Ads by Google Ads by Google

​Molia se alii i le faia o sauaga i lona to’alua ma le umia o fualaau faasaina


[ata: SN]
ausage@samoanews.com

  Pago Pago, AMERIKA SAMOA - E 44 tausaga o se Tama ua molia e le malo i le faia o sau’aga faasaga i lona to’alua ma lana fanau, atoa ai ma tu’uaiga o lona umia faasolitulafono o fualaau fa’asaina i le taimi na pu’e faapagota ai o ia.

 

O le 3 vaiaso talu ai ona tula’i ai le ua molia i luma o le Fa’amasinoga Faaitumalo, ma ia talosagaina ai le Fa’amasinoga e faatulaga se aso e faia ai lana ulua’i iloiloga. 

 

O moliaga ua faia faasaga i le alii ua molia e aofia ai le moliaga e tasi o lona umia faasolitulafono o vaega o le pauta faasaina o le aiga, tasi le moliaga o lona faaaoga faasolitulafono o se aupega, tasi le moliaga o le faaoolima i le tulaga lua, o vaega uma ia o solitulafono mamafa, atoa ai ma moliaga e 2 o le faia o gaioiga e ono lamatia ai le saogalemu o fanau laiti, o le vaega A lea o solitulafono mama.

 

E $20,000 lea ua fa’atulaga e le Faamasinoga e tatala ai i tua le ua molia. Afai ae mafai ona tatala o ia i tua, e le mafai ona ia toe taumafai e faafesootai lona to’alua ma lana fanau, ma ia saili foi se isi nofoaga e nofo ma aumau ai a o faagasolo ai taualumaga o lana mataupu. 

 

TAGI A LE MALO

 

O lenei mataupu na tofu atu i le Ofisa o Leoleo i Tafuna, ina ua talosagaina e le Tina na aafia se fesoasoani a Leoleo, i le mae’a ai lea ona faaoolima o lona to’alua ia te ia faapea ai ma lana fanau. O le popole tele o le Tina i le saogalemu o lana fanau, na ia talosagaina ai Leoleo ina ia faia se auala taofia ai lona to’alua ma aveese mai i lo latou fale. 

 

O le ulugalii ma le la fanau e nonofo mau totogi i se fale i Tafuna, ae na taua e le Tina na aafia, ua silia i le 3 vaiaso talu ona alu ese lona to’alua ma le latou aiga ae aumau ma ona matua i Ottoville. 

 

E to’atele Leoleo na tali atu i le valaau ma maua ai le avanoa e fesiligia ai le Tina na aafia e uiga i lenei mataupu. 

 

Na taua e le Tina i Leoleo e fa’apea, i le masina na te’a nei, Me aso 31 i le itula e 11:30 i le po, na faateia ai o ia ina ua tatagi lana telefoni a o latou taotooto ma lana fanau i totonu o le latou fale. Na ia tago ma tali le telefoni ma ia iloa ai, o lona to’alua lea ua valaau atu ma fesiligia o ia e faatatau i le la mafutaga faalilolilo ma se tasi o alii o le latou pitonuu i Tafuna lava.

 

Na fai le Tina i lona to’alua e soia le toe faalavelave soo atu ia te ia, e le o i ai fo’i ni mafutaga faalilolilo o ia faia ma nisi Tamaloloa. 

 

Pe tusa o le afa itula talu ona mae’a le la talanoaga ma lona to’alua, ae faafuase’i loa ona tatala atu e se tagata le faitoto’a o le latou fale ma ia vaaia ai lona to’alua o loo savali telea’i atu i totonu o le fale ma aga’i sa’o atu loa i totonu o le potu lea o loo taoto mai ai ma se’i ese lana telefoni ae togi i lalo ma malepe ai ao matamata i ai lana fanau laiti e to’afa.

 

Sa ia fesili i lona to’alua pe aisea ua ia faia ai nei uiga ia te ia ae na toe tago atu lona toalua ma futi lona ulu ma ta tu’i ona foliga ma lona tino. Na taumafai le Tina e tu i luga e tamo’e i fafo peita’i na taofi e le ua molia o ia i lalo ma folafola lona fasiotia o ia pe afai ae sola ese. Na taua fo’i e le Tina le tago atu o lona to’alua ua fasi lana fanau e to’alua ina ua fetagisi i laua i le fefefe.

