Honolulu - HAWAII

O le aso Tofi o le vaiaso ua mavae, Me 16, 2024, na tula’i ai i luma o se faamasinoga faaleitumalo i Hawaii, ia le susuga ia Filimone Tavake, e tali i ona moliaga, i lana vaega, na mafua ai na maliu fasia se tagata i Hawaii, faapea ai ma lona so’otaga i le feavea’i o se vaega o fualaau faasaina.

E tusa ai ma faamaumauga a le Ofisa o Faamasinoga a le Malo Tele, o lo’o ta’ua ai le masalomia o Tavake, e 36 tausaga, mai i le a’ai o San Francisco, i le Setete o Kalefonia, i le fasiotia o se tagata e nofo i Hawaii, i totonu o lona lava fale.  Ma e mafua mai ona o taupulepulega mo le feavea’iina o se vaega o fualaau faasaina, o le Aisa.

O le aso 22 o Mati, na ave faapagotaina ai e leoleo ia Tavake, i totonu o Kalefonia.

O lo’o molia Tavake i lona umia, tauaveina faapea ma le fa’aaogaina o se la’au malosi (fana), ona o se soligatulafono na a’afia ai fualaau faasaina; ae le gata i lea, o le maliu ai o se tagata i le fa’aaogaina o lenei fanau; atoa ai ma moliaga o le fasiotia o se tagata, a’o faia ni taupulepulega mo le fa’atauina atu o se vaega o fualaau faasaina, o le Aisa.

Afai ae faamaonia nei moliaga, o le a mafai ona lokaina Tavake i le o’o atu i le 20 tausaga i le falepuipui, faataasi ai ma lona soloatoa i le falepuipui.

O lo’o su’esu’eina nei e le vaega a le FBI ma le Ofisa o Leoleo i Honolulu ia lenei faalavelave, ae o loia mo le itu a le malo, o Christina Taylor  faapea ma loia mai i le Ofisa o le Loia a le Malo Tele, i totonu o Hawaii.

Ua fa’alauiloa mai foi e le malo, ua na ona tu’ua’ia le ua molia i nei moliaga.  Ma o tagata uma e molia, e mama i latou mai so’o se solitulafono se’ia mafai ona faamaonia, e aunoa ma le toe masalomia, i totonu o se faamasinoga o tulafono.

I se tala’aga o lenei mataupu, e pei ona failaina i le faamasinoga feterale, o lo’o masalomia ai le iai o se sootaga i le va o le maliu fasia o se tagata i le a’ai o Ai’ea i le tausaga e 2021, i se faalapotopotoga o lo’o feavea’i ma faatauina atu, se vaega o fualaau faasaina, o le Aisa.

Ma o lea faalapotopotoga, na aofia ai Filimone Tavake ma le susuga ia Malakai “Mo” Maumalanga, lea ua maliu, ina ua fanaina e se tasi i luma o lona fale i Ai’ea.

O Maumalanga, ua loa ona avea ma faufautua mo fanau talavou e i totonu o faalapotopotoga (gangs), ae peitai, e pei ona ta’ua i lipoti a vaega fa’asalalau i Hawaii, e le’i taofia ai lava le auai o Maumalanga i nei ituaiga faalapotopotoga.

Sa ta’ua i se lipoti na lomia e le Hawaii News Now, o Tavake sa sapalaia Maumalanga ma fualaau faasaina (Aisa), mo le faatauina atu i tagata lautele.

Ma sa faapea ona mauaina e vaega su’esu’e a le malo, ia se vaega o fualaau faasaina, pe a ma le valu pauna le mamafa, i le fale a Maumalanga.  Ma sa su’esu’eina ma faamaonia ai, o le Aisa.

Ua ta’ua e loia a le malo, afai ae na mafai ona faatauina atu nei Aisa i tagata, e ono mafai ona maua ai se vaegatupe pe a ma le $36,000 i le $44,000.

O lo’o fa’aauau ona ta’ua i faamaumauga a le malo le fasioita e Tavake o Maumalanga ina ua le mafai ona totogia e Maumalanga ia tupe mo nei Aisa, mai ia Tavake.

E pei ona sa faamanino e se alii leoleo litaea, le susuga ia Tommy Aiu, lea foin a galue i vaega su’esu’e a le malo feterale, afai ae maua i totonu o se fale a se tagata ia ni fualaau faasaina se tele faapea, o lona uiga, sa taumafai le tagata e ana nei Aisa e ao lana tupe.  Ma o iina lea sa faamaonia ai, le maliu o Maumalanga ona o fualaau faasaina.

Sa ta’ua foi e le alii loia litaea o Alexander Silvert, o lea ua fa’aalia mai e le malo le mafuaaga o le fasiotia o lea tagata, ina ia mafai ona faamanino isi vaega o lenei solitulafono, lea ua iloa ai sa a’afia ai fualaau faasaina ma sa fa’aaogaina ai se fana.

Sa ta’ua foi i faamaumauga a le malo, le suesueina e vaega su’esu’e a le malo ia faamaumauga o le telefoni feavea’i a Maumalanga, ma sa faamaonia ai le tele o feso’ota’iga i lo la va ma Tavake.