Ads by Google Ads by Google

Molia ni ali’i se to’alua i lo la fa’aoolima i se isi ali’i ma manu’a tigaina ai

ausage@samoanews.com

E to’alua ni ali’i na pu’e fa’apagota e Leoleo i le vaiaso na te’a nei, ona o tu’uaiga i lo la fasi fa’amo’amo’a lea o se isi ali’i, e mafua mai i le pusa mea faigaluega na faafoi e le ali’i na a’afia na te fa’aaogaina i lana galuega kamuta, peita’i ua tele masina e le i toe fa’afoia.

 

O i laua e to’alua ua molia nei e le malo e aofia ai Naasona Valoaga ma le susuga a Filipo Semeatu. Na tutula’i i laua i luma o le Fa’amasinoga Fa’aitumalo i le vaiaso na te’a nei mo le ulua’i taimi.

 

O lo o molia i laua nei i moliaga o le faaoolima i le tulaga lua ma le taofia faapagota o se tagata, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala i le salatupe e le sili atu i le $5,000, poo le fa’asala fo’i i fa’asalaga uma ia e lua; faapea fo’i ma le moliaga mama o le faaoolima i le tulaga tolu, o le vaega A lea o solitulafono mama, lea e mafai ona fa’asala ai se tasi i le toese mo le umi e le sili atu i le tasi le tausaga, pe fa’asala i le salatupe e le sili atu i le $1,000, poo le fa’asala fo’i i fa’asalaga uma ia e lua.

 

O le vaiaso nei lea ua fa’atulaga e tutula’i ai i laua nei i luma o le Fa’amasinoga mo le la ulua’i iloiloga.

 

E ta’i $20,000 lea ua fa’atulaga e le Fa’amasinoga e totogi ona faatoa mafai lea ona tatala i laua nei i tua mai le toese.

 

TAGI A LE MALO

 

Pe tusa o le itula e 9:10 i le po o le aso 20 o Aokuso na te’a nei, ae logoina loa e se Tina le Ofisa o Leoleo i Tafuna mo se fesoasoani, ona o ni ali’i se to’alua sa la faaoolima i se isi ali’i ma manu’a tigaina ai o ia.

 

O le ali’i na manu’a, o se Tama e 46 tausaga o lona soifua, e to’a 5 ona alo, ae faigaluega fo’i o ia o se Kamuta i se tasi o Konekarate Faufale i totonu o le atunu’u.

 

E taunu’u atu Leoleo Suesue i le nofoaga na tula’i mai ai le fa’alavelave, o lo o galulue mai ai sui o le vaega a le EMS i le tau togafitiina o le ali’i na a’afia, ona o manu’a tuga e pei ona a’afia ai lona ulu ma ona foliga.

 

Na taua i ripoti a le malo le taunu’u atu o sui o le EMS, o lo o taatia le na aafia i lalo, o lo o i ai ni manu’a tuga i lona tino, o lo o manava fo’i o ia ae le o mafai ona tali ane i sui o le EMS i le taimi na taumafai ai e fesiligia o ia i le tulaga o ona manu’a.

 

O tagata sa i ai i le taimi o le fa’alavelave na latou tuuina atu i Leoleo Suesue ni isi o fa’amatalaga e fesoasoani ai i le latou suesuega. Na taua e se tasi o molimau i Leoleo e fa’apea, o ni ali’i se to’alua sa faia se la inugapia i le nofoaga i autafa lava o le Faleoloa, o i laua ia na faaoolima i le ali’i ua manu’a.

 

O le mae’a ai ona faia o togafitiga a sui o le EMS mo le ali’i na manu’a i le nofoaga na tula’i mai ai le fa’alavelave, na tuuina atu ai loa o ia i totonu o le Ta’avale Falema’i ma faanatinati atu loa o ia i le Falema’i i Fagaalu mo togafitiga, ae fa’aauau ai suesuega a Leoleo Suesue e tusa ai o lenei fa’alavelave matuia.

 

Na taua e se tasi o molimau i Leoleo e fa’apea, a o i ai i totonu o le Faleoloa, sa ia faalogoina le feei atu oni tagata i fafo i le vaega e paka ai ta’avale. Sa ia tamo’e mai i fafo ma ia vaaia ai ni ali’i se to’alua o loo la fasi se isi ali’i.

 

Ae na taua e le isi molimau i Leoleo e fa’apea, na te iloaina lelei lava le alii o Naasona Valoaga, lea na to’alua ai ali’i na fasia le ali’i na aafia, o lana masani lava lea i le tele o afiafi, o le inupia ma nisi o ana uo i le fale tuufua o loo i le isi itu o le Faleoloa Asia lea na tula’i mai ai le fa’alavelave.

