Pago Pago - AMERIKA SAMOA

E fa faitauga o moliaga ua faasaga i se tamaloa e 46 tausaga lea na molia i se faalavelave na tupu i le po o Novema 2, 2024, ina ua tu’ua’ia i lona faalala o se agaese i tagata o lona aiga.

[Ua le lomia suafa o i latou na a’afia ma ua molia i lenei faalavelave, ona o le puipuiga o fanau iti sa a’afia i lenei mataupu.]

E tusa ai ma fa’amaumauga a leoleo ua ta’ua ai le valaau mai o se tamaitai na valaau mai i le Ofisa a Leoleo i le po o Novema 2, 2024 ona o se vevesi na tupu i le fale o le latou tuaoi ma le va’aia o le ua molia, o lo’o fa’asuaava, ae o lo’o fa’alala se agaese, a’o agai atu i le fale o lona tina.

Ina ua taunu’u leoleo i le nofoaga na tupu ai le faalavelave, sa va’aia le ua molia i luma o se faleaiga ma na ave faapagota mai ai o ia e leoleo ma aveina atu i le Ofisa Leoleo i Tafuna mo suesuega.

Sa faapea foi ona faatalanoaina e leoleo ia le tamaitai na valaau atu i le ofisa ma sa ta’ua e le tamaitai e faapea, e le’i iai o ia i le taimi na tupu ai le faalavelave, ae na ia lagonaina le palauvale leotele o le ua molia.  Ma na ta’ua foi e le tamaitai le talosagaina o ia e se tagata o le aiga na tupu ai le faalavelave, ina ia valaau leoleo mo se fesoasoani.

O lea lava afiafi na su’esu’eina ai e leoleo ia se teineititi e 15 tausaga le matua, na a’afia i lenei faalavelave ma sa faamatalaina e le teineititi le lafoina e lona ‘uncle’ (le ua molia) o ni faamatalaga taufa’afefe i lona (teineititi) tama, e aofia ai le fa’aaogaina o le agaese na u’uina e le ua molia, e fa’ao’o ai ni manu’a i  le tama o le teineititi.

Sa faamatalaina foi e le teineititi na aafia ia le savali atu o le ua molia ma sasalu le agaese i le puipui o le fale.  Ma a’o tu o ia i tua o lona tama, sa ia vaaia lona ‘uncle’ (le ua molia) o lo’o tu mai i fafo o le fale ma le agaese.  

Ma e fa’alua ona sasalu e lona ‘uncle’ ia le agaese e fa’afefe ai lona tama, ae o le lona tolu o ana sasau, na o’o mai ai le agaese i le mea o tu ai lona tama i totonu o le fale.

Ae sa misi lona tama, ona na oso ese, ae toeititi lava ona (teineititi) lavea ai, ona o ia lea sa tu i tua o lona tama.

Sa faapea foi ona fa’atalanoaina e leoleo ia le tina o le ua molia ma sa ta’ua e le tina le alu atu o le ua molia i le latou fale ma palauvale atu ia te ia, a’o iai i totonu o le fale.  Ma sa faapea foi ona tau’aveina e le ua molia ia se agaese i le taimi sa ia faatupu vevesi ai i le latou fale.

Na tagi le tina ma fa’ailoa atu i leoleo, e le o toe mana’o e nofo pe latalata atu le ua molia (lona alo), i lo latou aiga, aua e le o se taimi muamua lea ua ia faia ai lea tulaga.  

O se taimi mulimuli ane na faapea ona faatalanoaina ai e leoleo ia le tua’a o le tamaitai 15 tausaga, lea foi na a’afia i lenei faalavelave.  Ma ia ta’ua ai faamatalaga taufa’amata’u sa lafoina atu e le ua molia, ia te ia ma le taumafai o le ua molia, e fa’afefe o ia i se agaese.  E le gata i lea, sa faamautuina e lenei molimau ia le faamatalaga a lona afafine 15 tausaga, i le toeititi ona lavea o lona afafine i le sasau a le ua molia.

Na taumafai leoleo e saili le agaese lea na ta’ua e molimau ae peitai, sa le’i maua se agaese.

Ina ua taunu’u leoleo ma le ua molia i le ofisa a leoleo i Tafuna sa faapea ona faia ai se faamatalaga a le ua molia.

Ma na ia faamaonia lona fa’afefeina o le tua’a a le teineititi i se agaese ma lona palauvale, ae ua mafua lea tulaga, ona o se fe’ese’esea’iga i lo la va ua leva ona tupu i le va o le ua molia, le alii na a’afia faapea ma lona tuafafine.  E pei ona ta’ua e le ua molia, na talu lava ona nonofo i le fale o lona tina, latou te faafoliga mai o latou e ana le fale.

Ua molia nei lenei alii i moliaga e aofia ai le Faatupu Vevesi i totonu o lona aiga (sauaga i totonu o le aiga) faapea ma le Fa’ao’olima i lona tulaga e tolu.  O nei moliaga, o ni vaega ‘C’ o solitulafono mama ma e mafai ona nofosala ai i le falepuipui i le o’o atu i aso e sefululima, po o se sala tupe i le va o le $150 ma le $300; po o faasalaga uma e lua.

E le gata i lea, ua molia foi o ia i le Fa’ao’olima i lona tulaga e tolu (sauaga i totonu o le aiga) ma le Faia o ni gaioiga e a’afia ai le saogalemu o fanau iti, o se vaega ‘A’ o solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

E $1,000 na faatulagaina e mafai ona tatalaina ai le ua molia, e faatalitali ai lona faamasinoga.