Pago Pago, AMERIKA SAMOA - 

O le ali’i e 39 tausaga le matua lea na pu’e faapagota e Leoleo ona o tu’uaiga i lona faaoolima lea i lona to’alua muamua ua mae’a ona la tete’a faaletulafono, ua molia  neio ia i lona umia o fualaau faasaina, ona o vaega o fualaau fa’asaina na maua e Leoleo ia te ia i le taimi na pu’e faapagota ai o ia.

O le masina na te’a nei na tula’i ai lenei ali’i i luma o le Faamasinoga Faaitumalo mo lana ulua’i iloiloga.

E 2 tagi eseese ua faila e le malo fa’asaga i lenei ali’i. I le tagi muamua, ua molia ai lenei alii i le moliaga o le faaoolima i le tulaga lua, tasi le moliaga o le ulufale faamalosi i totonu o se fale e aunoa ma se faatanaga, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe faasala fo’i i faasalaga uma ia e lua, faapea ai ma le moliaga e tasi o le faatupu vevesi i nofoaga faitele atoa ai ma le faaoolima i le tulaga tolu, o le va A lea o solitulafono mama.

I le tagi lona lua faasaga i le ali’i ua molia, ua tu’uaia ai nei o ia i le moliaga e tasi o le umia faasolitulafono o vaega o le pauta faasaina o le aisa, atoa ai ma le moliaga e tasi o le umia faasoliltluafono o vaega o le laau o le mariuana, o solitulafono mamafa ia e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atui le $20,000, poo le faasala fo’i i faasalaga uma ia e lua.

E $15,000 le vaega tupe lea ua fa’atulaga e tatala ai i tua le ua molia.

Afai ae tatala o ia i tua, e le mafai ona toe talu e faafesoota’i le tamaitai sa avea muamua ma ona to’alua, pe toe alu foi i le fale o le alii na aafia, a ia avea o ia ma tagatanu’u lelei e tausisi i tulafono a le malo i taimi uma.

TAGI A LE MALO

O le po o le aso 24 o Aokuso pe tusa o le itula e 11:00 na vili ai e se ali’i mai Mesepa le Ofisa o Leoleo i Tafuna mo se fesoasoani, ona o se tagata na ulufale faamalosi i totonu o lona fale ma se uamea ma sasa ai le papatua o lana uo tama’ita’i. E le gata i lea, na folafola fo’i e le tagata lea lona fasiotia o ia, o lona atalii atoa ai ma lana uo tama’ita’i.

E toatele Leoleo na tali atu i le valaau ma maua ai loa le avanoa e fesiligia ai le ali’i na aafia. Na taunuu Leoleo i luma o le sitepu o le fale ma latou vaaia ai se uamea pe tusa ma le 10 futu o loo taatia ai i luma o le fale.

Na taua e le ali’i na aafia e faapea, o ia sa i totonu o lona potu, ae o lana uo tama’ita’i ma lona atalii e 10 tausaga e taaalo i luma o le potu malolo o lona fale. E le nofo lana uo tamaitai i le la fale ma lona atali’i, ae na faateia o ia ina ua alu atu lana uo tama’ita’i e avea atu ma mana’o ai loa latou te momoe. 

I se taimi o le leva o le po, na taua ai e le ali’i lea i Leoleo le faateia o ia ina ua faalogo atu ua ee mai lana uo tamaitai i le fiaola. Na oso i fafo ma lona potu ma ia vaaia ai lana uo tama’ita’i o loo taatia i luga o le foloa i totonu o le potu malolo o le fale, ae o loo ta tu’i e se tamaloa. O lea tamaloa ma mulimuli ane iloa, o le alii lea o loo molia i lenei mataupu.

E le gata na tatu’i e le tamaloa lana uo tamaitai ae sa ia kiki fo’i lona papatua ma futi mai lona ulu. Na taumafai le alii na aafia e fesoasoani i lana uo tamaitai peitai na faatonu o ia e le alii ua molia e aua ne’i aia i le la mataupu ma lona to’alua muamua. 

E pei ona taua e le alii na aafia i Leoleo, o le taimi muamua lea ua ia faalogoina ai e i ai le to’alua muamua a le tamaitai lea o loo la faauo. 

A o le i ulufale le alii ua molia mai le fale, sa ia folafola lona fasiotia o le alii na aafia, o lana uo tamaitai faapea ai ma lona atalii, pe afai ae toe maua atu lona to’alua muamua i le fale. 

Na alu ese atu le alii ua molia peita’i sa mulimuli atu i ai ma le tamaitai na aafia, ona o lona fia mana’o e aveese mai ona lavalava o loo totoe ai i le fale a le ua molia. 

Pe tusa o le 30 minute talu ona tuana’i le faalavelave, talu fo’i ona o ese atu le ua molia ma le tama’ita’i na aafia, ae maua loa e le Ofisa o Leoleo se telefoni mai se Tina i le nofoaga lava lea i Mesepa, o loo ia moomia se fesoasoani ina ua taumafai lona to’alua muamua e fasioti o ia.

Na taunu’u Leoleo ma iloa ai, o le tamaitai lea na talosagaina Leoleo ma le alii na faaoolima ia te ia, o i laua ia na aafia fo’i i le faalavelave lea na tula’i mai pe tusa o se 30 minute talu ai.

Na taua e le Tina na aafia i Leoleo e faapea, ua silia ma le 15 masina talu ona la tete’a faaletulafono ma lona to’alua, ma o loo nofo i le fale o lona aunty. O le alii lea ua avea nei ma ana uo tama, faatoa 2 masina talu ona la masani. I le po na tula’i mai ai le faalavelave, na alu ai i le fale o lana uo tama e tafao ma le faamoemoe e toe fo’i mai i le fale a lona aunty pe a uma ana evaga o le po.

Peitai na faateia o ia ina ua vilivili atu lona to’alua muamua ma suesue atu o ia, poo fea o loo i ai. Ina ua ia faailoa i lona to’alua muamua le nofoaga o loo i ai, na faateia ai o ia ina ua ulufale faamalosi atu lona to’alua muamua ma fasi o ia, atoa ai ma lona folafola o le fasiotia o lana uo tama ma lona atalii.

Ina ua mae’a le gaioiga a lona to’alua muamua, na ia manatu ai loa la te o i le fale ma lona to’alua muamua e aveese mai lana ato lavalava o loo i ai,  peita’i na avea lona toe alu i le fale ma itu na toe fasi ai fo’i o ia e lona toalua muamua, ma mafua ai loa ona ia talosagaina le fesoasoani a Leoleo

Na pu’e faapagota e Leoleo le alii ua molia ma auina atu loa o ia i le Ofisa o Leoleo i Tafuna  mo suesuega. Ina ua fesiligia o ia e Leoleo, na taua ai e le alii ua molia lona le fiafia i lona to’alua i lona musu e saini pepa mo mea o loo faagasolo a le la fana