Vaega 149

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi. Ae sagai mai loa, o le a toe sosoo atu le tatou Fagogo, “O OE O LO’U TAMA” i lona vaega e 149.

***************************************

Ua sauni atu nei le tamaitai o Ruta mo le aso o le faamasinoga apili a si ona tama, le tamaloa o Alesana, aua o ia lea ua fai ma loia a lona tama.

Ua tu’u le fa’amoemoega atoa o Ruta i le molimau finau a lona tama, faapea ma ana talosaga, o le a mafai ona i’u manuia ai le la taumafaiga.

Aua o lea ua le maua mai le molimau autu o a la finauga, o le tamaloa o Semi Tagaloa.

Ua o’o i le aso o le fa’amasinoga, ma e tasi lava le aso lea o lo’o tu’uina mai e finauina pe apili ai le fa’asalaga a Alesana.

Ma sa auai uma le fanau ma le to’alua, a le tamaloa o Alesana, o le tama o Iakopo ma le teine o Naomi, faapea ai ma le alii foma’i o Taki, ma le fafine o Eseta.  Ma sa fa’ate’ia foi le aiga ina ua faatasi atu ma le tina a le alii fomai o Taki.

Ae sa matua’i fa’ate’ia le aiga ina ua va’aia le teine o Salome, i totonu o le potu fa’amasinoga.

Ana le ‘I’ini e le teine o Naomi le vai o lona tuagane o Iakopo, semanu e le savali mai iai Iakopo ia Salome, e fa’afeiloai iai.

“Ou te le’i sau ona o oe, ae o lea ou te sau e lagolago taumafaiga a nai ou matua, aua sa o la fa’aalia lo la agalelei ia te a’u,” o le tala lea a Salome ia Iakopo.

Ma a’o nofo fa’atalitali tagata mo le ulufale atu o le alii faamasino, sa fa’ate’ia le tamaloa o Alesana, ina ua tepa mai i tua, ae nonofo atu loa se ulugalii matutua.  Na va’ai e Ruta le sui o foliga o lona tama, e pei ua va’ai i se aitu, ma ia musumusu atu iai i lona tama, “O okay oe Dad?  O mana’omia se foma’i?”

Ua lue le ulu o le tamaloa o Alesana ma toe fa’asaga aga’i i luma.  Ae ua ia musumusu atu i lona afafine.

“Aua e te tilotilo i tua, ae o le ulugalii matutua le la fa’ato’a saofafa’i mai i tua, o matua o le tamaititi mau’oa lea na maliu i le togi a Tanielu.”

[E FAIA PEA]