Ads by Google Ads by Google

Tala I Vaifanua


O se tasi o taimi mataina i le sofa’i atu o le ‘au handball a Amerika Samoa i le ta’aloga ma Fiti i le vaiaso lenei i le ta’amilosga handball i New Caledonia. [ata: foa’i]

TAPUA’IA SE PINE FANAU TA’A’ALO HANDBALL I NEW CALEDONIA

 

O lo’o tauva le ‘au Handball a Tama’ita’i mai Amerika Samoa i le Ta’amilosaga Handball Faavaomalo a le Oceania lea e tauaofia i New Caledoni. O lea ta’amilosaga sa amata ia Aokuso 11, se’ia o’o ia Aukuso 18, 2019.

 

O atunu’u o lo’o ua aofia i lenei ta’milosaga o, Amerika Samoa, Fiti, Niu Sila, Ausetalia, New Caledonia, Tahiti ma Papua New Guinea.

 

I le ta’aloga muamua, i le amataga o lenei vaiaso, sa manumalo ai Amerika Samoa ia Papua Niu Kini, soso’o ai ma le malo a Amerika Samoa ia Fiti. Ae peita’i na faiaina Amerika Samoa ia Niu Sila i le 24-21.

 

O le ‘au a Amerika Samoa e aofia ai: Fa’alua Loe, Pa’i Fanene, Naomi A’asa, Jasmine & Lynette Liu, Diane Loe, Luava’a Tofaeono. O sui fou o le Au ma o lo’o malaga foi e aofia ai: Beverly Seva’aetasi, June Ames, Aiga Isaako, Sinnah Soi ma Rochelle Godinet.

 

I le fetauiga ma le ‘au malosi a Niu Sila, na mata’ina lava le malosi o le sofa’i a le tatou ‘au, ma na muamua lava latou ‘ai i le fetauiga atoa se’ia o’o i ona toe minute, lea na soso’o ai ona maua ‘ai o Niu Sila na manumalo ai.

 

“O le fa’amalo i a tatou ‘teine ta’a’alo aua e tusa lava pe laiti tino e fa’atusatusa i tino o i latou o ta’a’alo mai i Niu Sila, Papua New Guinea ma Fiti, ae le fa’avaivai i le sofa’i atu ma le puipuia fo’i o le tatou laina sikoa. O tagata lava ina lava le lotonu’u,” o se tala lea a Stephanie Floor, o se tasi o ‘au a Amerika Samoa i sana fa’amatalaga i le Facebook.

 

O le aso ananafi i le afiafi ua fa’atulaga ai le ta’aloga ma New Caledonia, ona soso’o lea i le isi aso ma ta’aloga ma le ‘au maloasi a Ausetalia.

 

FA’ASAO LE “MALAE O LE TALU” - TUMAU PEA MALAE O LE AFIO’AGA O FAGATOGO

 

I se tasi o lipoti fa’asalalau, o lo’o taua ai e fa’apea o nisi o suli o le Aiga Sa Fa’agata i le afio’aga o Fagatogo na fa’atino se tatou solo e tete’e i le fa’asimaina o se valga o le Malae o le Talu,  lumafale tonu o le fale - Pavilion i le malae i Fagatogo.

 

O le saini sa fa’alauiloa ai lona taofi ina ia fa’asao mai “Malae o le Talu” sa matauina e le to’atele ma sa latou fa’ae’e fo’i pu o tatou ta’avale e iloga ai lo alto sapaia o lea taofi.

 

O le tama’ita’i talavou sa ia faia lea galuega o Macy Fa’agata Ah Ching mai Fagatogo lava. O lona taofi sa ia fa’aalia fa’alaua’itele, e le’i faia i se ala fa’atupu fa’alavelave, ae o se ala filemu ina ia faamanatu atu ai i ta’ita’i o le Malo, o lo’o manatu le pa’ia o aiga i totonu o le afioaga i eleele ua mae’a fa’atulaga fa’aleaganu’u, o Malae taulia i totonu o le afio’aga, ma e tatau lava ona fa’atumauina. Ua le avea o se avanoa e so’ona fete’ena’i ai lagona i ni galuega lelei, ae o se fa’amanatu i le taua tele o eleele ua avea ma malae o le fa’autugatagi a le atunuu i ana faigamalo o lo’o fa’agasolo nei.

