS (Goods of American Samoa) mai i Tafuna ma le sui a le GHC Reid. O le agaga o le auai o nei faipisinisi, ina ia  fa’aosofia fanau talavou, e galulue a’ia’i i lo latou fa’amoemoe e avea ma ni faipisinisi i le lumana’i mo le atunuu.

O Ammon Fepulea’I o se faia’oga o le Numera, peita’I o lo’o ia fa’atautaia sana pisinisi e lualuagia ai ona faiva e tautua ai le atunuu ma ua avea o se isi ana alagatupe maua. O se mea e fiafia ai lava o ia o le Interior Design ma le Pu’eata, lea ua avea nei ma sana pisinisi tumau, e ese mai lona avea ma Faia’oga i le Numera i le aoga maualuga a Samoana.

I le tautalaga fa’amalosi a Fepulea’I, sa ia lisia ai mea e tolu e tatau ona mataituina e so’o se faipisinisi, e pei o Ie fiafia e feso’ota’i ma le to’atele o tagata I taimi uma. Lona lua o le fa’ataoto lelei  o fuafuaga e fafau ma galue aga’i i ai lau pisinisi  e te tautuaina ai le mamalu lautele. Faatulaga ma le isi fuafuaga e toe fafa ai taumafaiga pe a le manuia taumafaiga muamua. E mautinoa e leai se faigofie i le taumafaiga, e tauau ina le sasi ma le olaola lau pisinisi. Ma le maga lona tolu, “Ia e fiafia e fai lau auaunaga, tusa pe faigata le ala i le manuia.

Ona o le FBLA Amerika Samoa o se vaega o se tasi o polokalama ua fa’atautaia nei i a’oga maualuluga a le tatou Malo, o lea na i ai le avanoa e saunia ai le Sui Fa’atonu ia Heidi Uele e fa’amalo ma fa’amanuia le fa’amoemoe o le tamaitai faia’oga pisinisi  ua avea ma Fa’atonu o lea Polokalama i A’oga maualuluga, Athena Mauga ma le lautele o toino ua mae’a fa’atauto mo le ulua’i Asosi lenei i le teritori.

Ona soso’o lea ma le avanoa o le Fa’atonu o A’oga, lea sa ia fa’ailoa ai lona fiafia tele  ina ua matua to’atele fanau aoga maualuluga o lo ua fa’aosofia e fia avea ma Faipisinisi i le Lumana’i.

Ua ia fa’ailoa I sana tautinoga fa’amalosi, “Mai le to’alima o le fanau na soifua a’e i le tatou malofa’aatumotu laititi, a’o’oga atu i le Samoana, ua gafatia e le to’alua o i la’ua ona fa’atautaia se pisinisi i Los Angeles ma iinei i Amerika Samoa le tasi. Le fanau, afai e mautu lou fa’amoemoe e te fia faipisinisi, ma e to’aga a’ia’i i ai, e te mafaia.”

I le polokalama lava sa fa’atautaia sa faaofi i ai ma se taumafaiga a le fanau pisinisi mai Leone, o le fa’aaliga o Lavalava ua saunia i sikaili eseese ua mafai lava ona fa’aaoga i ai lavalava masani o le fanau. O se fa’aaliga e fa’aosofia manatu , aua o nei mea uma, e fiafia i ai le fanau a’o talavou. O le auau o le fa’amoemoe, “O foliga va’aia o sui Faipisinisi.”

O le tima’i a le tamaitai o lo’o ua fa’atautaia lenei polokalama i a’oga maualuluga, Athena Mauga sa ia fa’ailoa ai i sui totino uma ua mae’a fa’atauto, “Afai e i ai lou naunauta’iga e fia avea ma Faipisinisi, Ia tumau lou fa’amoemoe, sailisili tomai e mafai ai ona faaleleia lou tagata faipisinisi, ia lava lou ola feso’otai ma le mamalu lautele o le atunuu e fa’alautele atili i ai lou fa’amoemoe.”

FAAMAUFA’AILOGAINA I TALA FAASOLOPITO LE ULUA’I SA A TAMA’ITA’I I LE FAAILOGAINA O LE 70 TAUSAGA KOLISI SAGATO IOSEFO

O Novema 6, 2020 ua fa’amauina ai se tala’aga fou o le fa’agatama i le tai, aua ua suia nei ina ia ta’ua fo’i o le fa’agatama’ita’i i le tai, aua ua mae’a fa’atini ma fa’atino e tamaitai le tu’uga muamua ua tauva ai se auva’a o tamaitai e alo le Fautasi ma tutu’u ai fa’atasi ma auva’a o ali’i.

E ui ina ua tulaga lua le latou Sa, ae ua fa’amauina i le tala’aga o tu’uga Fautasi, ua tausinio se auvaa tamaitai i le filigamaea i le tai, o se tu’uga e fa’amanatu ai le 70 tausaga o le Kolisi a Sagato Iosefo i Apia, Samoa.

O le tu’uga lea na amata mai I Faleula se’ia pa’ia mai le Uafu Tele i Apia, o le umi lava lea o tu’uga e masani ona faia i Sisigafu’a lea fo’i ua toe faia ai lea tu’uga ma ua ausia e le malosi o tamaitai fa’ato’a tago i le foe lea mamao ae ua lautogia le latou tulaga lua.

