Ads by Google Ads by Google

Molia se alii 58 tausaga faia uiga mataga i se tamaitai e 14 tausaga

ausage@samoanews.com

E 58 tausaga o se Tama na pu’e faapagota e Leoleo i le vaiaso na te’a nei mai lona aiga i Ottoville, ona o tu’uaiga i lona faia lea o gaioiga faafeusuaiga faamalosi i se tamaitai aoga e 14 tausaga le matua, o lona niece.

 

[O le a le mafai ona faalauiloa e le Samoa News le suafa o le ua molia i lenei mataupu, ona o puipuiga i le ono iloa atu ai ma le tamaitai o lo o aafia i lenei mataupu.]

 

O le vaiaso na te’a nei na tula’i ai le alii ua molia i luma o le Fa’amasinoga Faaitumalo mo lana ulua’i iloiloga.

 

Ua molia o ia e le malo i moliaga mamafa e aofia ai le moliaga e tasi o le faiaiga faamalosi i se tamaitai; 2 moliaga o le faia o uiga mataga faasotoma; ma moliaga e 2 o le tagofia o itutinosa o se tamaitai e talavou i lalo o le tulafono.

 

E $50,000 le tupe lea ua fa’atulaga e le afioga i le ali’i Fa’amasino ia Elvis P. Patea e totogi ona faatoa mafai lea ona tatala le ua molia i tua mai le Toese i Tafuna.

 

O le taeao nei, aso 20 o Fepuari lea ua faatulaga e tulai ai le ua molia i luma o le Faamasinoga Maualuga, ina ua ia faaagafua ona aia tatau ma ia manatu ai e aua nei faia lana ulua’i iloiloga lea na fuafua e faia i luma o le afioga i le alii Faamasino ia Patea.

 

TAGI A LE MALO

 

O lenei mataupu na tofu atu i le Ofisa o Leoleo i Tafuna, ina ua ulufale se Tina ma ni tamaitai talavou se to’alua ma faila sa latou tagi faasaga i le alii ua molia, i lona faia lea o uiga mataga i le tamaitai aoga e 14 tausaga le matua na aafia.

 

O le tamaitai na aafia i lenei faalavelave, e nonofo ma lona uso i le fale o le la aunty ma lona to’alua i Ottoville, ae o la matua o lo o aumau i Samoa.

 

Na taua e le Tina i Leoleo e fa’apea, o le aso 23 o Ianuari na tulai mai ai lenei faalavelave, ina ua tuua nao le tamaitai na aafia i le fale, ma maua ai loa le avanoa o le alii ua molia e alu atu ai i le fale ma ia faia uiga mataga i le na aafia.

 

O le ua molia, o le uncle o le tamaitai ua aafia, e nofo i le fale e tuaoi lava ma le fale o le tamaitai na aafia.

 

E pei ona taua e le malo i le latou tagi e fa’apea, o le aso na tula’i mai ai le faalavelave, na alu ai le tamaitai na aafia i le aoga, peitai na toe foi i le latou fale ina ua ia misia le pasi aoga. Sa faatonu loa e lona aunty le tamaitai na aafia, e alu i le faleoloa e fai mai le faatau mo nisi o mea e manaomia.

 

Ina ua fo’i mai le tamaitai na aafia mai le faleoloa, ae la fetaui ai loa ma le ua molia o loo savali atu foi o ia e alu i le faleoloa. Na fai si umi ona faia talanoaga a le ua molia ma le tamaitai na aafia i luga o le alatele, ma iloa ai loa e le ua molia, e le o aoga le tamaitai na aafia, nao ia foi o loo i ai i le fale.

 

A o pisi ai le tamaitai na aafia e tapena totonu o le umukuka ma tapena lana ti o le taeao, na faateia o ia ina ua ulufale atu le ua molia i totonu o le fale, ae oso atu i le faitotoa pito i tua o le fale.

 

Na alu atu le ua molia ua saofai i luga o le nofoa o le laulau ‘ai ma amata loa ona talatalanoa atu i le tamaitai na aafia.

