VAEGA 131

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

************************************

Na gata mai le tatou Fagogo i le vaiaso ua mavae, ina ua mae’a le fa’ato’esega a le tamaitai o Salome i le aiga a le tama o Iakopo, ae o le taimi lea e le o iai Iakopo i le fale.

O le upu mulimuli lava a Naomi ia Salome, aua e pei o le mafuaaga lea o le faatoesega a Salome, ona o le teine o Naomi, o le mamafa o le avega, o lo’o i luga ia Salome, e faitalia o ia ma saili se auala e fofo ai lana ia fa’afitauli ae aua le toe pala ina mai le latou aiga.

E savali ese atu Naomi, ae sau ia lona uso matua o Ruta ma fa’atu i luga ia Salome lea ua alu le po atoa o to’otuli i totonu o le potu malolo a le aiga, ma taitai atu o ia i le faitoto’a.

O le toe upu a Ruta ia Salome, “Afai ua e salamo faamaoni i lau mea sa fai, aua e te toe taumfai e toe fafagu mai i le mafaufau o Naomi po o o’u matua.”

Ma e fetaui lava le tatala mai e Ruta o le faitoto’a, ae o le taimi lena o lo’o tu mai ai i fafo ia lona tuagane o Iakopo, o lea fa’ato’a taunu’u i le fale, ae na alu le po atoa o fa’atalitali i luma o le fale a Salome.

“Salome! Ua leva na e sau?  Ae o le la ou te fiu e faatalitali oe i luma o lou fale,” o le oso mai lea a Iakopo.

Ua savali ese atu Ruta ae faapea atu Salome ia Iakopo, “Sau ta o e momoli a’u i le fale, e iai le mea e manaomia ona o ta talanoa ai.”

Na fai sina umi o alu le taavale a Iakopo ma Salome, ae va’aia lava e Iakopo foliga faanoanoa o lana teine.  Sa taumafai Iakopo e fa’a’ata ia Salome ae ua fiu e fai ana poka e le tali atu Salome.

“Iakopo, e iai le mea e tatau ona ou fa’ailoa atu ia te oe,” o le tala mai lea a Salome ma si ona tau le lagona.

Ua toe u agai i fafo o le faamalama ia foliga a Salome ona ua toe alu a’e foi le to o timuga o ona loimata.

“Iakopo, e le mafai ona fa’aauau le ta faigauo.  E tele tele la’u mea sese ua faia i totonu o le tou aiga, ou te le iloa pe fa’apefea ona toe faamagaloina ai a’u e nai ou matua,” o le tala lea a Salome.

Ai ana iai nisi taavale i tua mai o le taavale a Iakopo, semanu faapenei ua ta’atia i le falemai, i le ‘a’ai o lana taofi.

“O le a le uiga o lau tala Salome?  O le mea lena sa ou fiu ai e faatali mai oe i lou fale, ae o lea e te i’i i le matou fale?  Faamatala mai nei lava le mea ua tupu Salome,” o le ‘ava’avau atu lea a Iakopo.

Ua to le sela a le tamaitai o Salome ma amata loa ona ia faamatalaina le tala atoa i le la masaniga ma le tuafafine a Iakopo, si teine o Naomi.  Mai le taimi o la a’o’oga faatasi.

E o’o atu le faamatalaga a Salome i lona sauaina o Naomi, ua le manino se faamatalaga i le tagi masusu.

“Salome,” o le taumafai atu lea a Iakopo e faato’afilemu le tamaitai ona ua leotele ane lava lana masusu, ae ua le manino ai ma se faamatalaga.

“Po o le a lava le mea sa tupu i na vaitaimi, ua uma, ua pasi.  Vaai o lena ua oulua matutua ma faigaluega.  Ma ou te iloa foi lo’u aiga, e loto faamagalo,” o le tau faamafanafana atu lea a Iakopo ia Salome.

“E leai, e te le malamalama,” o le tali mai lea a Salome ma ia faamatalaina manino mai loa le mea sa ia faia ia Naomi a’o la a’o’oga faatasi.

Ua mae’a le faamatalaga a Salome, ona punou ai lava lea ma tagi, ae o le taimi lea ia Iakopo, ua le iloa pe ‘ata pe ita.

Ua tilotilo mai ia Salome, ona tepa lea i fafo o le faamalama o le taavale, ona toe tilotilo mai lea ia Salome.  Ma i’u ai lava ina ona ia tatalaina le faitoto’a o le taavale ma oso i fafo.

[E FAIA PEA]