Pago Pago - AMERIKA SAMOA 

O le amataga o le vaiaso na toe tatala aloaia ai tauaofiaga lona 38 a le Fono Faitulafono, i toe aso e lima o totoe, ma na fa’atautoina ai le afioga Lualemaga Sofeni Lualemaga, e avea ma Senatoa fou o le itumalo #2 i Manu’a, lea e aofia ai afioaga o Ofu, Olosega ma Sili.

O le filifilia o Lualemaga, e sui tulaga i le afioga Malaepule Saite Moliga, lea na avea ma Senatoa o le itumalo, ae peitai, sa faamavae mai i le tofiga, ina ua ia faapaleina o ia i le suafa o Ta’aga mai i Fitiuta, o lea ua le toe agava’a ai o ia e avea ma sui o le Ofu, Olosega ma Sili.

E tusa ai ma tulafono lotoifale, afai ae i lalo ifo ma le tolu masina o totoe o se tauaofiaga a le Maota Fono, ae avanoa se nofoa o le Senate, e tatau ona filifilia e le Kovana se tasi e nofoia lea nofoa.

O lea ua filifilia ai e le afioga i le sui Kovana, le tofa ia La’apui E.V. Ale, ia le afioga Lualemaga e na te sui tulaga ia Malaepule, i le mae’a ai ona soalaupuleina lenei mataupu ma le afioga i le Kovana Faaleitumalo ia Misaalefua J. Hudson faapea matai o le itumalo.

 I le toe tatalaina o tauaofiaga a le Maota Fono i le amataga o le vaiaso, lea na malolo ai ina ia tuuina atu se avanoa e faamae’a ai galuega i le fale fou a le Maota Fono, ma se faamoemoega e faamae’aina Tauaofiaga lona 38 a le Fono Faitulafono, i totonu o le latou fale fou.

Ae peitai, ua le taulau lea faamoemoe, ona e le’i taitai ona mae’a le galuega, se’ia o’o i le tausaga fou.

O le afioga i le  Faamasino Sili Lagolago, ia Mamea Sala Jr., sa fa’atautoina ia le afioga i le Senatoa fou, ma o le a ia nofoia le tofi seia o’o atu ia Ianuari 23, 2025.  O si ona faletua sa taua’aoina le Tusi Paia sa faataunuuina ai le faatautoga.

O Lualemaga ua 60 tausaga o lona soifua ma ua loa ona tautua i totonu o le vaega a le ASPA, lea sa ritaea mai ai.

Ae e le’i faataunuuina le sauniga mo le faatautoga, na filifilia e le afioga i le Peresetene o le Senate ia Tuaolo Manaia Fruean, ia se komiti o Senatoa, na aofia ai afioga ia Magalei Logovi'i, Togiola Tulafono, ma Ma'o Gogo, e latou te iloiloina agava’a o le Senatoa fou.

I lana folasaga e avea ma sui o le komiti, na saunoa ai le afioga Senatoa Togiola Tulafono ma fa’ailoa mai le le’i sainia e le taitai o le itumalo ia le tusi e taliaina ai Lualemaga e avea ma Senatoa fou, o le itumalo.  Ae peitai, ua lava le saini a le kovana e tali ai tulaga o le tulafono.

O Senatoa ua faamaonia o le a fa’aauau la latou tautua i totonu o le Maota Maualuga, e aofia ai afioga Togiola Tulafono, Muagututia Tauoa mo le itumalo #5 a Sua.

Ua fa’amaonia mai foi i le Samoa News le toe taliaina o le afioga ia Tuialu'ulu'u Vaimili Tuialu'ulu'u o Ta’u, faapea le afioga Ma’o Faauma Gogo o Faleasao, e fa’aauau pea foi le la tautua mo le itumalo Manu’a #1, lea e aofia ai afioaga o Ta’u, Fitiuta ma Faleasao.

O le nofoa a le itumalo o le Maoputasi, mo afioaga o Leloaloa, Lepua ma Aua, o le a nofoia e le afioga i le Senatoa fou ia Ponausuia Faleono.

Mo afioaga o Fagatogo, Utulei ma Faga’alu, ua faapea ona toe filifilia ai e le itumalo a Maoputasi, ia le afioga Fano Frank Shimasaki, e fa’aauauina ai lana auaunaga.

Ua faapea foi ona faailoa mai le toe tofia foi o le afioga Tuaolo, e fa’aauau lana tautua mo le nofoaga o le Maoputasi, mo le afioaga o Pago Pago.

O le afioga ia Magalei Logovii, o le a toe taliu mai foi i totonu o le Senate, o se tasi o Senatoa e to’alua mo le itumalo a le Tualauta, i le nofoaiga fou.  O le tolu ai nei o tausaga, o le tautua a le afioga Magalei.

O le afioga ia Tuana’itau Malaki Togiola o le a sui tulaga i le afioga ia Fonoti Tafaifa Aufata, e avea ai o ia ma Senatoa lona lua mo le itumalo a le Tualauta.

Ua fa’amaonia mai foi i le Samoa News le toe filifilia o le afioga i le Senatoa Olo Uluao Letuli mo le fa’aauauina o lana tautua mo le itumalo a Fofo, faapea ai ma le afioga i le Senatoa Utu Sila Poasa mo le itumalo a Saole.