 

A o pisi le tamaitai na aafia e fufulu ipu i luga o le sink, na faateia o ia ina ua opo atu e le ua molia o ia ai tua, ma amata ai ona faasolo atu lima o le ua molia i lona fatafata. Na una’i ese e le tamaitai na aafia le ua molia ma savali ese atu i le isi itu o le fale, peitai na tago atu le ua molia ua toso mai le lima o le tamaitai na aafia ma faapipii atu lona tino ia te ia ma kisi atu i ai.

 

Na umi se taimi o faia e le ua molia nei uiga i le tamaitai na aafia, e aofia ai lona tagofia o ona itutinosa, peitai sa taumafai malosi foi le tamaitai na aafia e unai ese le ua molia.

 

Na i’u lava i le tago atu o le ua molia ua toso faamalosi le lima o le tamaitai na aafia ma unai loa o ia i totonu o le potu. O iina lea na tulai mai ai loa le faalavelave e pei ona tuuaia ai e le malo le ua molia i lona faamalosi lea ona faiaiga i le tamaitai na aafia.

 

Na taua e le tamaitai na aafia i Leoleo, ina ua la taunuu i totonu o le potu, sa faamalosi loa ona tatala ese e le ua molia ona lavalava ma taumafai e faataoto o ia i luga o le moega, peita’i sa ia finau malosi foi e unai ese o ia ma taumafai e tu i luga.

 

E lei mafai e le tamaitai na aafia ona tatali le malosi o le ua molia, ma iu ai loa i lona taoto ai loa i luga o le moega ao faamalosi e le ua molia feusuaiga ia te ia. O le pao leotele o le moega na manatu ai loa le alii ua molia e taofi lana gaioiga mataga o lo o faia.

 

Ina ua maea ona faatino e le ua molia le solitulafono e pei ona tu’uaia ai o ia, sa ia faatonu le tamaitai na aafia e aua nei ona talanoa i soo se tasi e uiga i le mea sa tupu, e aofia ai lona aunty ma nisi o le latou aiga.

 

Na folafola  e le ua molia i le tamaitai na aafia lona faia o se mea e sili atu ona leaga ia te ia ma lona uso, pe afai na te faailoa i soo se tagata le mea sa tupu. Sa ia folafola foi i le tamaitai na aafia, na te faia soo se mea e manao ai aofia ai ma lona avatu o tupe ia te ia, pe afai na te le faailoa i se tasi le mea sa tupu.

 

Na taua atili e le tamaitai na aafia i Leoleo, e le o le taimi muamua lea ua faia ai e le ua molia uiga mataga nei ia te ia. I le vaiaso muamua lava o Ianuari na te’a nei, na faateia ai o ia ao faamuli na o ia i le fale ina ua ulufale atu le ua molia e aunoa ma lona tuitui o le faitoto’a, ma fesili atu pe na te manaomia se meaai.

 

Na tuu atu e le ua molia le $50 ia te ia, ma faatonu o ia e alu i le faleoloa e faatau soo se mea e manao ai i le $20, ae totoe atu lana sui e $30.

 

E foi mai le tamaitai na aafia i le fale, o lo o tu atu le ua molia i totonu o le fale e aunoa ma ni ona lavalava o faia, ma fai atu ia te ia e alu atu e tago atu i lona totogasa (tulou).

 

Na fefe le tamaitai na aafia peitai na tago atu le ua molia ua toso atu lona lima ae tuu i lona totoga sa.

 

Ina ua fesiligia e Leoleo le ua molia e uiga i lenei mataupu, sa ia ioeina ai lona tagofia o itutinosa o le tamaitai na aafia, peita’i sa ia teena tu’uaiga e faapea na ia faiaiga faamalosi ia te ia i totonu o le potu.

 

Na taua atili foi e le alii ua molia i Leoleo, o le tamaitai na aafia le mafuaaga o mea uma, o ia lea na fai atu ia te ia e alu atu i le fale i le taeao lea.

 

E pei ona taua i faamaumauga a le Fa’amasinoga Faaitumalo, o le tausaga e 2007 na tausala ai le ua molia i moliaga mama e lua o le faaoolima i le tulaga tolu, e mafua mai i le faalavelave lea na ia tagofia ai itutinosa o se tamaitai i se auala faafeusuaiga.