VAEGA 96

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 96.

******************************************

Ua fiu le teine o Ruta e tafiti solo ae ua mau ai le loka a lona uso laititi o Naomi.  Manatua foi, o Naomi, o lo’o toleni i so’o se ituaiga fa’agatama o le kalake ma le fusu.  Ma ua na iloa lelei lava le auala e mafai ona taofi mau ai lona uso.  Aua ua iloa lelei e Naomi, e motu mai loa i fafo ia Ruta, afu loa ma le uo teine a si ona tuagane, o Iakopo, le tamaitai o Salome lea na alu atu e latou te faiaiga i lea afiafi.

“E ke va’ai ai Gaomi ae o’u mamulu, e le fasia Salome ae fasi oe!” o le tala lea a Ruta i lona uso laititi.

“E ke maga’o e ke alu i fafo e faapisa le mea, ae o lea fa’ako’a ke’a mai kua Dad mai le falema’i?  E ke iloa le mea e kupu pe a e faapisa le afiafi?” o le fesili mai lea a Naomi i lona uso.

Ua toe manatunatu le teine o Ruta ma ia iloa ai le moni o le faamatalaga a si ona uso laititi.  Ma e le o mana’o e toe tupu se mea i si o latou tama.  “Ia ua lelei! Ua laki le kamaikai le la i le po legei, oga o lo’u alofa ia Dad,” o le tala lea a Ruta na fa’ama’amulu mai ai loa o ia e Naomi.

Ua saofa’i a’e nei i luga ia Ruta mai i le mea na tatao ai i lalo e Naomi ma ia faapea mai, “Talofa i si o’u uso.  O le mea lena na e vave alu ese ai mai i le laulau?”

Sa lulu le ulu o le teine o Naomi ma ia faapea mai, “Ou te le o toe fefe ia Salome.  Ma ua ou fa’amagalo foi iai i lana mea sa fai, faatasi ma ana uo teine.  Ae e le faapea ai la, ou te mana’o e matou te ‘a’ai faatasi pe fa’afoliga mai e le’i tupu nei mea.”

Ua tago atu nei Ruta ma opo mai si ona uso ma ia faapea atu iai, “O lena e te iloa, e mafai lava ona ou tago e fa’aulu se tagi e fa’asaga i le tamaitai le la ona o ou mafatiaga mai i le vaitaimi na outou a’o’oga ai.”

Ua ata le teine o Naomi ma faapea mai, “E, o le a le aoga o lena tagi?  E na o le pau lava le mea e maua mai ai, o le toe fa’atepa o a’u i o’u taimi o tiga ma loimata maligi a’o o’u a’oga.  E lelei lava le fa’agalo o na mea.”

“Ae o le la ua fai ma ou supavaisa i le galuega,” o le tala lea a Ruta.  “E fa’afefea ona e galue fa’atasi ma le la aitu?”

Na toe ata Naomi ma faapea mai, “E le o a’u se teine laititi.  O lea lava e mafai ona fai la’u galuega.  Ou te le toe tu’ua se avanoa ia Salome e na te toe faoa se vaega e tasi o lo’u olaga.  Na gata mea na a’o matou laiti.”

A’o faia pea le talanoaga a le au uso lea i totonu o le potu, ae tu’itu’i atu loa le faitoto’a o le potu ma valaau atu lo la tina, le fafine o Eseta.  “Ruta, Naomi, o mai e fa’amavae ia Salome, o lea o le a alu!”

Na mimigi Naomi e le fia alu i fafo, ae ata leotele le teine o Ruta ma ia tago atu i le toso mai le lima o lona uso laititi ma faapea atu iai.  “Sau, sau ta o, se’i o’u matamata i ona foliga ma ana taga o le a fai.”

[E FAIA PEA]