Ads by Google Ads by Google

Tala I Vaifanua

PASIA E LE “CMS” LE HOPE DIALYSIS CENTER

 

Ua fa’ailoa e le susuga Chris Fisher, le pule faatonu o le Hope Dialysis Center le mae’a pasia e le CMS - “Centers for Medicare and Medicaid Service” le Hope Dialysis.

 

Ua fa’ailoa ai i lea pasiga, o galuega uma ua fa’atino i totonu o le Hope Dialysis Center ina ia togafitia ai tagata gasegase i le Fa’amama Toto, ua matua pasia uma lava i lea asiasiga a le CMS na faia i le vaiaso ua te’a, mai le aso Gafua i le Aso Tofi.

 

O le asiasiga sa fa’afoea lea e le National Dialysis Accreditation Commission, o se vaega na laisene e le CMS latou te fa’ataunu’uina lea asiasiga.

 

Fa’alia e Fisher, “O lenei se tala ua leva na matou momo’o i ai talu mai le amataga o le tautua lenei, ua fa’amautu atili ai lo matou mautinoa lelei, o mea uma sa matou fausia ma fa’atulaga, fa’agaoioia ma tautuaina ai le atunuu ae maise i ona tagata ua gasegase i le fa’amama toto, ua matua pasia mo lea tautua, ma ua iloga ai fo’i o se galuega ua agava’a fa’atasi ma i latou ua tutu mai e fa’ao’o le tautua mo le lautele.”

 

“O le isi itu tele o le tautua lenei, o i latou ua fa’afaigaluega ai. Le susuga le foma’i fa’apitoa o Fatuga’o ma o ia fo’i lea o lo’o i ai ma le tomai fa’apitoa i mea tau meatausami e tausia lelei ai le soifua maloloina ina ia le maua i le ma’i suka ma so’ona ova le mamafa o le tino, o ala e lua e afua ai ona vave inu fuala’au i le olaga atoa, ma ua mafua ai ona fa’amama le toto, pe a o’o ina umi lava o lo’o tausia ai pea lou soifua maloloina e ala i fuala’au e tele e inumia i aso uma.”

 

O le isi taumafaiga tele a le Hope Dialysis Center, o le fautuaina lea o tagata ua toeitiiti lava o’o i le ma’i suka, i a latou mea’ai e ao ina tausamia ma inumia fo’i, ina ia le pa’u atu i le itu, ua ma’i suka, ae ia toe mafai ona tete’e lea fa’afitauli mai i lou soifua maloloina lelei.

 

“O lo ua taumafai nei ina fa’aauau le taumafaiga lea e taofiofi mai lava le to’atele ua maua i le type 2 Ma’i Suka mai le o’o atu ina faifaitetele ma o’o ai ina maua i le fa’amama toto. O lea taumafaiga ua feagai sa’o lava tagata ma le ali’i foma’i o le Fatugao, Dr Letarte, ma ua galulue fa’atasi ma le ali’i foma’i o mea’ai paleni Ali Williams ma le tamaitai faufautua tau amio e tatau ma le tagata ua ma’i suka, Julia Foifua, ina ia mautu le taumafaiga e suia le amio ma le loto o le tagata ma’i e sui fo’i ana ‘aiga i aso ta’itasi,” o se tala lea a Fisher.

 

E tusa o le tautuaina o tagata e fa’amama toto, ua fa’ailoa mai e Fisher, “O lo ua toetoe lava a tumu atoa taimi mo togafitiga o gasegase fa’amama toto i le Hope Dialysis. Ua mae’a soloa’i mai nisi o gasegase mai le LBJ i Fagaalu ae o le to’atele lava o matou gasegase na fa’atonu mai fafo e fia fa’aaogaina le tautua, ina ua fia o’o mai i aiga. O le a fa’atulaga fo’i e toe fa’aopoopo le sifi tolu ina ia mafai ona tautuaina uma le vasega o gasegase fou lea ua fa’ato’ai mai mo togafitiga.”

 

Ua taumafai atili le Hope Dialysis ina ia taofiofi le mafuli atu o i latou ua maua i le Diabetes 2 ma aga’i atu ina ia fa’amama le toto. E mafai ona faia lea tulaga pe afai e fuafua lau mea tausami ia paleni ma le tele fo’i o lau taumafa i vai suamalie.

