Pago Pago - AMERIKA SAMOA

Na fa’alauiloa mai e le Minisita o Femalagaiga i luga o le ‘ea, le afioga Olo Fiti Va’ai, le umia e le va’alele a le Pago Wings, lea na faimalaga atu i Samoa mai i le teritori, ia pemita e fa’atagaina ai le tu laue’ele’ele ai i laufanua o Samoa, e ui i ripoti a vaega fa’asalalau.

O le Pago Wings e pulea e Papalii Laulii Alofa ma le faletua ia Wanda Alofa.

I ripoti salalau, na fesiligia ai pe sa usitaia e le ‘Pago Wings’ ia tulafono a le malo o Samoa, i lana faimalaga mai i Pago Pago mo Faleolo, Apia, i le aso 19 o Iuni, 2024, na saunoa ai le afioga Olo, e tusa ai ma se lipoti mai i le ‘ch-aviation’ lea o lo’o gafa ma tautua tau fa’amaumauga mo le tele o kamupani vaalele, sa umia e le Pago Wings ia pepa po o pemita manaomia e faatinoina lana tautua.

Sa tu’ua’ia ia le ‘Pago Wings’ i le tausisi i tulafono tau i femalagaiga i luga o le ‘ea, a’o taumafai e amata sa latou auaunaga mo malaga togipau.

I le amataga o le tausaga sa masalomia ai lenei ofisa vaalele i le solia o tulafono, i a latou malaga togipau i le va o Pago Pago ma Manu’a, lea na mafua ai ona faia se su’esu’ega a le Ofisa Vaalele a Amerika (US FAA) pe sa solia e le Pago Wings ia tulafono tau femalagaiga i luga o le ea.  Sa faapea ona lagolago le Pago Wings i lea suesuega.

Faatasi ai ma le Pago Wings, o lo’o pulea foi e Papalii ma le faletua ia le ‘Pacific Air Charters’ i Honolulu.  Lea ua iai se talitonuga, o le a amata ona o’o mai la latou tautua i Amerika Samoa, e fa’aaogaina ai vaalele e ta’ua o le ‘Tecnam P2012s’, lea o lo’o lisiina e le Pago Wings le fa o a latou vaalele, ma se faamoemoega e toe faaopoopo leisi lua i le 12 masina o luma nei.

I tu’ua’iga na faia fa’asaga i le Pago Wings, o lo’o ta’ua ai lo latou le umia o se pemita mai i le ofisa vaalele i Samoa, e mafai ai ona tu lau’ele’ele i laufanua o Samoa i le lua vaiaso ua tuanai.

Na amatalia le suesuega ina ua failaina e le ofisa vaalele a le Samoa Airways, lea e tautuaina le teritori faapea ma isi motu, ia se fa’asea i le FAA e tusa ai ma femalagaiga a le Pago Wings, i le amataga o le tausaga.

E tusa ai ma se ripoti a le Samoa Observer, sa faamaonia mai e le Pule le tumau a le Samoa Airways, le susuga ia Fauo’o Fatu Tielu, lenei tulaga.

Ma sa patino le suesuega i femalagaiga le totogia i Amerika Samoa ia Ianuari, e fia faamaonia pe sa faataunu’uina i lalo o le Vaega 91 po o le Vaega 135, ma pe sa umia e le Pago Wings LLC ia se pemita e mafai ona faia ai ana faigamalaga.

Sa fa’alauiloa mai e le Pacific Air Charters lo latou lagolagoina o su’esu’ega sa faataunuuina ma o lo’o iai se faamoemoega o le a faamae’aina i se taimi lata mai.

Na fa’aalia e Olo i le Radio Samoa lona fa’asea i le Samoa Observer ma la latou ripoti e tusa ai ma lenei mataupu, ona e foliga mai e le’i atoatoa le fa’atinoga o la latou su’esu’ega.

E tusa ai ma le saunoaga a Olo, o le mafua’aga lea sa le’i finagalo ai e talanoa i vaega fa’asalalau e tusa ai ma lenei mataupu.

Ma na ia fa’amanino mai le iai o le pemita mo le faigamalaga togipau.  E pei foi o faigamalaga togipau a le ofisa vaalele a Hainan mai i Saina.

Na ta’ua ai foi e Olo ia feutagaiga o lo’o fa’ataunuuina nei, ma le faigamalo a Amerika Samoa, mo le toe fa’amautuina o se Maliliega i le va o malo e lua, aua femalagaiga i luga o le ea.

O lea Maliliega, e pei ona sa fa’amutaina i le 2019, na faafaigofie ai tulaga uma, mo femalagaiga i luga o le ea, i le va o Samoa ma Amerika, ma e ono taofia ai le toe manaomia o pemita e tu lau’ele’ele ai vaalele i mai Samoa i laufanua o Amerika Samoa, faapena foi i vaalele a Amerika Samoa.

O le amataga o le tausaga, sa fa’atula’i ai i luma o le fono faitulafono ia atugaluga e tusa ai ma le tatalaina i tua o vaalele a le Pago Wings, e aunoa ma le totogi atoa o lafoga fa’ae’e.

E tusa ai ma ripoti ina ua taunu’u mai le vaalele, e le’i kiliaina mai e Hawaii ma le FAA ia le vaalele, lea na mafua ai ona tutula’i mai ‘taitai o le malo’ ina ia mafai ai ona tatalaina i tua le vaalele.