Pago Pago - AMERIKA SAMOA

MOLIA SE ALII I LE GAOIA O SE PUSA PISUPO

Sa lokaina i le aoauli o Novema 15, 2024, ia le susuga ia Fale Aukuso, ina ua tu’ua’ia o ia e se pule o se faleoloa, i lona gaoia o se pusa pisupo, 3 pauna, mai lona faleoloa.  E ui ina sa sola le alii ma le pusa pisupo, ae na toe maua o ia i se taimi mulimli ane.

O le susuga ia Aukuso o se tagata ua masani ai leoleo, ona o lona a’afia i le tele o nisi faalavelave sa tutupu muamua.

O le moliaga na fa’asaga ia Aukuso, o le Gaoi, o se vaega ‘C’ o solitulafono mamafa, e mafai ona nofosala ai i le falepuipui, e le sili atu ma le 7 tausaga, po o se sala tupe, e le sili atu ma le $5,000; po o faasalaga uma e lua.

E $10,000 le tupe sa faatulagaina e mafai ona tatalaina ai o ia i tua, e fa’atalitali ai lona faamasinoga.

E tusa ai ma fa’amaumauga a le malo, o le aoauli o le Novema 15, 2024, na fa’afeso’ota’i ai e le pule o se faleoloa, ia le gaoia e se alii o se pusa pisupo 3 pauna, e $132 lona tau, a’o la’u mai e lana aufaigaluega a latou oloa mai i totonu o se pikiapu.

Sa faamatalaina e le pule o le faleoloa, i leoleo, le alu atu o le ua molia ma fesiligia o ia, pe manaomia se fesoasoani i le la’uina o pusa pisupo mai i le ta’avale agai i totonu o le faleoloa.  Na te’ena e le pule o le faleoloa ia le ofa a le ua molia.  Ae ofoina atu e le ua molia ia ni niu e fa’atau e le pule o le faleoloa mo le $2, pe fesuia’i mo se mea’ai.

Ae peitai, sa tali atu le pule o le faleoloa e ala i le tulieseina o le ua molia mai lona fanua, a leai, o le a vala’au leoleo. 

O iina na savali atu ai loa Aukuso ma se’i le pusa pisupo ma savali ese.

Na taumafai leoleo e saili le ua molia ma le pusa pisupo ae peitai, e le’i maua o ia. 

Ae o le po lava lea e tasi, na toe valaau atu ai le pule o le faleoloa lava lea e tasi na gaoia, i le ofisa a leoleo, ma ripotia le toe fo’i atu o Aukuso i lona faleoloa.  Sa fapea ona toe agai atu ai leoleo ma lokaina mai ai Aukuso ma aveina atu loa o ia i le ofisa a leoleo, mo le fa’aauau o a latou suesuega.

Ina ua fesiligia e leoleo ia Aukuso e tusa ai ma le faalavelave, sa ia ta’u atu i leoleo, na mafua ona ia aveina le pusa pisupo, ona ua fia ‘ai.

VALA’AU E SE TAMAITAI LEOLEO ONA O LE FAATUPU VEVESI A LONA TUAOI

Sa lokaina mai e leoleo ia se alii i le po o Novema 9, 2024 ma molia i le Faatupu Vevesi i nofoaga faitele, ina ua fa’afeso’ota’i e se tamatai ia leoleo ma ripotia le leotele o le pisa mai i le fale o lona tuaoi.

O le moliaga fa’asaga ia James Savea, le Faatupu Vevesi i nofoaga faitele, o se vaega ‘B’ o solitulafono mama, ma e mafai ona nofosala ai i le falepuipui i le o’o atu i le ono masina, po o se sala tupe e $500; po o faasalaga uma e lua.

Ina ua taunu’u leoleo i le nofoaga sa tupu ai le faalavelave, sa va’aia se alii e leai sona mitiafu o lo’o ‘e’e ma palauvale.  Ina ua latalata atu le taavale a leoleo, na savali mai iai lea alii ma palauvale mai i le taavale a leoleo ma valaau mai, e ave o ia.

Ae o le taimi lea ua amata ona o mai uma i fafo ia tuaoi mai o latou fale.  A’o lo’o taumafai le aiga o lenei alii, e taofiofi ma fa’afilemu o ia.

Sa faapea loa ona aveina e leoleo le ua molia i le ofisa leoleo mo le fa’atalanoaina, ae peitai, ona o le fa’asua’ava tele o le ua molia, sa le mafai ona tali ni fesili a leoleo.

I le fa’agasologa o tiute a leoleo i lea afiafi, sa su’esu’eina ai le la’ei o le ua molia ma maua ai i totonu o lana taga se paipa mata’eta’e.  Na faapea loa ona fa’afeso’ota’i e le ofisa a leoleo ia le vaega o le latou matagaluega, e gafa ma le mataituina o vaega o fualaau faasaina.