 

O le molimau lona tolu na fesiligia e Leoleo, sa amata ai loa ona tau manino mai Leoleo i le mea tonu sa tula’i mai i lenei mataupu.

 

Na taua e le molimau lona tolu i Leoleo e fa’apea, pe tusa o le itula e 4:31 i le afiafi o le aso lea, ae vaaia loa le amata mai o le inugapia a Naasona ma Filipo i totonu o le tama’i fale tuufua o loo i le isi itu o le Faleoloa.

 

E fai lava ma aga’i atu Naasona i totonu o le Faleoloa e fa’atau mai a la fagupia ma Filipo, faapea ai ma nisi o mea’ai mo laua.

 

Pe tusa o le itula e 8:30 i le po o le aso lava lea, ae vaaia loa se ta’avale pikiapu lanu enaena ua aga’i atu ma paka i luma tonu lava o le tama’i fale tuufua o loo faia ai le inugapia a Naasona ma Filipo, ma vaaia ai se ali’i ua oso mai i fafo o le ta’avale ma savali aga’i atu i totonu o le Faleoloa.

 

O le ali’i lea na oso i fafo ma le ta’avale ae amata ona savali aga’i atu i le faleoloa, o ia tonu lea na manu’a i lenei fa’alavelave.

 

A o aga’i atu le na a’afia i le Faleoloa, sa valaau atu i ai Naasona e fa’apea, “Uso, o afea e toe faafo’i mai ai le ta pusa faigaluega na e sau faanaoi atu.” Na taua e le molimau i Leoleo Suesue e fa’apea, na lagona e le na aafia le valaau, ma foliga mai ai na te iloaina le leo o le tagata o loo valaau atu, o le mafua’aga lea na liliu ai loa le ali’i na aafia ma savali aga’i atu i tua i le fale tuufua i le mea na valaau atu ai le tagata ia te ia.

 

E le i umi ona i ai le ali’i na aafia i tua i le fale tuufua o loo faia ai le inugapia a Naasona ma Filipo, ae faalogoina loa ua fasi mai o ia e i laua ua molia, e pei ona taua e le molimau i Leoleo Suesue.

 

E tolu aso talu ona tuana’i le fa’alavelave ae maua loa le avanoa o Leoleo Suesue latou te fesiligia ai le ali’i na a’afia e tusa ai o lenei fa’alavelave, a o taoto ai o ia i le potu tigaina i le falema’i i Faga’alu.

 

Na taua e le ali’i na a’afia i Leoleo Suesue e fa’apea, o ia na alu e fai lana fa’atau i le faleoloa, ae faafuase’i ai ona valaau atu Naasona ia te ia poo afea e toe faafo’i atu ai lana pusa faigaluega na alu atu ma faanoi e fa’aaoga i lana galuega.

 

Na ta’utino le na a’afia i Leoleo Suesue, e sa’o na alu ma faanoi mai le pusa faigaluega a Naasona, peita’i e lei toe faafoia lava, ona ua i ai mea faigaluega ua leiloloa, na aveese e le tagata mai tua o le keli o lana pikiapu faigaluega.

 

Na taua e le ali’i na a’afia i Leoleo Suesue e faapea, ao latou talatalanoa ma Naasona ma le isi ali’i, na faafuase’i ona tu’i e Naasona lona auvae ma palasi ai loa i lalo ua matapogia. Na avea le toe kiki e Naasona o lona ulu ma itu na toe te’i a’e ai, ma ia vaaia ai Naasona ma lana uo o loo fasi o ia.

 

Na taofi e le uo a Naasona ona lima ina ia le mafai ai ona ia tuua le fale, ae fasi e Naasona o ia e ala i lona ta tu’i o ona foliga.

 

O se filifili na uu e Naasona, na tago atu lana uo ua aveese mai ae sasau atu ia te ia ma manu’a ai le itu agavale o ona foliga. Ina ua mae’a, ona tago lea o le uo a Naasona i le filifili ma titina ai lona ua seia oo lava i lona le toe iloa o se isi mea.

 

Ina ua fesiligia e Leoleo Suesue ia Naasona ma Filipo, sa la ioeina ai tu’uaiga uma fa’asaga ia te i laua. Na taua e Naasona e faapea, o lona ita tele i le ali’i na aafia i le leva na alu ma lana pusa faigaluega, na mafua ai loa ona ia faaoolima ia te ia.