Pago Pago - AMERIKA SAMOA

MAUA VAEGA FUALAAU FAASAINA (AISA) I SE OSOFAIGA A LEOLEO

O le taeao o le aso 19  Iuni, 2025, na osofaia fa’afuase’i ai e sui malu o le Ofisa a Leoleo ia se fale na masalomia, o lo’o iai ni masini poka e fa’asaina i le tulafono (Abundance Arcade), ma sa lokaina mai ai se alii na maua ai se vaega o fualaau faasaina – o le Aisa.

Ina ua taunuu atu leoleo i le nofoaga na faia ai le latou osofaiga, sa maua atu ai ni alii o lo’o ta’a’alo mai i masini poka, i totonu o le potu ta’alo.

O se tasi o nei alii, o le susuga ia Floyd Makuisa, lea na su’esu’eina lona tino mo a’upega ma vaega o fualaau faasaina, e pei ona masani ai, i le faatinoga o tiute a leoleo

Sa mauaina ia Makuisa ia se fagu o iai ni fualaau, faapea se pepa iila o iai se aisa, o ni ‘straws’ ua mae’a ona tipitipi, sa maua ai foi totonu ia vaega o le aisa, o se paipa mata’eta’e, o se afi, ma nisi tama’i pepa i’ila se lua, o se naifi faamoe ma se vaegatupe e $16.32.

Na su’esu’eina e le ofisa a leoleo ia pepa i’ila, ‘straws’ ma le paipa mata’eta’e, ma sa fa’amaonia ai le iai o vaega o fualaau faasaina, o le Aisa.

Sa faapea ona lokaina Makuisa i le toese e faatalitali ai lona faamasinoga.  Ae na molia o ia i le Umia faasolitulafono o se vaega o fualaau faasaina (Aisa).  O se solitulafono mamafa, e mafai ona nofosala ai i le falepuipui, i le va o le lima ma le sefulu tausaga, po o se sala tupe, e i le va o le $5,000 ma le $10,000; po o faasalaga uma e lua.

E $2,000 sa faatulagaina, e mafai ona tatalaina ai le na molia, e faatalitali ai lona faamasinoga.

GAOIA NI KOMIPIUTA MAI I LE OFISA O AOGA

O le taeao o le aso 9 o Iuni, 2025, na vala’au atu ai se tagata faigaluega mai i le Ofisa o Aoga a Amerika Samoa, i le Ofisa a Leoleo i Tafuna, ma ripotia ai le gaoia o ni meatotino a le malo, mai i se lala o le Ofisa o Aoga, i Tafuna (Technical Building).

O se taimi mulimuli ane, na lokaina ai Tuaifuaina Vaapuu (po o Tony) ma Sila Hanipale Malae ma molia ai i la’ua i le Gaoi, Faomea ma le Solivale o fanua a isi.

E tusa ai ma fa’amaumauga a le faamasinoga, sa agai atu leoleo i le nofoaga na tupu ai le fa’alavelave ma sa faasino iai e le tagata faigaluega a le Ofisa o Aoga, ia le potu na iai komipiuta ua gaoia.

E ono komipiuta sa gaoia ma na ave, ae o lo’o iai lava komipiuta i totonu o pusa sa aumai ai, o lona uiga, o ni komipiuta fou e le’i fa’aaogaina.

I su’esu’ega sa faia e leoleo, o le ofisa, sa maua ai se pu i le sima (wall) o le ofisa ma sa maua ai foi ni tamai taga, o lo’o tusia ai igoa o ‘Tony’ ma ‘T-Bone’.   Sa maua i totonu o nei tama’i taga, ia ni polo mo le ta’aloga o le ‘golf’.

Sa aveina e leoleo na agai atu e tali le valaau i le taeao  o Iuni 9, 2025, ia nei taga i se leoleo e nofo latalata i le malae ta polo, ma e masani i tagata e o atu i le malae ta polo.  Sa iloa lelei lava e le leoleo lea ia le tagata e suafa ia ‘Tony’, ma o se tagata foin a ave atu muamua i le ofisa o leoleo mo le su’esu’eina, a’o ia tau’aveina ia tama’i taga ia.

Na taumafai leoleo e saili ‘Tony’ ae peitai, sa le’i fa’amanuiaina a latou taumafaiga.

O le aso 17 o Iuni, sa maua ai loa ‘Tony’ ma aveina atu i le Ofisa a Leoleo mo le suesueina.   O iina na ia fa’amaonia ai, o lana tama’i taga lea sa maua e leoleo i le ofisa a aoga.   Ma na ia fa’amaonia ai foi, lona fesoasoani i le gaoia o komipiuta a le ofisa o aoga, faatasi ai ma Sila (lea ua o la molia faatasi).

Sa faamatalaina e ‘Tony’ po o Tuaifuaina, i leoleo, ia lona kikiina o le faitoto’a o le ofisa ma matala ai, ona ia tu’i fa’apu o le ‘wall’ ma tatala ai le potu na iai komipiuta.  Ma sa o la la’uina ia pusa komipiuta i se pusa a le ASPA, na latalata ifo ma tu’u ai.  Ona o la savavali atu lea i se fale taxi na latalata ifo, ma talosagaina se taxi e o ai.

Ae ona sa leai se la tupe e totogi ai le taxi, na o la tu’uina se tasi o komipiuta, i le ave taxi.

Na agai atu foi leoleo i le fale taxi e saili le ave taxi lea sa faamatalaina e le na molia.  Ma sa mafai ona fa’amaonia e le ave taxi, i leoleo, ia le o atu o I la’ua na molia, i le fale taxi i le 1:00 i le vaveao o Iuni 9, 2025 ma faatonu o ia e ave la’ua i se pusa a le ASPA, i tafatafa o le ofisa a aoga.

Ma sa ta’ua e le ave taxi, lona va’aia o la’u atu e nei alii ia ni komipiuta ma tu’u i totonu o le taavale, ona ia aveina loa lea o la’ua i le faleoloa a Misa i Iliili.  Ona sa le mafai ona totogi e nei alii ia le la pasese, sa o la tu’uina atu se tasi o komipiuta i le ave taxi, e totogi ai le la pasese.

Sa ta’ua e le ave taxi lona taofia o le komipiuta, e faatalitali pe alu atu seisi e su’e sana komipiuta, ae sa le mafai ona ia faamatala le mafuaaga na le alu ai e ripoti lea tulaga, i le ofisa a leoleo.

O le tau aofai o komipiuta na gaoia, e pe a ma le $6,048.95.

O moliaga a Tuaifuaina ma Sila, na aofia ai:

Faitauga 1:  Gaoi – o se vaega ‘C’ i solitulafono mamafa, e mafai ona nofosala ai i le falepuipui, e le sili atu ma le fitu tausaga, po o se sala tupe, e le silia ma le $5,000; po o faasalaga uma e lua.

Faitauga 2:  Faomea i lona tulaga muamua – o se vaega ‘B’ i solitulafono mamafa, e mafai ona nofosala ai i le falepuipui, e le silia ma le 15 tausaga.

Faitauga 3:  Solivae o fanua a isi, e aunoa ma se faatagana – o se vaega ‘B’ i solitulafono mama, e mafai ona nofosala i le falepuipui, e o’o atu i le ono masina, po o se sala tupe e $500; po o faasalaga uma e lua.

E le o ta’ua i faamaumauga a le faamasinoga, pe sa avefaapagotaina ia le ave taxi.