Ads by Google Ads by Google

Sunia: Ua fai le ‘ava malosi ma fa’apogai o sau’aga totonu o aiga

ausage@samoanews.com

O le fa’atupulaia ai o fa’alavelave e fa’atatau i sau’aga i totonu o aiga e a’afia ai le ‘ava malosi, na saunoa ai le afioga i le ali’i Fa’amasino ia Fiti Sunia e fa’apea, ua fai le ‘ava malosi ma fa’apogai o le tele o sau’aga fa’asaga i Tina ma fanau i totonu o aiga i aso nei.

Saunoa Sunia e fa’apea, o le silia i le 90% o mataupu e fa’atatau i sau’aga i totonu o aiga o loo oo atu i luma o le Fa’amasinoga, o lo o aofia ai lava le ‘ava malosi. Ua manatu le fa’amasinoga, o le isi lenei elemeni o loo fesoasoani malosi i le fa’atupuina o sau’aga i totonu o aiga.

E 38 tausaga o se ali’i na taofia e Leoleo i le vaiaso na te’a nei ona o tu’uaiga i lona fasi fa’amo’amo’a lea o si ona faletua, e mafua mai ina ua maua atu e lana fanau se isi tamaloa o loo i ai i totonu o le fale ma lona to’alua.

E 2 moliaga mama ua tu’uaia ai e le malo lea ali’i, lea e aofia ai le fa’aoolima i le tulaga tolu faapea ai ma le fa’atupu vevesi i nofoaga faitele. O le po o le aso Tofi o le vaiaso na te’a nei na pu’e fa’apagota ai e Leoleo lea ali’i ma taofia ai loa i le toese i Tafuna, ma ia tula’i ai i luma o le fa’amasinoga fa’aitumalo i le taeao o le aso Faraile na sosoo ai.

Na teena e le ua molia tu’uaiga a le malo ina ua tula’i i luma o le Fa’amasinoga Fa’aitumalo. I lona teena ai o tu’uaiga fa’asaga ia te ia, na fa’atulaga ai loa e le afioga i le ali’i Fa’amasino ia Fiti Sunia le tu’uina atu o lana mataupu e fofogaina lea i luma o le Fa’amasinoga o Aiga, Fualaau Fa’asaina ma le ‘Avamalosi.

O le mae’a ai o le iloiloga a le ua molia, na faia ai loa le poloaina e tatala ai o ia i tua e aunoa ma se tupe e totogi, i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona toe taumafai e fa’afeso’ota’i lona to’alua ma lana fanau, fa’asa ona toe alu i le fale o lo o nonofo ai lona to’alua ma lana fanau, a ia avea o ia ma tagatanu’u lelei e tausisi i tulafono a le malo, ma auai i soo se taimi e valaau ai lana mataupu.

Afai na te vaaia lona to’alua ma lana fanau i se vaega o le taulaga, o lona tiute o le savali ese mai ai ma le filemu, ae aua ne’i ona taumafai e fa’afetaui i latou pe talanoa fo’i i ai. Talu ai tulaga fa’aletonu i pepa nofomau a le ua molia, na faia ai loa e Sunia le faaiuga ina ia tatala o ia i lalo o le vaavaaiga a le Ofisa o Femalagaaiga, ina ia fa’amautu muamua tulaga o lona pepa nofomau e ala i le fa’afou o lona ID.

E pei ona taua i le ripoti a le Ofisa o Femalagaaiga, o le to’alua a le ua molia, o lana sponsor lea.

O le mataupu lenei na tofu atu i le Ofisa o Leoleo i Tafuna i le po o le aso Tofi o le vaiaso na te’a nei, ina ua talosagaina e le Tina o le fafine se fesoasoani a Leoleo, ina ua maua e le Tina ma ni isi o le aiga fa’amatalaga e fa’atatau i le fa’alavelave na fasi fa’amo’amo’a ai e le ua molia lona to’alua.

E pei ona taua i ripoti a Leoleo, e fa’alua ona fasi e le ua molia lona to’alua. O se taimi o le taeao o le aso Tofi, ma le afiafi pe tusa o le 7:00, lea na sosoo ai loa ma le logoina o Leoleo mo se fesoasoani.

Sa i ai ni manu’a tuga i foliga o le fafine ina ua fa’aoolima i ai le ua molia, ma mafua ai loa ona aga’i atu o ia i le falema’i mo togafitiga, ma toe te’a ai i tua i le po lava lea o le aso Tofi.

Ae tusa ai o su’esu’ega a Leoleo e fa’apea, sa faigaluega le ua molia i le taeao o le aso Tofi o le vaiaso na te’a nei, ae fa’amuli lona to’alua ma le la fanau i le fale. O le fafine e faigaluega i le kamupani i’a i le sifi po. E le mamao le fale o le aiga ma le nofoaga e faigaluega ai le ua molia.

A o faigaluega le ua molia i le taeao lea o le aso Tofi pe tusa o se taimi o le 10:00 i le taeao, na fa’afuase’i ai ona aga’i atu lana fanau ma fetagisi atu ia te ia i le nofoaga o lo o faigaluega ai, ma fa’ailoa atu ia te ia, o lo o i ai se tamaloa i totonu o le fale fa’atasi ma le latou tina (to’alua a le ua molia).

Na fa’amatala e tamaiti i le latou Tama (le ua molia) e fa’apea, ina ua latou fo’i mai i le faleoloa sa o e fa’atau, sa latou vaaia ai se tamaloa o muamua atu i o latou luma. Na savali sa’o atu lava le tamaloa i le latou fale, ona ia tatala lea o le faitoto’a ae ulufale i totonu ae loka mai le faitoto’a.

Na fiu le fanau a le ua molia e tu’itu’i le faitoto’a, pe’ita ua loka mai e le tamaloa lea sa ulufale i totonu, ae o le taimi lea o lo o i ai fo’i lo latou Tina i totonu o le fale. Na fai si umi ona nonofo tamaiti i fafo o le faitoto’a e fa’atali le taimi e tatala mai ai, ona tonu ai loa lea i o latou manatu, o le a latou savavali e ta’u i le latou Tama o loo faigaluega.

O le maua ai e le ua molia o le tala mai lana fanau, na aga’i ane ai loa i le latou fale ma maua ane ai lona to’alua na o ia. Na amata le vevesi i se taugaupu, ma fa’ai’u ai loa i le fa’ao’olima o le ua molia i lona to’alua ma manu’a ai foliga o le fafine i le taeao lava lea o le aso Tofi. E le i manatu le fafine e vili Leoleo mo se fesoasoani.

O le mae’a ai ona fa’ao’olima o le ua molia i lona to’alua, na ia tuua ai loa le fale ma aga’i atu i le fale o se tasi o ana uo i Pago Pago ma faia ai sa laua inugapia seia aulia lava le afiafi o le aso lava lea, ma toe fo’i ai loa o ia i le fale.

Na taua i ripoti a Leoleo, o le toe fo’i atu o le ua molia i le fale i le po o le aso lea ua ‘ona, na toe tula’i mai ai loa le isi fa’alavelave ina ua alu atu ma fa’ao’olima i lona to’alua a o moe le fafine i totonu o le fale. E ui i le fa’alavelave na tula’i fa’alua mai, ae le i manatu lava le fafine e vili Leoleo mo se fesoasoani.