 

E le’i umi ona faia lea fa’ailo i le Malae, sa amata loa ona o’o ane leoleo o le Malo ma latou fa’ailoa i e na tino matutea i le fa’amoemoe ina ia o’o ane i le Ofisa se’i talanoa ma le afioga le Komesina e fa’ailoa le taofi ua agaga i ai.

 

“O suiga ua va’aia nei ua amata fa’asima i le Malae o le Talu, o se tali atu lea a le Malo i nisi o talosaga o lo’o fa’ao’o mai i le Malo ona o le tau leai ona mea e paka fa’alelei ai ta’avale. Afai fo’i e fa’aaogaina lea Pavili ua mae’a fa’atuina nei ma toe fa’aleleia atili, o le a aoga lava lea pakaga o ta’avale I lena taimi mo fa’amoemoe e fa’atautaia ai. Petia’i o le tele o taimi, e fa’aaoga lava e le afio’aga i taimi o sauniga fai  ma ni mea e tutupu i le afio’aga e fia tauaofia i le Malae o le Talu. O lona uiga o le fa’aaogaina o lea Malae o lo’o pule lava le afio’aga o Fagatogo,” o se tala lea a Kovana Lolo Matalasi Moliga.

 

“O le fa’afouga o lenei Maota i le Malae o le Talu ma nisi o suiga ua va’aia ua fa’atino ai nei, e faia mo le afio’aga, aua o lea ua matauina lava e le atunu’u atoa ma le malo, ua tau le faia ai lava ni feiloa’iga i le Malae o le Talu, ua matele mai i le Malae o le Suigaula a le Atuvasa.”

 

“O mea uma ua fa’afouina I luga o lea malae, ua fa’atulaga e nafa lona va’ava’aiga lelei e le afio’aga o Fagatogo peita’i ua toe fa’aleleia atili ona o le talosaga mai o nisi o sui mamalu o le afio’aga, ma o se mata’aga sili lea mo le malo o le talafatai o lona taulaga i le afio’aga, ma ua fa’aleleia atili ai fo’i ma le vaa’iga lautele i le afio’aga atoa,” o se tala lea a le kovana.

 

O le galuega toe fa’aleleia o le Pavilion o lo’o fa’afoeina e le Pentagon Samoa Construction.

 

TALIA PEA E LE ANZ SIAKI BOH - PE A TAPUNIA I LATOU

 

Ua fa’ailoa e le ANZ Amerika Samoa Bank o le a latou taliaina pea siaki o le Bank of Hawai’i mai le setete o Hawaii, ae le toe taliaina siaki a tagata taitoatasi ma siaki a pisiisi ua faia mai i a latou Tusi Siaki e tuatusi i Amerika Samoa.

 

Peita’i o siaki uma lava e faia mai i Tusi siaki a tagata ta’itasi ma pisinisi a’o siaki BOH ua fa’amuta lea I le aso 14 Aokuso, 2019. Ua mae’a fo’i ona fa’alauiloa mai e le faletupe o Hawaii le latou fanoga e motusia ai le tatou tautua i Amerika Samoa nei i le aso 16 Aokuso, 2019.

 

O le fa’aiuga lenei a le Faletupe o Hawaii (BOH) na mua’i fa’ailoa mai ia Amerika Samoa i le 6 ma le afa tausaga ua te’a, peita’i sa fa’atuai lava ona tula’i ese i latou ona o le manatu i le aioiga a le afioga le Kovana sili Lolo Moliga ina ia fa’atuai se’ia mae’a mai se to’omaga o Amerika Samoa i tulaga o ana teugatupe ma se faletupe.

 

O lo ua mae’a fa’atula’ia nei le Territorial Bank of American Samoa (TBAS).