Pago Pago - AMERIKA SAMOA

MOMOLI E SE AVEPASI IA NI ONANA NA FUFUSU I LUGA O LE PASI, I LE OFISA A LEOLEO

O le aso 4 o Oketopa, 2024 na taunuu ai se pasi o le auala i le Ofisa a Leoleo i Fagatogo, e momoli iai ni alii se to’alua, sa tu’ua’ia i le faatupu vevesi i luga o le pasi.

Ua molia nei ia Thomas Hafoka ma Denis Kirisome i moliaga o le Faatupu Faalavelave i nofoaga faitele faapea ma le Fa’ao’olima i le tulaga e tolu.

Faitauga 1:  Faatupu Faalavelave i nofoaga faitele, o se vaega ‘B’ o solitulafono mama, e mafai ona nofosala ai i le falepuipui i le o’o atu i masina e ono, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipui, i le tausaga atoa; po o se sala tupe e $1,000; po o faasalaga uma e lua.

E $1,000 sa faatulagaina e mafai ona tatalaina ai i tua ia Hafoka, ae $300 ia Kirisome, e faatalitali ai o la faamasinoga.

E tusa ai ma faamaumauga a le malo, o le afiafi o le aso 4 o Oketopa, na afe atu ai se pasi o le auala i luma o le Ofisa Leoleo i Fagatogo, o lo’o fa’aemoemo atu ana moli mo faalavelave faafuase’i, e momoli atu ai ni alii se to’atolu, e foliga mai na misa i luga o le pasi.

E toatolu i latou na taitai atu i totonu o le ofisa leoleo, na aofia ai Hafoka, Kirisome ma le susuga ia James Poloa’i, lea na lavea i le pisa a i la’ua ua molia.

Ma ina ua faatalanoaina e leoleo ia Poloa’i, sa ia faamatalaina e faapea, o ia se nofo i tafatafa o le ave pasi, ae savali atu Hafoka i le kiki le itu taumatau o ona folga, soso’o atu ai ma ana tu’i i lona fatafata ma ona foliga.  Ona oso mai lea o Poloa’i ua fufusu ma Hafoka, ae oso atu ai ma Kirisome.

Na eseese faamatalaga a Hafoka ma Kirisome i le faalavelave na tupu.

E tusa ai ma le faamatalaga a Hafoka, sa togi o ia e Kirisome i ni fagu pia ma tau i ona foliga ma o le mea lea na o la misa ai ma Poloa’i.

Ae i le faamatalaga a Kirisome, o Hafoka na mafua ai le pisa, ona o lana gaioiga na faia ia Poloa’i ma o le mafuaaga lea na ia oso atu ai e tauvaovao le la misa.  Ma sa ta’ua e Kirisome, le lavea ai foi o ia i le fusuaga a Hafoka ma Poloa’i. 

Ina ua faatalanoaina e leoleo ia le avepasi, sa ia ta’ua e faapea, sa nofo ia Poloa’i i ona autafa ae oso atu se alii (lea na fa’amaonia mulimuli ane, o Hafoka), i le tu’i foliga o Poloa’i.  

Ma na ta’ua foi e le avepasi, le togiina e seisi alii (Kirisome), ia se fagu pia, lea na tau i foliga a Hafoka, ia ma fa’ateteleina ai le vevesi i totonu o le pasi.

Na faamatala foi e le ave pasi le faafaigata ona o latou taumafai e taofiofi ia Kirisome mai ia Hafoka.  Ae na ta’ua e le avepasi, e laki le leai o nisi o le pasese na fa’amanu’alia i le vevesiga a le to’atolu lea. Se’ia vagana ai ni a latou faatauga sa faaleagaina.

I le taimi na faatino ai tiute a leoleo e faasaga ia Hafoka ma Kirisome, sa ripotia e leoleo le lagonaina o le manogi ‘ava malosi o le to’alua lea, faapea ai ma le mumu o o la mata. 

OSO SE ALII I LONA USO MA SE IPU MEAAI, FIU LEOLEO E TAOFIOFI

O se faalavelave na tupu i le aso 7 o Oketopa, 2024 lea na fiu ai se aiga e taofiofi se alii na oso i lona uso ma se ipu mea’ai, na fa’ai’u i le valaau loa o leoleo mo se fesoasoani.

