Apia - SAMOA

Ua molia nei se tamaitai po o se tina talavou i Samoa, ina ua ia tia’iina sana masaga fa’ato’a fananau mai, i totonu o se lapisi, e pei ona fa’alauiloa e le Komesina o Leoleo, le afioga ia Auapa’au Logoitino Filipo, i sana faatalanoaga ma le Samoa Observer.

O moliaga ua molia ai lenei tina talavou, o le fasioti tagata le fuafuaina ma le fasiotia o ni ‘alu’alutoto e le’i atoa ni tausaga.

O le aso 24 o le masina nei, ua fuafua e tula’i ai le ua molia, i luma o le faamasinoga.  Ae ua mae’a ona fa’atulagaina se vaegatupe e mafai ai ona tatalaina ai o ia i tua, ma le faatonuga ina ia ripoti atu i le ofisa a leoleo i aso Lulu ma aso Faraile.

E tusa ai ma su’esu’ega a leoleo, sa ta’ua ai le nanaina e lenei tamaitai talavou o lona ma’itaga mai le latou aiga.  Ma sa ia fanauina se masaga, o se pepe tama ma se pepe teine, i totonu o le fale le ta’ua a le latou aiga.

Ae ina ua mae’a ona fananau ia le masaga, sa tia’iina e le tina fou i la’ua, i totonu o le lapisi.  Na iloa mulimuli ifo, ina ua faatopetope atu le tina fou i le falemai ina ua gasegase o ia.

O iina na fa’ailoa ifo iai e le falemai i lona aiga, le tulaga na o’o iai o ia ma toe faatopetope mai ai le aiga i le fale, ma maua ai le masaga i totonu o le lapisi, ae ua maliliu i la’ua.

O le moliaga o le fasiotia o se pepe e le’i atoa se tausaga, e mafai ona nofosala ai se tagata i le tolu tausaga i le falepuipui, ae o le faasalaga mo moliaga o le fasioti tagata ma le fasioti tagata le fuafuaina, e soloatoa ai se tagata, i le falepuipui.