O le Tautai Tamaitai o le vasa, Vaimasenuu Zita Martel le kapeteni ma o le taitai fo’i o koleniga a le auva’a tamaitai muamua ia Samoa na lua. Na fa’aigoaina le latou Sa na alo, o le “Fautasi o Toa.”

O le vaa Lanumeamata  o le “Alfred & Deporres”,  na tulaga muamua, ae na fisi mai lava e le Fautasi o Toa le Lanumumu “Dieter & Aquinas” ma se’i le tulaga lua i le tu’uga. O le isi lua fautasi na tomuli i ai le filigamaea i le tai, sa mamao i tua ma e foliga mai e ese fo’i le matagofie o le la’ua tu’uga na fai mai tua.

“O le mea ua tula’i mai nei, ua fa’amaonia nei e tamaitai loto tetele nei, o le fa’agatama i le tai, e le tatau ona toe fa’alagi, o se fa’agatama ae ua tatau fo’i ona fa’apea o se fa’agatamaitai. Ua gafatia fo’i e tamaitai ona tauva i lea filigamaea. Ua fa’amautu atili ai le mau a tamaitai, E au le inailau a tamaitai.” O se tala lea na saunoa i ai le tamatai Kapeteni Vaimasenuu Zita Martel i le fa’atalanoaga ma le Samoa Global News ile aso Faraile na te’a nei i Samoa.

“A’o loma le ta’aloga i le tai, na muai faia la’u tala I lo’u auva’a tamaitai lenei, e tusa lava poo le a se iuga o le tatou taumafaiga lenei i le filigamaea i le tai, e fa’atini loa lo tatou fa’amoemoe, o outou ua fa’amauina i tusi fa’amaumau o le tala fa’asolopito o Samoa. O le ulua’i auva’a tama’ita’i ua tauva i le tu’uga Fautasi i Samoa.” O se fa’aopoopo mai lea a Vaimasenuu.

Na matua fa’atumulia le apitagalu i Vaisigano i le fia maimoaina e le atunuu o se faaiuga o le taumafaiga a le ulua’i auva’a tamaitai lea sa tauva i le tu’uga fautasi.

“O le fa’amalosi sa tuuina i agaga o tina nei ina ia mafai ona autasi lo matou fa’amoemoe, sa fa’ailoa ia i latou le agaga tonu o le fa’agatama i le tai.  O le Fautasi, e tasi lona fausaga, e tasi le faamoemoe o le auva’a atoa, e tasi le leo e fa’alogo ai, e tasi fo’i le agaga e fia manumalo, e tasi lava le pa’o e gatasi ai foe.  A maua lea le autasiga lena, ua sa’o uma mea e tatau ona a’e malo ai le taumafaiga.”

“E le taua poo ai lava lou sui, ae taua le loto e tasi ma galulue fa’atasi i taimi uma.” O se toe tala lea a le tamaitai o Vaimasenuu Zita.

E ui ina ua atoa le 20 tausaga o avea Vimasenuu Zita ma kapeteni o va’a fautasi e tutu’u, ae o se taimi muamua lea ua ia taitaia ai se auva’a tamaitai atoa.  

“Ua matua fa’afiafiaina lava i matou uma i le fa’aiuga o lenei ulua’i taumafaiga.  E na’o le tolu ma le afa vaiaso na koleni fa’atasi ai le auva’a o le ‘Fautasi o Toa’ ae tutu’u loa, ma o i latou uma o nisi e fou fo’i i lenei faiva, peita’i ua mafaia e i latou ona fa’aiu lea taumafaiga ma le tausa’afia. Ua matua ou fiafia lava ua matou mafaia ona tutu’u ma maua le tulaga lua.”

O lenei fo’i tamaitai Kapeteni e le fou ia Amerika Samoa, aua sa oo mai fo’i ma tutu’u i lo tatou gataifale fa’atasi ma kapeteni iloga o le teritori. O tamaitai uma na avea ma totino o le auva’a o le ‘Fautasi o Toa’ e matele lava i tamaitai tuai o le St Mary’s College, ma ua fia faia fo’i so latou sao e fa’ailogaina ai le atoaga o le 70 tausaga o Sagato Iosefo.

Ua fa’afetaia e Vaimasenuu Zita o latou aiga ma pelega aua sa latou matua tatalia ma le olioli le latou fa’atini mai i le tu’uga ae maise ai lava i latou sa latou fa’amuamua le latou taumafaiga ma tapua’ia o latou faiva i le tai.

O le latou taumafaiga foi i le filiga maea i le tai ua avea nei ma manulauti e tau’avea le mau “Taofi le fa’asauaina o tina ma fanauiti i totonu o Aiga.”O le latou lanu moli, le toniga sa la’eia e le auva’a a tamaitai, ua fa’aaogaina nei o se lanu e uiga, ua mae’a tafiesea uma so’o se ituaiga omiga ma a’afiaga tau sauaina o tina ma fanauiti I totonu o aiga.