PASEFIKA

MASALOMIA LE TANUMIA OLA O NI TAGATA SE TO’A 500 I SE SOLO TELE I PNG

O le aso ananafi sa mafai ona faasaoina mai ai se ulugalii, ina ua tanumia ola i se solo palapala tele i le itumalo o Enga i Papua Niu Kini.  O lo’o masalomia le faitau selau o tagata ua maliliu i lenei faalavelave matuia, lea na tupu i le faaiuga o le vaiaso na se’i mavae atu nei.

Sa mafai ona fa’asaoina mai ia Johnson ma Jaqueline Yandam ina ua tanumia se vaega tele o lo la fale i ni ala tetela sa solo mai luga o le mauga.

Na faamatalaina e lenei ulugalii i nisi o vaega fa’asalalau le fa’asaoina o i la’ua ina ua ta’avale mai ni ala tetele lava ma taofia le tanumia o i la’ua i palapala ma la’au, ae ana le vave o’o atu le lavea’iga o i la’ua, semanu e maliliu i le galala i le fia a’ai ma le fia feinu.

E to’atolu se fanau a lenei ulugalii ma e le’i iai i latou i le nofoaga na tupu ai le faalavelave, i le taimi  o le sologa palapala.   Ma na fa’ato’a mafai lava ona tauvalaau mai mo se fesoasoani, ina ua mae’a lelei le pa’o o le solo mai o palapala, ma’a ma la’au.

O le to’atele lava o i latou o lo’o fesoasoani malosi i le tau sailiga o tagata ua tanumia i lenei faalavelave, o tagata o nu’u tuaoi po o tagata o aiga.

I le atoa o le fa aso talu ona tula’i mai lenei faalavelave, e to’alaiti lava i latou ua mafai ona maua – e aofia ai se vaega o se tino a se alii e 25 tausaga.

O lo’o iai se talitonuga, e pe a ma le to’a 500 tagata ua tanumia i lenei solo tele.

PU’EINA I ATA VITIO LE SAUAINA E VAEGA’AU FALANI O TAGATA NIU KALETONIA

O le afiafi o le aso Lua na se’i mavae atu nei, na salalau ai se ata vitio o se alii leoleo Falani, sa ia ave faapagotaina se tagata Kanak, ma ina ua mae’a ona lokaina lima o lea alii Kanak, sa tago atu loa le leoleo Falani ua u’una’i o ia i lalo ma kiki lona ulu, se’ia o’o ai lava ina matapogia le alii Kanak.

Ua ripotia mai le tupu o lenei faalavelave i se tasi o itumalo i totonu o Noumea ma ua iai se talitonuga o le mafuaaga lea ua faasa ai e le malo o Falani ia le TikTok i totonu o Niu Kaletonia, ina ia aua ai ne’i salalau atu ni ata faapea, i le sauaina e leoleo Falani o tagata o le motu.

O lo’o taumafai pea le ofisa faasalalau a le RNZ Pacific e faafesootai le ofisa o le Komesina Sili a Falani faapea le Amepasa a Falani i le Pasefika, mo se faamatalaga e tusa ai ma nei ripoti.

Ae ua saunoa mai le susuga i le Faafeagaiga ia Billy Wetewea mai i le Ekalesia Porotesano i Kanaky, e le o faatupuina se filemu i nei ituaiga gaioiga a leoleo.

Sa saunoa le susuga i le Faafeagaiga, ua mae’a ona fautuaina o latou tagata ina ia tapu’e i vitio so’o se gaioiga e tula’i mai, aemaise lava pe a osofa’ia e leoleo o latou tagata.

Ua ta’ua foi e le susuga i le Faafeagaiga, e le o se taimi muamua lea ua tupu ai se tulaga faapenei.  E tele nisi ata vitio o lo’o pu’eina ai nei ituaiga sauaga ma o le faapea ona fa’ao’oina atu nei faamaoniga i le faamasinoga.

FA’AITIITIA LE FUAINUMERA O GASEGASE O LE ‘DENGUE’ I SAMOA

Ua fa’amaonia mai i se ripoti a le Minisita o le Soifua Maloloina i Samoa, le agai i lalo o le fuainumera o gasegase a’afia i le ‘dengue fever’, i le va o Me 13 -19, 2024, mai i le 62 na faamaumauina i le vaiaso ua tuanai, i le 18 lea ua iai nei.

Ma sa saunoa le susuga i le Faatonusili o le Minisita o le Soifua Maloloina a Samoa, ia Aiono Prof. Alec Ekeroma, afai ae fa’aauau ai pea le agai i lalo o le fuainumera o gasegase o le ‘dengue’, o le a faapea loa ona le toe ta’ua o lo o pepesi lenei faama’i.

O le aso 19 o Aperila na ta’ua aloa’ia ai le pepesi o lenei faama’i totonu o le atunu’u, ina ua o’o atu le fuainumera o gasegase i le ta’i 10 i le vaiaso, ma o lo’o iai se mana’oga ina ia fa’aitiitia atu ma lea fuainumera ia gasegase, ona mafai lea ona le toe ta’ua o se ‘outbreak’.

Ae o lo’o fa’aauau pea ona fautuaina tagata o le atunu’u ina ia faamamaina vaivai ma nofoaga o to’a ai vai i autafa o maota ma laoa, lea o lo’o fai ma nofoaga e fofoa ai namu.  Faapea ma le faia o la’ei po o le fa’aaogaina o ‘repellents’ e taofia ai le uina o le tino e namu.

Ua mae’a foi ona fa’aasau nofoaga faitele, e pei o falemai ma aoga, i le fa vaiaso ua mavae atu.  O se tulaga ua fa’aalia ai le agaga fiafia o le afioga Aiono ona o lenei auaunaga faifa’atasi a ofisa ma matagaluega eseese a le malo, na aofia ai ma le Ofisa o Turisi.