 

TAIMALELAGI MINNIE TUIA “FA’ATONU O TURISI”

 

I le fonotaga a le Kovana ma lana kapeneta i le vaiaso ua te’a, sa fa’ailoa ai e Kovana Lolo Matalasi Moliga, le tofia o Taimalelagi Minnie Tuia e avea ai ma fa’atonu fou o le Ofisa o Turisi a le malo, the American Samoa Visitors Bureau (ASVB)

 

O ia lea sa tofia fa’apitoa e Lolo na te va’aia lea Ofisa ina ua tu’ua e le ali’i fa’atonu o David Vaeafe lea ofisa ia Novema 2019 ina ua le toe faafoua lana konekarate e le Komiti Fa’afoe o le ASVB.

 

Talu mai le amataga o le nofoaiga a Lolo ma Lemanu, sa tula’i mai Taimalelagi o le sui pule o le aufaigaluega a le ofisa o le kovana i le 2013.

 

Saunoa Lolo e fa’apea, “ua ma’ua malilie ma Lemanu fa’atasi ai ma le komiti fa’afoe a le Visitors Bureau” e avea Taimalelagi ma taitai o lea ofisa o le malo.

 

Ua leva tausaga o galue Taimalelagi i le malo e aofia ai ma le vaitau sa avea ai o ia ma fa’atonu o le Ofisa o Turisi i le faigamalo a A.P. Lutali.

 

FA’ATAUTAIA POLOKETI PAIPA SUAVAI MAMA I TAUESE, NUUULI

 

E le o toe mamao, ae mae’a le faata’atitiaga o Paipa Vai fou ua galueaina nei i le pitonu’u o Tauese i Nuuuli, ma ua fa’ailoa mai o le a suia i ai paipa vai taumafa ua leva ona fa’aaoga mai e lea itu o le afio’aga.

 

“Pe a mae’a ona fa’ata’atitia mai le paipa vai nei, ona fa’asaga ane loa lea e soso’o i ai mita vai a le aiga ta’itasi ma tatala mai ai loa le suavai fou ua pamu a’e mai le eleele i lona nofoaga fou i atumauga o Tauese, Nuuuli lava ia. O lona uiga o le afio’aga o Nuuuli ma fa’asolo atu aga’i i Fagatogo o le a inu mai i lea fo’i puna ua pamu a’e i Tauese, Nuuuli lava,” s se tala lea mai le Ofisa o le ASPA.

 

O le konekarate o lea galuega o le Happy Trucking mai Futiga ma o le galuega o lo’o fa’atupeina e le ASEPA.

 

Ua le fa’ailoa maia fo’i e le ASPA se aofaiga o le ofo a le Happy Trucking ua malo ai i latou i lenei tauofoga mo lea galuega.

 

GALUEGA FA’ALELEIA ALASAVALI I SAMOANA HIGH

 

O se tasi o poloketi e 20 ua mae’a manatu Kovana Lolo Moliga e fa’atautaia a’o le’i mae’a le tausage 2020, o le ala savali ua mae’a atoina lelei e fa’amalumalu ai le fanau a’oga i le Aoga Maualuga a Samoana.

 

O le galuega lenei o lo’o va’ava’aia e le Matagaluega o Galuega Lautele a le Malo i lona pasia lelei o le fausaga ma le atoatoa ona fausia e pei ona mana’omia ai i le konekerate ua mae’a sainia ma le Taumafai Construction.

 

Na amata mai ia Tesema 3, 2019 ae ua fa’ailoa mai e mae’a i le fa’aiuga o Ianuari 2020. O fa’amaumauga nei tau le galuega sa tu’uina mai e le pule a’oga Foleni Esekielu o Samoa High.

 

Fa’aalia le agaga fa’afetai o le alii pule a’oga ma le mamalu o faia’oga, ina ua faliu lana afioga le Koana e fa’ataunu’u se mana’oga o le fanau a’oga ma i latou uma i le Laumua, ae se alasavali fa’apenei e puipui ai le fanau mai le susu i timuga a’o feoa’i i a latou vasega, fa’atasi ai ma le aga’i atu i le Faleta’alo.

 

I le va’aiga i le galuega i le aso Faraile ua te’a, e mafai lava ona mae’a lea galuega i lona taimi atofaina.