 

Na savali le ua molia i fafo ma le fale ma talanoa i le telefoni ao i ai pea le Tina ma lana fanau i totonu o le fale. Na toe fo’i le ua molia i totonu o le fale ma fesiligia lona to’alua e uiga i le Tamaloa lea o loo la mafuta, ae na tali i ai le Tina na aafia, e leai se Tamaloa o loo la mafuta i lenei taimi, e na o ia lava ma lana fanau.

 

O iina na folafola ai loa e le ua molia i lona to’alua lona fasiotia o ia ma le Tamaloa i le taimi lava na te mauaina ai i laua i totonu o le fale, poo se isi lava fo’i nofoaga i totonu o Amerika Samoa. 

 

I le po atoa lea e pei ona taua e le Tina i Leoleo, e le i mafai ai ona latou o ma lana fanau i se isi lava mea, ona sa taofi faapagota o ia e le ua molia i totonu o le fale.

 

O le taeao na sosoo ai, aso Gafua, aso 1 o Iuni, 2020 na tapena ai loa le Tina e alu e faigaluega ma momoli lana fanau i lona uso e tuu ai. Na faatonu e le ua molia lona to’alua e tuu le la tama matua e 8 tausaga la te faamuli atu i le fale, ae ave tamaiti e to’atolu i lona uso e tuu ai. 

 

A o le i tuua e le Tina le fale, na faatonu e le ua molia o ia, e aua ne’i talanoa i soo se tagata e uiga i le mataupu na tula’i mai i lo la aiga i le po ua mavae. Afai na te ta’uina i se tasi le mea sa tupu e aofia ai ma Leoleo, o le taimi fo’i lea na te fasiotia ai o ia.

 

Ina ua mae’a ona tuu e le Tina lana fanau laiti i lona uso, na ia aga’i atu ai loa i lana galuega e pei ona masani ai. O iina na ia filifili ai loa e logo Leoleo e uiga i lenei mataupu. 

 

O le mae’a ai ona fesiligia e Leoleo o le Tina na aafia, na latou aga’i atu ai loa i le fale o matua a le ua molia i Ottoville e saili mai ai le ua molia, peita’i e le i maua e Leoleo o ia i le aso. Na faailoa e ona matua i Leoleo, ua 3 aso talu ona tuua e le ua molia le latou fale, e lei toe oo atu lava.

 

O le tuana’i ai o le vaiaso e tasi talu ona tula’i mai lenei mataupu, ae toe aga’i loa Leoleo e saili mai le ua molia, ma maua atu ai o ia i le nofoaga o loo faigaluega ai. A o le i auina atu le ua molia i le Ofisa mo le faatalatalanoaina o lenei mataupu, na muamua saili e Leoleo lona tino poo i ai ni fualaau faasaina poo ni a’upega.

 

Ina ua saili e Leoleo le taga o le ofu a le ua molia, sa latou maua i ai se pepa iila o lo o i ai vaega o le pauta faasaina o le aiga. 

 

Ina ua fesiligia e Leoleo le ua molia e tusa ai o vaega o le fualaau faasaina sa maua ia te ia, na ia ta’utino ai e fa’apea, o le pepa na avatu e lana uo lea na alu atu e momoli atu o ia i le galuega. Na musu le ua molia e faailoa i Leoleo le igoa o lana uo ae o fea fo’i e nofo ai o ia.

 

Ae ina ua fesiligia i le faalavelave e faatatau i lona to’alua ma lana fanau, na faafuase’i ai loa ona tagi le ua molia ma faatoese i Leoleo, e tusa ai o amioga sa ia faia i lona to’alua ma si ana fanau. Na taua e le ua molia e fa’apea, e tele lava faafitauli o loo tula’i mai i totonu o lona aiga, aemaise ai lava le va o ia ma lona to’alua. 

 

Ae ui i nei mau faafitauli, e le o i ai lava sona manatu e faia ni tulaga matuia pe fasioti lona to’alua ma lana fanau. O ana folafolaga sa faia, ua na o ni folafolaga lava sa ia lafo ina ia faafefe ai lona to’alua, ma taofia ai o ia mai le la mafutaga ma le Tamaloa o loo masalomia le fai ma alu i ai.

 

Na faataga e le Tina na aafia Leoleo e saili le latou fale i Tafuna, pe maua ai ni isi vaega o fualaau faasaina sa tagofia ma faaaoga e lona to’alua. I totonu o le potu lea sa nofo ai le ua molia, na maua i ai e Leoleo pepa iila e fa’aaoga e utu ai le pauta o le aisa.