E tusa ai ma fa’amaumauga a le malo, o lo’o ta’ua ai le valaau atu o se tamaitai i le Ofisa a Leoleo ina ua le mafai ona fa’ato’afilemu le susuga ia PJ Crichton, lea na oso i le tuagane a le tamaitai ma se ipu mea’ai.

Ina ua taunu’u leoleo ma a’o talatalanoa ma le tamaitai sa valaau atu i le ofisa a leoleo, na lagonaina e leoleo le ‘e’e ma le palauavle o le ua molia, agai i lona uso, lona aiga ma tuaoi.

Ina ua iloa mai e le ua molia ia le taunu’u atu a leoleo, sa taumafai loa e sola ese, ae peitai, na mafai ona pu’eina o ia e leoleo.  Sa fai sina umi o tau taofiofi le ua molia e leoleo, ona sa fa’aauau pea ona taumafai e fa’ama’amulu ese mai i a’ao o leoleo, a’o fa’aauau pea ona ‘e’e ma lafo mai ni upu mamafa i leoleo.

Ina ua mafai ona tu’uina le ua molia i totonu o le taavale na agai atu loa i le Ofisa a Leoleo i Fagatogo mo le fa’aauauina o su’esu’ega.  Ae o lo’o ta’ua i faamaumauga a le malo, a’o agai atu le taavale a leoleo i le ofisa a leoleo, sa fa’aauau ona lafo e le ua molia ni faamatalaga tau fa’amata’u i sui malu o le malo.  Ma o le mafuaaga lea na tonu ai i leoleo, ua tatau loa ona ave sa’o le ua molia, i le to’ese i Tafuna.

Ae sa avea lea tulaga ma mafuaaga na amata ai ona sasa e le ua molia, lona ulu a’i i le fa’ata o le taavale ma taumafai e tatala le faitoto’a o le taavale e sola ese ai.

 Na fa’amatala e le uso a le ua molia, lea na a’afia i le faalavelave, e faapea, na alu atu le ua molia i totonu o le fale, o la ua fa’asuaava ma sa savali agai i le umukuka ma mana’o i se meaai.

Ma sa ta’ua e le na a’afia lona saunia o se ipu mea’ai a lona uso lea ua molia, ae ua amata ona palauvale mai le ua molia, se’ia o’o lava ina tu’u iai lana mea’ai.

Ma sa fa’ate’ia le na a’afia, a’o la ‘a’ai faatasi ma le ua molia i luga o le laulau, i le ta o lona ulu e le ua molia, i le ipu meaai.  Ona soso’o ai lea ma tatu’i ina o ona (le na a’afia) foliga, se’ia o’o ina matapogia mo ni nai sekone.

E toe te’i ifo i luga le ua molia, o lo’o taofiofi mai le ua molia e le ‘nephew’ a le tamaitai na valaau i le ofisa a leoleo.

Ona tu lea i luga o le ua molia ma savali atu agai i lona potu ae o lo’o fa’aauau lava ona laulauvale ma faia ni uiga faatupu faalavelave, a’o iai ni tamaiti i le va o le 6 ma le 10 tausaga le matutua, i totonu o le fale.

Na fa’ailoa atu e le tamaitai na valaauina leoleo faapea le tuafafine o le na a’afia, lea e ana le fale, i leoleo, lo latou le toe mana’o e toe fa’afo’i mai le ua molia i le fale, ona o se popolega i fanau iti.

Ua molia nei Crichton ifaitauga e lua, e aofia ai:

Faitauga 1:  Faatupu Vevesi i totonu o aiga (sauaga i totonu o aiga), o se vaega ‘C’ i solitulafono mama, e mafai ona nofosala ai se tasi i le o’o atu i aso e sefulu lima, po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘A’ i solitulafono mama, e mafai ona nofosala ai i le falepuipui i le tausaga atoa, po o se sala tupe e $1,000 po o faasalaga uma e lua.

E $20,000 se vaegatupe na faatulagaina e mafai ona tatalaina ai i tua le ua molia, e faatalitali ai ona faamasinoga.